O CITIC traballa no fornecemento do tecido empresarial galego

As capacidades do Centro de Investigación en Tecnoloxías da Información e as Comunicacións (CITIC) puxéronse de novo de manifesto en dúas das súas Áreas Tecnolóxicas: Sistemas Distribuídos e Arquitecturas orientadas a servizos xunto a Media en Rede e Fogar Dixital. As investigacións realizadas nestes campos culminaron en dous relevantes proxectos que, entre outros beneficios, supoñen un grande aforro de custos, ademais de ofrecer novos servizos ás empresas que repercutirán sobre a sociedade en xeral.

PROWESS: Mellora e garantía de calidade para servizos web

Dentro da Área Tecnolóxica Sistemas Distribuídos e Arquitecturas orientadas a servizos do Centro, varios dos seus investigadores enca­bezados por Laura Castro están participando no proxecto europeo PROWESS, no que tamén se inclúen outras empresas, centros de investi­gación e universidades de Reino Unido, España e Suecia.
O obxectivo de PROWESS é pro­porcionar ás empresas de software ferramentas e técnicas que lles permitan someter os seus produtos a un proceso de proba sistemático e eficiente, de maneira que se me­llore e garanta a eficacia dos seus produtos antes de que sexan postos a disposición dos usuarios. A través deste proxecto, os investigadores do CITIC colaboran con empresas desenvolvedoras de software no ámbito dos servizos web e as aplica­cións de Internet contribuíndo a mellorar a súa calidade e competitivi­dade.
Segundo Laura Castro, investigadora do CITIC inmersa no proxecto PROWESS, “estas probas previas son vitais e cada día reciben unha maior atención xa que as empresas comezan a ser conscientes de que construír software de calidade non pasa por realizar maiores investi­mentos de diñeiro ou tempo en probas que non son efectivas; o que se necesita realmente son procesos e ferramentas de proba que realmente atopen os erros no software de xeito rápido e, de ser posible, automá­tico. Os desenvolvedores de software normalmente gozan facendo software, e non tanto probándoo, pero probalo é esencial para garantir que todo funciona como se espera antes de que chegue aos usuarios”.

Syntheractive: novas experiencias no mundo da televisión

Doutra banda, o área Tecnolóxica Media en Rede e Fogar Digital do CITIC desenvolveu Syntheractive, proxecto do equipo de investigadores coordinado por Miguel Barreiro que revoluciona o mundo da televisión, ofrecendo novas experiencias ao usuario, servizos e aforro de custos para os operadores.
A tecnoloxía empregada para o desenvolvemento de Synthe­ractive consiste nun motor de aplicacións para televisión que se aloxa en remoto e que é válida para calquera televisor conectado ou dispositivos como tablets ou smartphones. Mediante este proxecto accé­dese a aplicacións moito máis complexas sen que os usuarios teñan a necesidade de instalar ningún aparello.
Para Miguel Barreiro, “os beneficios que aporta Syntheractive diríxense nunha dobre vía: por unha banda, para os operadores que o incorporen. Non só polo aumento da súa oferta, tamén polo aforro de custos que supón xa que ao estar aloxado na nube, todas as actuali­zacións que se realizan se acometen de xeito automático, non hai que cambiar equipos, nin cableado nin ningún tipo de soporte físico; e por outra, para os usuarios que ademais de contar cun servizo de lecer e información que inclúe mosaicos de canles interactivos en 3D, xogos en alta resolución, poden desde ver un partido de fútbol en grupo cos seus amigos, consultar revistas, facer procuras inmediatas de canles ou, ata, pode incorporar aplicacións sanitarias para seguimentos médicos ou telepresencia”.
Con estes proxectos o CITIC amosa o seu potencial de investigación en sectores tan dispares como o fogar ou os servizos en Internet, en liña co seu obxectivo de representar un punto de encontro entre a Universi­dade e a Empresa, fomentando a transferencia de coñecemento.