O laboratorio de tecnoloxías cuánticas de Vigo presenta a súa sede
luns, 21 de xuño do 2021
A
Zona Franca e a Universidade de Vigo deron a coñecer a semana pasada
detalles do seu proxecto común para a posta en marcha dun
laboratorio cuántico (Center for Quantum Communications Technology,
QCTech), que xa ten a súa sede nun edificio da rúa López
Moura, propiedade da Zona Franca.
Segundo
fixeron saber, o proxecto situará a cidade de Vigo na vangarda da
investigación en información e comunicación cuántica, área de
estudo da física e da enxeñaría que comprende a análise, o
procesamento e a transmisión da información valéndose dos
principios e efectos da mecánica cuántica (a parte da física
moderna que estuda o movemento das partículas máis miúdas).
Na
cita participaron o delegado do Estado, David Regades; o alcalde de
Vigo, Abel Caballero; e a presidenta da Deputación, Carmela Silva,
que visitaron as instalacións do QCTech acompañados polo reitor da
Universidade de Vigo, Manuel Reigosa, e o profesor da Universidade de
Vigo, Francisco Díaz.
Zona
Franca é socio fundador do Center for Quantum Communications
Technology (QCTech), que se constituirá nos próximos meses nunha
asociación. Trátase dunha iniciativa da Universidade de Vigo
impulsada pola Axencia Espacial Europea (ESA) e o grupo de traballo
inclúe a profesores e investigadores de Enxeñaría de
Telecomunicación con experiencia en comunicacións e criptografía
cuánticas, con máis de 20 anos de percorrido investigador, con
recoñecemento internacional como expertos e referentes no deseño e
análise de seguridade destes sistemas. Aos devanditos expertos
sumaranse referentes en fotónica integrada e en tecnoloxía
aeroespacial.
Segundo
fixeron saber a Zona Franca e a UVigo, “o centro de investigación
pretende ser un referente a nivel internacional no ámbito das
comunicacións cuánticas, tanto en infraestruturas terreas como en
espazo, co obxectivo de descubrir e desenvolver novas e poderosas
aplicacións destas tecnoloxías que axudarán a impulsar as
economías futuras”. Amais, sinalaron, “axudará a fixar talento
nun ámbito no que Europa e España deben situarse para competir cuns
mercados previstos de miles de millóns de euros”. A maiores,
salientaron o seu potencial futuro para impulsar a transferencia
tecnolóxica á industria española e crear novas iniciativas
empresariais.
O
proxecto conta con importantes apoios como o EPIC (European Photonics
Industry Consortium), o Consorcio Europeo que agrupa a máis de 650
empresas europeas do sector da fotónica; tamén grandes compañías
nacionais e internacionais de distintos sectores como
telecomunicacións, aeroespacial ou defensa, que pediron
confidencialidade; o Instituto de Astrofísica de Canarias, a
Deputación de Pontevedra e o Concello de Vigo.