VIKO bota a andar cun volume de negocio superior aos 10 millóns anuais
venres, 24 de outubro do 2014
- O galego Rubén Ferreiro, CEO de VIKO, nunha entrevista para Marketing Actual
Xa
o avanzamos hai unhas semanas: a
compañía Elogia xa non ía ser Elogia de agora en adiante. Máis
polo miúdo, pasaba a chamarse VIKO,
un termo cuxa orixe hai que rastrexala nunha especie de acrónimo de
Virtual KnOwledge e
que expresa, en palabras da empresa, unha vontade de achegar en
colectivo (a través de sete marcas de axencias, software e medios de
comunicación de mercadotecnia dixital) a experiencia máis
completa de ámbalas beiras do Atlántico en materia de comercio
electrónico. Agora, temos novos datos sobre o novo grupo dirixido e
coordinado polo galego Rubén Ferreiro (CEO do holding
resultante). En primeiro lugar, que estará constituído por un cento
de profesionais repartidos en tres países, España (Barcelona,
Madrid e Vigo), México (México DF) e Reino Unido (Londres), e cun
volume de negocio superior aos 10 millóns de euros anuais.
Lembrar que o grupo está
formado por Elogia, axencia de mercadotecnia online, Moddity,
axencia de desenvolvemento de aplicacións de comercio móbil,
Ibrands, axencia de resposta directa, Mittum, plataforma de
mercadotecnia e ecommerce, eMMa, ferramenta de aplicacións
intelixentes, MOÕSE, software de xestión masiva de páxinas de
destino e Mercadotecnia4eCommerce, medio de comunicación sobre
comercio electrónico e mercadotecnia.
En palabras de Rubén
Ferreiro, o nacemento da nova marca é “a evolución lóxica do
grupo empresarial”. E engade: “Até hai uns anos só existía a
axencia Elogia, polo que os primeiros novos proxectos, Ibrands e
Mittum, mantivéronse baixo a esfera do que chamamos Elogia Group;
agora, con VIKO, chégase á madurez do holding, distanciándoo
da axencia e preparándonos para un modelo empresarial no que hoxe
somos 7 e mañá poderiamos ser 8 ou 10 empresas”.
Os plans de futuro da
nova marca, engade, pasan polo medre nos sectores nos que está
presente e a internacionalización segmentada por tipo de proxecto.
Na súa opinión, “os modelos de axencia como o de Elogia ou
Ibrands, nos que amoreamos moito coñecemento e experiencia, teñen
un enorme potencial en países en crecemento como México ou outras
áreas de Latinoamérica”. De xeito paralelo, VIKO dispón de
proxectos de software punteiros a nivel mundial como eMMa ou MOÕSE,
“cuxo espallamento a curto prazo ten máis sentido en prazas de
alto nivel competitivo como a Unión Europea ou os Estados Unidos”,
engade Ferreiro.