O Concello de Santiago fai as primeiras probas coa súa rede WiMAX pública

A concelleira de Cidade Histórica e Rehabilitación, Olga Pedreira, na presentación do servizo no Obradoiro

O Concello de Santiago vén de dar máis detalles sobre o vindeiro servizo de acceso á Internet sen fíos que estará a disposición dos cidadáns e dos visitantes no centro mesmo da cidade. A achega estará operativa antes do Nadal, apoiándose en tecnoloxía WiMAX e nos traballos despregados pola empresa Colabora. Segundo apunta El Correo Gallego, facéndose eco das declaracións feitas polo propio Concello durante as probas efectuadas esta semana no Obradoiro coa dita infraestrutura, o servizo iCompostela funcionará en once prazas públicas da área monumental (Praterías, Quintana, Toural, Abastos, Fonseca, Obradoiro, Cervantes, Porta do Camiño, Universidade, Mazarelos e parque de Belvís), incluíndose a maiores o Mercado de Abastos.
A iniciativa, que conta co respaldo da Concellería de Rehabilitación e do Plan Avanza (Ministerio de Industria), ficará aberta a desenvolvementos, actualizacións e ampliacións. Entre outras cousas, a rede permitirá conexións á Internet a través de banda larga, conectividade móbil e desenvolvemento dos servizos de cidadanía dixital e eAdministración. Por certo que tamén se prevé o reparto de routers entre medio centenar de establecementos comerciais da zona vella de Santiago. Sinalar por último que o prezo do servizo será de 25 euros para particulares e 39 para pequenas e medianas empresas.