Terras Gauda acollerá o desenvolvemento dun revolucionario proxecto europeo de robótica agraria
martes, 8 de xuño do 2021
A
multinacional tecnolóxica Atos vén de compartir os detalles dun
relevante proxecto de seu en Galicia, centrado, concretamente, na
transformación tecnolóxica dos sectores ligados á actividade
agraria. Máis polo miúdo, trátase do
proxecto europeo FlexiGroBots, liderado por Atos en colaboración
con dous socios españois (o Consello Superior de Investigacións
Científicas e a empresa viguesa Seresco) e dirixido a fomentar o uso
da robótica na agricultura. Desenvolverase (entre outras
localizacións) nas explotacións da adega Terras Gauda, con sede no
Rosal (Pontevedra).
Esta
iniciativa ten como obxectivo “capacitar aos fabricantes de robots,
enxeñeiros e provedores de servizos para construír e pór en marcha
sistemas baseados en múltiples robots para a industria
agroalimentaria co obxectivo de axudar aos responsábeis das
explotacións no seu traballo diario”. Financiado no marco do
programa Horizonte 2020, o proxecto desenvolverá unha plataforma
innovadora para facilitar o uso da robótica a través de tres
proxectos piloto a gran escala en Europa.
No
caso concreto da contorna española, elixíronse as adegas de Terras
Gauda, grupo constituído por catro explotacións que ten presenza
nas catro principais zonas vinícolas de España e na actualidade
comercializa ao redor de 2 millóns de botellas en máis de 45
países.
Segundo
explican dende Atos, “a adopción de novas tecnoloxías no sector
agrícola incrementouse exponencialmente nos últimos anos, desatando
o novo paradigma da Agricultura 4.0, onde a robótica, a Intelixencia
Artificial e a automatización xogan un papel fundamental no manexo
de cultivos e a agricultura de precisión ao abordar as necesidades
de monitoraxe e a toma de decisións en tempo real”. Porén, a
multinacional francesa recoñece que os sistemas actuais de robots
“carecen de flexibilidade, xa que están deseñados para levar a
cabo misións moi específicas e non poden asumir outras tarefas nin
cooperar con outras tecnoloxías robóticas, o que xera unha falta de
retorno do investimento para os agricultores”. O proxecto
FlexiGroBots xorde para emendar esta eiva.
Terá
unha duración de 36 meses e, ao seu abeiro, desenvolverase e
validarase unha plataforma aberta que apoie a creación de sistemas
multi-robot flexíbeis e heteroxéneos que permitan a cooperación e
autonomía de múltiples trebellos. Estes incluirán UAV (vehículos
aéreos non tripulados) e UGV (vehículos terrestres non tripulados).
Ao
abeiro de FlexiGroBots, o grupo de investigación e innovación de
Atos actúa como coordinador do proxecto, garantindo a execución das
actividades planificadas e o seguimento e supervisión global do
mesmo. A multinacional axudará a realizar a análise dos requisitos
e a deseñar a arquitectura de referencia e liderará a súa posta en
funcionamento e sincronizará os tres pilotos.
"Este
proxecto encaixa perfectamente co obxectivo de Atos de contribuír á
dixitalización das industrias europeas, incluída a agricultura,
mediante o desenvolvemento de aplicacións e servizos innovadores
baseados en Intelixencia Artificial, datos e robótica de confianza,
comenta Daniel Calvo Alonso, responsábel da unidade de Intelixencia
Artificial, Big Data e robótica do Departamento de Investigación e
Innovación de Atos e coordinador do proxecto FlexiGroBots.
A
plataforma FlexiGroBots validarase en tres proxectos piloto reais:
-
Viñedos (España): Demostrar a alta capacidade e versatilidade dos
robots para realizar diferentes tarefas en viñedos, contribuíndo á
calidade da uva para a produción de viño e á rendibilidade
económica xeral.
-
Campos de colza (Finlandia): Demostrar a xestión de pragas en tempo
real e a robotización de frotas de maquinaria pesada en pasteiros.
-
Campos de arandos (Serbia e Lituania): Demostrar o potencial das
solucións robóticas innovadoras, con técnicas avanzadas de
detección remota, aprendizaxe profunda e apoio á toma de decisións,
no cultivo de arandos.