Varios cidadáns piden que Google elimine do seu buscador as referencias á súa persoa

Hoxe o diario Público sorprende destacando na súa portada que 10 españois non queren estar en Google, precisando no seu interior que fan referencia a unha serie de decisións da Axencia Española de Protección de Datos (AEPD) nas que dá a razón a unha decena de cidadáns que non queren saír entre os resultados de busca de Google, pois detectaron que amosaba certa información sobre as súas persoas que consideraban que atentaba contra a súa intimidade.
Entre os casos que dan lugar á polémica están detalles publicados por boletíns oficiais do Estado, dos que non se pode borrar a información pese a facer referencia a delitos ou conflitos xurídicos, o que leva aos prexudicados a esixir a Google a eliminación dos seus datos da Internet, e aínda que a AEPD dea a razón aos cidadáns, dende Google recorreron a decisión ante a Audiencia Nacional.
Dende o buscador alegan que no actual estado da tecnoloxía non poden crear un sistema automatizado de datos persoais, e o certo é que non é Google quen publica a polémica información (senón que o fan as Administracións Públicas) e no futuro podería agravarse a situación, pois abrirse cada vez máis a Administración aos cidadáns, o que fará que a cantidade de información pública sexa moito maior.
Dende a AEPD aseguran que a lexislación actual no protexe ao cidadán todo o que debería, e pensan que de sancionar a Google polo tratamento de datos sen o consentimento dos cidadáns, a compañía tomaría medidas para crear un sistema de borrado eficaz, argumento que parece bastante ridículo se temos en conta que a meirande fonte de problemas son os boletíns da provincia e o BOE, que poderían evitar estes problemas adoptando medidas como as que tomaron en casos puntuais (nos que substituían un nome completo polas iniciais do cidadán afectado).