O Porto de Celeiro albergará un proxecto piloto de medicina a distancia para os mariñeiros

mércores, 20 de febreiro do 2008 Fernando Sarasketa

O Porto de Celeiro segue a dar pasos no camiño de tirar partido das novas tecnoloxías e da investigación para incrementar a rendibilidade da flota do país e as condicións de seguridade nas que traballa. O proxecto no que vén de participar semella ligado de maneira estreita con isto último, xa que se trata dun plan piloto para levar a telemedicina ós barcos do devandito porto, segundo informa A Voz.
No proxecto, que por tratarse dun labor de telemedicina consistiría en levar a cabo atencións médicas a distancia e con axudas das novas tecnoloxías da información, xa están a participar o Hospital da Costa (Sergas), a Confraría de Celeiro o Centro Tecnolóxico da Pesca da devandita vila mariñá.
Máis polo miúdo, o que se pretende con esta iniciativa a tres bandas é mellorar e incrementar os sistemas de asistencia a traballadores no transcurso do seu labor no mar, amais de afianzar as súas ligazóns con terra. Segundo informou o propio Centro Tecnolóxico, os mariñeiros do Gran Sol serán os primeiros en verse beneficiados polo proxecto piloto, inserido dentro dun plan máis grande, o Proxecto de Plataforma de Contidos Dixitais para o sector pesqueiro.
As razóns de ter elixido a flota do Gran Sol teñen que ver co feito de que os barcos que alí faenan son os que máis tempo están lonxe da costa, polo que neles se ven decote agravados problemas de saúde que, no caso de estar preto dun centro de atención, terían remedio inmediato.
Se a iniciativa dá bos resultados, a idea é estendela ó resto das embarcacións galegas que operan no dito caladoiro.

PUBLICIDADE