José Tomé presenta Inventrip e Lugo 360 nunha feira FITUR ateigada de expertos en turismo
xoves, 23 de xaneiro do 2020
O
presidente da Deputación de Lugo, José Tomé Roca, xunto á
deputada de Promoción do Territorio e Turismo, Pilar García Porto,
presentou este xoves 23 en FITUR a campaña turística Lugo, ¡ven! destinada a mostrar
globalmente os moitos atractivos dos concellos da provincia ao tempo
que aposta polo turismo sustentábel, innovador e excelente. No
acto, Tomé Roca e García Porto tamén deron a coñecer
dúas novas aplicacións para dispositivos móbiles que teñen como
finalidade difundir a riqueza de Lugo e mellorar a experiencia do
visitante.
A
presentación, que se desenvolveu nun stand de Galicia
ateigado de xente (principalmente blogueiros e xornalistas
especializados no sector turístico), estivo conducida polo
meteorólogo lucense Martín Barreiro, embaixador da provincia para o
desenvolvemento de accións de promoción e consolidación da marca
turística Lugo Cambia. Tamén participaron as alcaldesas de
Lugo, Lara Méndez, e Viveiro, María Loureiro, e a primeira tenente
de alcalde de Monforte de Lemos, Gloria Prada.
Segundo
fixo saber o presidente, as iniciativas turísticas que está a
presentar Lugo en FITUR veñen todas elas marcadas polo innovador: “O
viaxeiro de hoxe é cada vez máis dixital e organiza o seu tempo
libre a través do seu móbil, tableta ou ordenador”, subliñou,
antes de presentar as aplicacións Inventrip e Lugo 360.
José
Tomé explicou que a app gratuíta Inventrip
inclúe información sobre uns 2.500 puntos de interese, entre
elementos do patrimonio cultural e natural, rutas, artesáns,
bodegas, empresas de turismo activo, restaurantes e establecementos
turísticos. “Un conxunto de información que lle permite ao
visitante trazar unha ruta para chegar aos lugares que máis lle
interesan ou poder descubrir os recursos que están máis preto da
súa posición”, dixo.
A
outra ferramenta tecnolóxica que o presidente presentou en FITUR foi
Lugo 360, unha aplicación tamén de balde, que a través da
Realidade Aumentada permitirá facer unha viaxe a 25 localizacións
da provincia a través de calquera dispositivo móbil. A ferramenta,
unha app inmersiva, “abre
unha xanela virtual que permitirá ao usuario facer unha visita a
calquera dos catro xeodestinos da provincia de Lugo (Ancares-Courel,
A Mariña, Lugo-Terra Chá e Ribeira Sacra), co fin de motivalo a que
faga unha visita real”, explicou, engadindo que Lugo 360 e
Inventrip son “dúas maneiras de acompañar aos nosos
visitantes a través do seu móbil sen condicionalos, deixando que
eles mesmos teñan o control sobre a súa viaxe e que esa viaxe lles
achegue a realidade máis natural da provincia de Lugo”.