O potencial das TIC no desenvolvemento: eixe temático do master en Sociedade da Información da USC
luns, 24 de outubro do 2011
O grupo de investigación GIS-T
Idega, inserido na Universidade de Santiago, está a organizar unha nova
edición do seu Master On-Line en Sociedade da Información e do Coñecemento,
unha actividade que, como o seu propio nome indica, vai dirixida a pór de
relevo todo o potencial das novas tecnoloxías no camiño dunha mellora
empresarial, investigadora, educativa, social ou persoal, e todo achegado a
través do formato que lle é especialmente propio a cuestión tratada: o formato
en liña. A actividade, que mantén aberto prazo de preinscrición de matrícula até
o día 4 de novembro, inclúe 60 créditos e un título intermedio propio da USC, o
de experto en Sociedade da Información.
Máis polo miúdo e como dixemos con motivo de
anteriores edicións do master,
estamos a falar dun posgrao que vai alén do profesional para inserirse tamén no
terreo da investigación, con potencial de abondo para capacitar aos alumnos no
impulso de contornos xeográficos concretos a través do seu traballo en
empresas, institucións ou comunidades, e tamén no estudo mesmo das ferramentas
dixitais e o seu impacto presente e futuro neses contornos.
Segundo apunta a organización na
súa web, coa oferta do Master On-line en Sociedade da Información búscase
que o alumnado adquira sólida formación TIC e sexa consciente da importancia
que adquiren estas ferramentas na sociedade actual, sobre todo á hora de pór en
marcha estratexias de desenvolvemento social, cultural e económico nunha vila,
cidade, concello, rexión, país ou territorio en xeral. Outro dos obxectivos é
establecer as condicións de colaboración científica a prol do dito
desenvolvemento entre tecnólogos, científicos sociais e creadores das artes e
das humanidades.
No profesional, a intención é impulsar a
innovación definindo e cubrindo novos postos de traballo na empresa, na administración
e nas comunidades de tipo local con alumnos especializados en pulo económico e
social e novas tecnoloxías. En investigación, o obxectivo é formar a
investigadores de excelencia especializados na investigación dos impactos do
TIC en empresas, institucións, organismos públicos e privados e na sociedade e
no territorio en xeral.
O profesorado seleccionado polos cursos ten
unha ampla experiencia no mundo da empresa e na investigación, estando
integrados a maior parte dos mesmos en tres grupos de investigación da
Universidade de Santiago: Sociedade, Tecnoloxía e Territorio; Novos Medios e
Sistemas Intelixentes e Análise de Modelización Económica
Segundo engade a organización, estamos ante un
master en boa medida práctico que lle
permite “ao alumnado obter unha formación
cualificada para o deseño e xestión avanzada de páxinas web, produción de
recursos multimedia de vídeo, son e fotografía dixital así como o contacto co
mundo laboral coa opción de poder realizar estancias de prácticas en diversas
empresas, institucións ou grupos de investigación; como, entre outros,
Fundación CEER Galicia-Norte de Portugal, Uninova, Idega, Feiraco,
Granxafamiliar, Galicia Autentica, Agalip, ADAF, Cief-Caixa Galicia, Asociación
Ibérica de Sistemas e Tecnoloxías da Información, CITA-Fundación Germán Sánchez
Ruipérez, Cáritas, Concellos de Santiago de Compostela, Brión, etc”.