RTVE aposta por formar aos seus traballadores en software libre

Axustar o gasto dunha corporación pasa, case de xeito obrigado, por apostar polo software libre (entre outras cousas). O motivo: programas e ferramentas en xeral máis accesibles (algunhas de balde, outros non necesariamente), supresión do pago de licenzas e de renovación das mesmas e, en xeral, máis marxe de manobra para afacer recursos ás necesidades específicas da corporación. Así o entende RTVE (Radio Televisión de España), que “no marco da súa política de racionalización do gasto”, anunciou que vai formar aos seus empregados en diferentes aplicacións de software libre orientadas ó tratamento gráfico de imaxes e deseño 3D.
Segundo explica a corporación nun comunicado oficial e reflicten canles galegas centradas no código aberto como Mancomún, a medida tamén se insire na estratexia de RTVE por “seguir na vangarda tecnolóxica e pola innovación”, e forma parte do seu plan de aforro e eficiencia. O resultado é a introdución no seu seo de ferramentas informáticas de software libre “como alternativa para aplicacións privativas con altos custos de licenzas”. O tipo de aplicacións open source que están a implantar están orientadas ao manexo de documentos en PDF, creación gráfica e 3D e tratamento dixital de imaxes. Co obxectivo de que se lles tire o máximo partido a estas tecnoloxías libres, RTVE a través do seu instituto de formación e a súa aula virtual (apoiada na plataforma aberta Moodle), abriu unha convocatoria de cursos específicos: o primeiro destinado á creación e tratamento dixital de imaxes e orientado a crear e modificar as mesmas para ser empregadas en documentos audiovisuais e gráficos; e o segundo centrado no deseño gráfico e modelado en tres dimensións
Trátase de dous cursos teórico-prácticos en liña a desenvolver a través da plataforma Moodle do Instituto RTVE (aprendizaxe a distancia baseado en software libre) que facilita o acceso a materiais, avaliacións e exercicios prácticos.