Telefónica España ten previsto reducir a súa plantilla nun 20 por cento

A operadora de telefonía española con máis proxección internacional, Telefónica, vén de compartir hoxe co mercado o reforzo da súa política de retribución ao accionista, así como as previsións clave de crecemento da compañía para os vindeiros exercicios, que estima “será de entre o 1 e o 4 por cento durante o periodo 2010-2013”. Malia que isto se traducirá nun incremento de beneficios brutos para a compañía no prazo estimado, esta non dubidou en anunciar un drástico plan de redución de custes, que entre outras cousas, reducirá a plantilla de traballadores nun 20 por cento nos vindeiros tres anos. Este plan de recurte de custes para o territorio nacional vai servir para, segundo afirman no xornal especializado Cinco Días.com, “compensar os malos resultados que está a colleitar a compañía e mellorar a súa posición competitiva de cara ao futuro”. Entre as medidas tomadas por Telefónica, o xornal afirma que xa figura a “redución dun 6 por cento dos postos directivos”; redución que se irá trasladando paseniñamente ao resto de traballadores e traballadoras, para, segundo din, “gañar flexibilidade e incrementar a produtividade”.
De seguir o plan anunciado, a plantilla de traballadores de Telefónica, que en España ronda as 32.000 persoas, quedará reducida a algo máis de 25.000.
Cinco Días engade que esta medida acompáñase con outras adoptadas “para gañar competitividade, como ligar os salarios e os beneficios á produtividade máis que ao IPC”.