Preguntados consegue ser líder en descargas en España

Etermax, a empresa creadora de Apalabrados, está estes días a inchar peito grazas ao último informe de App Annie sobre as descargas de aplicacións durante o mes de decembro destacando que o xogo Preguntados, con máis de 125 millóns de usuarios e 800.000 descargas diarias, logrou un grande éxito na súa versión española e incluso conseguiu manterse en posición líder na App Store durante máis de 60 días. Incluso Google elixiu o xogo como caso de estudo na súa plataforma Google Insight.
Preguntados pode descargarse de balde para iOS, para Android e para Windows Phone, e vén a ser un sinxelo e divertido xogo de preguntas de distintas categorías (Xeografía, Historia, Arte, Ciencia, Entretemento e Deporte) que propón enfrontar a dous xogadores para ver quen consegue antes xuntar aos 6 personaxes correspondentes a cada categoría de preguntas, e que debe o seu éxito á súa compoñente social e á súa aposta polos contidos locais (ofrece preguntas de calidade que conectan cos usuarios de cada país). Enténdese así que o xogo conseguise superar tanto na App Store como en Google Play a xogos como Candy Crush Saga, Clash of Clans, FIFA 15 e Crossy Road. Durante este mes de xaneiro é cando Preguntados celebra terse convertido no xogo máis descargado en España, posición que xa conseguiu anteriormente noutros 24 países.