Modernización achegará 800.000 euros para o fomento do software libre

Esta mañá a secretaria xeral de Modernización e Innovación Tecnolóxica, Mar Pereira, xunto co subdirector xeral de Infraestruturas e Telecomunicacións, Adrián Lence, e o subdirector xeral de Desenvolvemento da Sociedade da Información, deron conta aos representantes das Asociacións Galegas de usuarios de Software Libre (AGUSL), de empresas (AGASOL) e das universidades galegas da posta en marcha do Plan de Acción 2010 en materia de software libre e de fontes abertas (FLOSS), que contribuirá a transmitir unha imaxe do FLOSS asociada ao bo funcionamento do mesmo e á calidade, adoptará medidas para poñer a disposición da sociedade e do tecido empresarial software libre propiedade da Administración e axudará a coordinar a todos os axentes que compoñen o ecosistema galego do FLOSS.
O departamento de Innovación Tecnolóxica desenvolve este plan, dotado con 800.000 euros no 2010, tras constatar a necesitade de xuntar esforzos aproveitando mellor os fondos públicos destinados á promoción do software libre e de fontes abertas para acadar un maior uso destas aplicacións na Administración, na cidadanía e nas empresas galegas. Con este obxectivo o plan contempla 21 accións que desenvolverá a propia Administración autonómica e outras 60 en colaboración coas asociacións de usuarios e empresas de software libre e as tres universidades.
O Plan de Acción 2010 en materia de software libre e de fontes abertas estrutúrase en torno a tres liñas de actuación: impulsar unha oferta de solucións baseadas en FLOSS de calidade, facendo fincapé en dar resposta a sectores estratéxicos; promover a implantación efectiva dos estándares abertos, que permitan a coexistencia con aplicacións de software propietario e fortalecer os mecanismos de formación e difusión dos modelos de software libre e fontes abertas e as súas vantaxes competitivas.
Entre as finalidades do Plan está achegar o FLOSS á PEME cun dobre obxectivo, por unha banda, posibilitar o desenvolvemento da industria galega TIC do software cunha oferta de servizos baseado en software libre e de fontes abertas e, por outra, darlle a coñecer a industria non TIC as posibilidades deste tipo de software.
No ámbito administrativo o plan contempla promover a interoperabilidade e a reutilización da información do sector público, poñendo á disposición doutros organismos da Administración os desenvolvementos realizados baixo contratos da Xunta de Galicia e financiados con fondos públicos.
Outra das iniciativas do Plan é dispoñer dun repositorio no que se poida acceder ao software libre e de fontes abertas desenvolvido en Galicia e a toda a información de asistencia técnica ao mesmo para permitir o seu uso dunha maneira sinxela. Isto implica unha adaptación e reestruturación do repositorio do FLOSS que ten actualmente a Xunta de Galicia. Tamén se establecerá un selo de calidade para as empresas galegas que desenvolvan solucións en FLOSS, o que aportará un maior grao de seguridade ás empresas non TIC que estean pensando na utilización de FLOSS e teñan dúbidas respecto do mantemento e sustentabilidade desta aplicación.
No ámbito da educación primaria e secundaria promoverase o FLOSS realizarase mediante unha serie de iniciativas lideradas pola Consellería de Educación para dalo a coñecer entre a comunidade educativa. Así, fomentarase a tradución ao galego de solucións baseadas en software libre e de fontes abertas, formase ao persoal docente no uso de solucións de software libre; despregarase un servidor de centro con solución TIC baseada en FLOSS nun mínimo de 50 centros e licitaranse os 14.000 ultraportátiles do Programa Abalar con sistema operativo GNU/Linux e paquete ofimático de software libre e de fontes abertas. Tamén se despregará un proxecto piloto de aulas baseadas en solucións FLOSS e da iniciativa Webs dinámicas nun mínimo de 500 centos que lles permitirá dispoñer dun portal web, dunha plataforma de teleformación e galería de imaxes con aplicación FLOSS.
Coordinar as accións de promoción e difusión do FLOSS entre os axentes implicados é outra dos aspectos clave do plan para realizar unha mellor xestión das mesmas, evitando duplicidades. Deste xeito, renovarase a colaboración coas oficinas de software libre creadas nas universidades galegas. A Secretaría Xeral de Modernización e Innovación Tecnolóxica investirá 120.000 euros, 40.000 por universidade para realizar diferentes actividades de difusión, formación, actos e eventos en materia de software libre.