Preséntase en FITUR unha aplicación que nos achega a todo o rico patrimonio arquitectónico que perdeu Vigo
xoves, 23 de xaneiro do 2014
FITUR foi e segue a ser
unha boa oportunidade para presentarmos tecnoloxías ligadas ao
turismo. O salón madrileño que xunta baixo un mesmo teito aos
sectores hostaleiro, das viaxes e das TIC, acolle estes días a
presentación dunha aplicación móbil con orixe en Vigo, a
aplicación Arquitectura perdida. Trátase, máis polo miúdo,
dunha ferramenta dispoñíbel para os sistemas iPhone
e Android
e que ten ás súas costas, como contan os seus creadores, “un
longo historial de éxitos”. A primeira peza foi un vídeo
que arestora está a piques de acadar as 100.000 visitas. A
continuación os responsábeis do proxecto lanzaron un libro que “é
líder de vendas en Galicia”.
Esta iniciativa a todas
luces transmedia (unha nova tendencia creativa que se materializa en
diferentes formatos e canles complementarios dunha mesma achega,
tradicionais e innovadores) desemboca agora na devandita aplicación
móbil baseada no libro en cuestión, e que estes días preséntase
en FITUR, para os promotores de Arquitectura Perdida “a
feira de turismo máis importante do mundo”. Detrás de todo este
balbordo están dous vigueses, por unha banda Cristian Freire
Macías, autor do vídeo e do libro publicado por Flashback Edicións,
e pola outra Alfonso Aguado Bustillo, que coa axuda do seu socio Elio
Capella desenvolveu a aplicación a través da empresa que manteñen
ámbolos profesionais, Kolobee Tourism Apps. A caseta no que levarán
a cabo as presentacións atópase no pavillón 10B14A.
Meténdonos xa no miolo
da ferramenta presentada en FITUR, dicir que se trata dunha achega
innovadora e tecnolóxica para que teñamos conta de todo que se lle
privou á cidadanía de Vigo en materia de patrimonio arquitectónico
e urbanístico. O servizo, en boa medida un servizo denuncia e tamén
un servizo de investigación histórica, lánzanos ao pasado da
cidade galega, levándonos da man a como luciría o centro de Vigo se
tivese conservado tódolos edificios que desapareceron nas pasadas
décadas de desarrollismo inepto. O proxecto, contan os seus
responsábeis, xurdiu trala creación do vídeo sobre a arquitectura
perdida de Vigo, que amosa os edificios demolidos comparándoos cos
actuais. Tralo éxito da reportaxe, chegou o libro e agora a
aplicación móbil, que pretende amosar Vigo tal como tería que ter
sido.