O proxecto GNUTEST supera as expectativas iniciais a poucas semanas da súa finalización

Hai case tres anos varios investigadores do Centro de Investigación en Tecnoloxías da Información e a Comunicación (CITIC) iniciaron o proxecto GNUTEST que xiraba en torno a plataformas experimentais baseadas en GNU Radio para Sistemas de Comunicacións e Localización, unha grande innovación que achegaría grandes novidades aos sistemas de radiocomunicacións SDR. A poucas semanas da finalización do proxecto xa se alcanzaron os obxectivos formulados, o que supón todo un éxito para o equipo implicado.
O obxectivo partía do desenvolvemento dunha arquitectura SDR baseada en GNU Radio coa que se elaboraron unha serie de plataformas experimentais destinadas a avaliar a capa física dun estándar de banda estreita como DMR, a capa física dun estándar de banda ancha como WIMAX/LTE e as técnicas de posicionamento/localización baseadas en sistemas ad-hoc.
As principais vantaxes desta solución son:
 Importante redución de custos de desenvolvemento: trátase dunha plataforma aberta que permite a implantación de sistemas baseados en SDR e a diferenza doutras solucións, tamén parte do seu hardware presenta un deseño aberto.
 Mellora das prestacións das técnicas de acceso radio: e, como consecuencia, os servizos de comunicacións móbiles que soportan. Característica de suma importancia debido ao crecente papel das redes de comunicacións móbiles no tecido social e na actividade empresarial.
 Baixo custo: o que unido ao conxunto de software aberto e moi flexible, permite implementar unha gran variedade de estándares, protocolos e case calquera sistema baseado en SDR.
Grazas ao desenvolvemento propio destes estándares, proporciónase unha gran liberdade para valorar as prestacións das técnicas propias que se desenvolven para comunicacións en diferentes situacións: canles de comunicación reais, múltiples antenas en transmisión e en recepción, técnicas de redución de interferencias... ademais, con anchos de banda pequenos, o uso de GNUTEST permite o desenvolvemento de solucións próximas ao mercado e que poden ser explotadas pola industria, achegando unha gran flexibilidade e control.