O grupo galego Menús achegará información diaria sobre cociña dende gastronomia.com
mércores, 23 de outubro do 2013
O grupo galego Menús,
start-up ligada á gastronomía e responsábel do servizo
Menus.es (centrado no impulso á
restauración e a hostalería a través das máis innovadoras
ferramentas 2.0), adquiriu o dominio gastronomia.com
co obxectivo de convertelo nun portal de novas en liña sobre o
eido da cociña e da hostalería. O proxecto, segundo indican os
responsábeis do grupo galego, nace coa vontade de complementar
tecnolóxica e informativamente as achegas de Gastro Radio, case con
toda probabilidade a primeira radio cen por cen gastronómica do
mundo e que, por certo, desde o 15 de outubro comezou a emitir tamén
en FM Madrid.
Lembrar que Gastro Radio
conta xa con oito horas de contidos diarios propios relativos á
gastronomía. “De orixe galega e vontade internacional”, segundo
a definen os seus responsábeis, Gastro Radio foi posíbel grazas a
un equipo de xornalistas e profesionais do sector que a puxeron en
marcha o ano pasado dando acubillo a múltiples e prestixiosos
colaboradores. Por exemplo: Pedro
Subijana (chef do Akelaŕe), Joseán Alija (chef do restaurante Nerua
de Bilbo), Miguel Ángel de la Cruz (o ecochef), Rafael García
Santos (crítico gastronómico) ou Luis Cepeda (crítico
gastronómico). Ademais, polos seus micrófonos pasaron chefs do
talle de Quique Dacosta, Juan Mari Arzak, Nacho Manzano,
Martín Berasategui, Paco Torreblanca ou Rodrigo de la Calle. Esta
difusión informativa impúlsase e compleméntase agora a través da
actividade de gastronomia.com, segundo nos explican dende Menús.