O Startup Congress Galicia celebrarase o 20 e 21 de abril en Vigo
venres, 14 de abril do 2023
A
nova edición do evento Startup Congress Galicia celebrarase en Vigo
(Palacio da Oliva) os días 20 e 21 de abril e reunirá a todas as
aceleradoras galegas e máis de cento cincuenta fondos de
investimento. A
presentación contou co delegado do Estado na Zona Franca, David
Regades; o alcalde, Abel Caballero; a presidenta da Deputación,
Carmela Silva; e os organizadores Lalo García e Frankie Gómez.
A cita contará novamente co apoio do Consorcio da Zona Franca de
Vigo, a Deputación de Pontevedra e o Concello.
O
congreso incluirá un amplo programa con charlas con tres salas
simultáneas con relatorios, keynotes, entrevistas, mesas de
debate, pitches de investimento e entrega de premios ás tres
mellores firmas novas e innovadoras (startups).
Realizaranse tamén charlas sectoriais onde está previsto o debate
entre actores de cada sector sobre o futuro de diversas áreas. O
evento terá prazas limitadas para presencial.
O
delegado David Regades destacou que “xa contan con máis de 600
inscricións, co que se superará o récord do ano pasado” e
subliñou que “é o maior evento que reúne ás startups e
investidores en Galicia”.
O
alcalde de Vigo dixo que “o congreso necesariamente tíñase que
celebrar en Vigo porque é unha cidade con ADN emprendedor e onde se
xeran proxectos á vangarda da economía”.
A
presidenta da Deputación, Carmela Silva, manifestouse “apaixonada
do emprendemento, que é fundamental na nova economía” e destacou
os programas da Deputación nesta liña.
Pola
súa banda, Lalo García e Frankie Gómez explicaron que tamén
contarán con fondos de investimento de Portugal, ademais de destacar
que “Startup Congress Galicia é tamén é un foro de innovación
e poñer en valor o traballo que veñen realizando desde 2010”.
Segundo
dixeron, este ano o Startup Congress Galicia terá a presenza de
empresas como Stellantis, Cinfa, Gebro Pharma, Visa, Mastercard,
Cesmsa, Roberto Verino ou Grant Thortom. Entre as startups
estarán Trison, Velca, Efimob, Devo, Getlife ou Ironchip.
Como
relatores destacan Aquilino Peña, de Kibo Ventures; Dora Casal, de
Roberto Verino; Ricardo Muiños, de Deloitte; ou Luis Garay, do fondo
Samaipata
Nas
mesas O futuro de.. debaterase sobre como será a industria do
comercio retallista, a banca, a saúde, a fraude e ciberseguridade, a
alimentación ou o turismo. Estas cuestións serán abordadas por
representantes destacados destes ámbitos que expoñerán en mesas de
debate as súas visións sobre os cambios que se produciron e estanse
producindo.
Durante
a tarde do xoves e a mañá do venres as aceleradoras Viagalicia,
BFAero, BFAuto, Celta Labs, Abanca Innova, BFFood, High Tech Auto e
Connector Startp Accelerator presentan as súas mellores empresas
aceleradas a un extenso grupo de investidores que poderán dispoñer
de espazos particulares para expoñer as súas necesidades e interese
para atopar capital e poder sacar adiante a súa idea.
Unha
das salas terá como contido máis de vinte obradoiros onde expor en
charlas curtas duns trinta minutos diversos temas que son de gran
interese para calquera empresa: Mecenado tecnolóxico,
unha vía innovadora para startups e pemes; Oportunidades e
retos na nova lei de Protección ao Informante; Deseño dunha
estratexia integral de propiedade industrial nunha startup;
Financiamento sen equity para acelerar o teu negocio: unha
oportunidade de 90M€ de fondos; Financiamento público para
startups; Financiamento europeo; ou Como escalar
unha startup.
LaconNetwork
A
partir de mediodía do venres desenvolverase a clásica Laconnetwork,
que é como se denomina ás quedadas informais de emprendedores TIC
que se celebran dende 2010 da man de Frankie Gómez e Lalo García
(reuníndose cada último venres de mes coa desculpa dunha comida
informal).
Segundo
se fixo saber na presentación, desde a primeira convocatoria deste
acto, fóronse sumando participantes, chegando a máis de 1.000
asistentes rexistrados. O modelo está baseado en que calquera pode
organizar unha Lacon mensual na súa zona, baixo dúas
premisas simples: cada un pagará o seu en modo fondo común e non se
come sentado para propiciar o networking e a mobilidade dos
asistentes.
Desde
o ano pasado pasa a denominarse Startup Congress co obxectivo de
chamar a atención de empresas e investidores no ecosistema
emprendedor galego. É unha iniciativa da Asociación Galega de
Emprendedores.