PEME e autónomos de Santiago familiarízanse coas vantaxes da eAdministración da man da Cámara de Comercio
xoves, 16 de abril do 2015
A
Cámara de Comercio de
Santiago organizou este xoves unha xornada sobre eAdministración
para PEME e autónomos, en colaboración co Concello. O evento foi
inaugurado polo presidente da dita entidade, Jesús Asorey, e a
concelleira de Economía de Santiago, Reyes Leis. A xornada tivo como
obxectivo dar a coñecer os usos da factura electrónica e das
ferramentas dun programa estatal, o Programa eAdministración da
Cámara de España. Esta iniciativa busca estender o emprego das
ferramentas dixitais no día a día das PEME e os profesionais coas
institucións públicas, facilitando tramitacións, comunicacións,
procedementos e expedientes.
O
coordinador nacional do Programa eAdministración da Cámara de
España, Juan Miguel Cuellar, salientou na xornada que as ferramentas
dixitais que visualiza o proxecto permiten “aforrar custes e
achegar beneficios na xestión empresarial que redundan nunha mellora
da produtividade da empresa”.
Este
programa ten unha primeira fase de consultoría para a optimización
de procesos onde se realiza un diagnóstico asistido e personalizado
ás empresas participantes. A eAdministración, lembrou Cuellar, pode
axudar a reducir as cargas administrativas, fornecer axilidade aos
procedementos coas Administracións ou automatizar procesos que
incorporen evidencias electrónicas certificadas, como a sinatura
dixital, o selo de tempo e as notificacións electrónicas
certificadas que garanten a súa seguridade xurídica.
“Unha
vez realizado o diagnóstico”, explicou o relator, “elabórase un
documento de mellora de procesos que servirá de guía para a fase de
implantación en plataforma de servizos”. Nesta segunda fase, a
empresa beneficiaria poderá realizar trámites con empresas privadas
ou coas administracións, facturar dixitalmente, automatizar procesos
internos e realizar transaccións mercantís coas certificacións
xurídicas necesarias. O custo da implantación destas solucións
será dun máximo de 1.000 euros.