Menus.es desenvolverá en formato virtual un encontro iberoamericano de gastronomía
luns, 25 de maio do 2015
A empresa galega Menus,
responsábel da plataforma Menus.es,
presentou a semana pasada unha iniciativa para tender pontes (en
liña) entre os profesionais da hostalería de ámbalas beiras do
Atlántico. Trátase da primeira edición da Feira
Iberoamericana de Gastronomía, FIBEGA 2015, un encontro que se
desenvolverá en formato virtual durante os días 17, 18 e 19 de
novembro deste ano. No acto de presentación do evento dixital
participou o presidente da Academia Iberoamericana de Gastronomía,
Rafael Ansón; o presidente adxunto, Nicolás Muela e a empresa
organizadora Grupo Menus, dirixida polo empresario galego Roi Correa.
Durante a cita cos medios
e cos profesionais do sector da hostalería e a gastronomía
amosáronse os detalles e obxectivos do que cualificaron como “o
primeiro gran encontro entre empresas relacionadas co ámbito da
gastronomía nos países de Iberoamérica”. O acto foi
retransmitido a través de streaming na
páxina específica do evento, onde se pode volver visualizar en
diferido. Por certo que a web tamén será o centro de actividade do
encontro internacional que se vai desenvolver en novembro, reunindo
nela mesma as diferentes casetas participantes e acubillando e
amosando todo tipo de actividades. A feira, ademais, poderase visitar
en calquera intre posterior á celebración oficial.
FIBEGA, fíxose saber, é
un proxecto que pretende ser accesíbel a nivel global e “que
suporá a primeira dunha serie de citas anuais nas que se reunirán
os principais axentes representantes do sector gastronómico
iberoamericano, como produtores, grandes marcas, adegas, institucións
ou destinos gastronómicos entre outras moitas cousas”. Ademais os
visitantes poderán acudir, de maneira virtual, a relatorios e
demostracións dos chefs máis importantes de ámbalas beiras do
Atlátnico que se ofrecerán en streaming desde a web.
Roi Correa será o
encargado de dar forma a FIBEGA 2015. O acto de presentación tivo
lugar no Hotel NH-Eurobuilding de Madrid e ao finalizar ofreceuse un
cóctel aos asistentes, elaborado polo chef Luís Bartolomeu.
Como lembraremos, o Grupo
Menus foi fundado en 2011 por Roi Correa. Trátase dun holding
con capital na súa maioría galego, adicado aos sectores da
comunicación, a gastronomía e as novas tecnoloxías.