O concurso de fotografía a través de Instagram de Galiciencia, aberto a toda a comunidade educativa de España

Galiciencia, a maior feira científica que se celebra na nosa comunidade, promovida pola Tecnópole dende 2006, celebrará a súa 19ª edición no mes de maio co lema Mellor, de Madeira. Ademais do concurso de proxectos, convócase un certame de fotografía a través de Instagram, aberto a todo o alumnado e profesorado de Secundaria, Bacharelato e FP dos centros educativos de toda España.
Malia que o enfoque é libre, as fotografías deben ter como punto de referencia calquera obxecto ou contorna relacionada coa temática desta edición da feira, Mellor, de Madeira. O prazo para presentalas remata o vindeiro 15 de abril.
Todas as persoas os que desexen participar neste concurso deberán seguir o Instagram de Tecnópole Divulga. Terán que subir as súas fotografías a través desta rede social, etiquetando a Galiciencia co cancelo #concursogalicienciaonline2024. Cómpre indicar o título de cada instantánea, así como o centro educativo ao que pertence cada participante.
Cada persoa poderá presentar ata un máximo de tres fotografías. As instantáneas poden ser tanto en branco e negro como en cor. Os participantes deberán ser os autores das obras presentadas.
Un xurado de expertos decidirá a proposta gañadora. A resolución farase pública o 12 de maio, durante o acto de entrega de premios de Galiciencia 2024.