O Xabarín de plastilina segue a cobrar vida, desta volta dende unha aula de Lugo

A Secretaría Xeral de Medios e a Compañía de Radio Televisión de Galicia, que estes días están a celebrar conxuntamente os 25 anos de vida do ente comunicativo, vén de desembarcar na aula de Lugo da Rede CeMIT, onde levaron a cabo un curso de stop-motion sobre as técnicas de animación con plastilina.
Durante o curso, un grupo de 25 alumnos do IES de Pulpeiro traballaron na animación do coñecido personaxe da TVG, o Xabarín, que continuará a ser animado por alumnos de Secundaria doutras seis localidades galegas dando lugar a unha peza final co personaxe animado (montaxe do alumnado das sete aulas da Rede CeMIT participantes). O grupo que realice, nas catro horas que dura o curso, a animación de máis calidade recibirá un premio consistente nunha videocámara dixital.
Ademais deste curso, a aula de Lugo conta tamén cun vídeo conmemorativo e cunha exposición fotográfica aberta ao público que resume os 25 anos de vida da Compañía e que poderá visitarse de balde ata o vindeiro 21 de maio.