R renova o seu patrocinio co Deportivo de LaLiga Genuine
venres, 5 de marzo do 2021
A
operadora de telecomunicacións R renovou o seu patrocinio co
Deportivo de LaLiga Genuine. O presidente do club, Antonio Couceiro,
e máis o director Corporativo Empresas da cableira galega, Isidro
Fernández de la Calle, anunciaron este xoves o acordo nas bancadas
do Estadio Abanca-Riazor, acompañados polo equipo.
Trátase
da terceira tempada consecutiva que se formaliza o patrocinio do
Deportivo de LaLiga Genuine, equipo do club coruñés no que xogan
persoas do colectivo DI (con discapacidade intelectual). A marca R
estará presente nunha chea de ámbitos, incluído o equipamento dos
xogadores e o vídeo-marcador da Cidade Deportiva de Abegondo. Tamén
figurará a marca de R na web do
Deportivo.
Como
dixemos, co devandito acordo, o operador galego convértese durante a
tempada 2020-21 (coma fixera nas dúas anteriores, 2018-19 e 2019-20)
en patrocinador deste conxunto do Deportivo que xoga na competición
de equipos do colectivo DI organizada por LaLiga.
O
Presidente do club coruñés, Antonio Couceiro salientou que
“novamente, como os demais patrocinadores principais do Club, unha
marca de gran prestixio da nosa comunidade e pertencente a un gran
grupo a nivel nacional, continúa vencellada ao Dépor, apoiando
nestes momentos tan complicados para todos. Ademais, faino a través
dun dos proxectos máis fermosos da Fundación Real Club Deportivo,
un orgullo para todos os que formamos a gran familia do
deportivismo”.
Pola
súa banda, Isidro Fernández de la Calle expresou a súa
satisfacción polo feito de que “R sexa a marca elixida outra vez
polo club coruñés para patrocinar o Deportivo de LaLiga Genuine”.
Este acordo -engadiu- “resume perfectamente a nosa aposta
compartida polo deporte, pola integración social e por valores tan
importantes coma a deportividade. Algo do que, sen dúbida, saben
moito os xogadores e xogadoras deste conxunto”.