O Campus de Lugo (USC) achega cursos de drons e ferramentas TIC para alumnado, docentes, investigadores e empresas
venres, 15 de setembro do 2023
O Campus
Terra da USC (Campus e Lugo) iniciou a segunda quincena do mes de
setembro varios módulos formativos sobre sistemas aéreos non
tripulados, QGIS e Mathcad, dirixidos á participación de
alumnado, persoal docente e investigador, así como “a técnicos de
empresas e demais axentes do sector produtivo”. A participación
nestas actividades, que están incluídas no programa
de formación complementaria do Campus Terra da USC para este
ano, é libre e de balde para todo o público interesado, que pode xa
formalizar a súa inscrición
en liña.
O curso Introdución ao manexo de Sistemas
Aéreos non Tripulados, estruturado en 20 horas de formación,
comezou este xoves na EPS de Enxeñaría, o mesmo escenario no que, a
partir do luns 18 impartirase o módulo Introdución ao uso do
Programa Matemático MathCad, unha proposta formativa
dirixida a alumnado e persoal docente e investigador programada ao
longo de 30 horas.
O curso Iniciación á Realidade Virtual na
docencia ofrece a partir do 21 de setembro formación neste
ámbito a docentes e investigadores. Asemade, o alumnado
universitario tamén poderá mellorar os seus hábitos e técnicas de
estudo individuais a través dun obradoiro, cunha duración de 10
horas, que se celebrará os días 21 e 28.
Amais, o persoal de administración e servizos
(PAS) da USC estarán en disposición de ampliar coñecementos sobre
o programa de control de accesos co curso Manexo da aplicación
Dorlet, que se celebrará na Facultade de Veterinaria a
partir do 25 de setembro, data na que tamén botará a andar na EPS
de Enxeñaría o curso Utilización das TIC nos procesos de
avaliación e control do plaxio.
Un Curso Introdución ao emprego de QGIS e
o Curso Avanzado de QGIS, dous módulos estruturados en 20
horas de formación cada un e orientados á participación de
alumnado, persoal docente e investigador, así como a axentes e
técnicos do sector produtivo, completan a oferta do programa de
formación complementaria do Campus Terra da USC para este mes de
setembro
O programa de formación do Campus Terra responde
a unha iniciativa artellada ao abeiro do convenio asinado pola USC
coa Consellería de Cultura, Educación e Universidades, a través da
que o campus de especialización con sede na capital luguesa ofrece
aos membros dos distintos colectivos que conforman a comunidade
universitaria, así como a empresas e a axentes produtivos, “a
oportunidade de participar nun total de 23 seminarios, obradoiros e
conferencias sobre temática diversa”.
A introdución ao uso de Microsoft Sharepoint (One
Drive) e contidos multimedia, o uso e a xestión de Microsoft Teams
para docencia e administración, o uso das TIC nos procesos de
avaliación e control de plaxio, a introdución ao manexo de Sistemas
Aéreos non Tripulados, ao programa matemático MathCad, así como
cursos de aprendizaxe ou perfeccionamento do manexo da aplicación de
control de accesos Dorlet e doutros programas, tales como Microsoft
Power-BI, follas de cálculo, ou mesmo de aplicacións orientadas ao
emprego da realidade virtual na docencia, centran algúns dos módulos
ofertados no programa de formación do Campus Terra.