Investigadores da UVigo traballan nun innovador sistema para garantir procesados de datos seguros de xeito incondicional

O investigador de AtlanTIC e da Universidade de Vigo, Marcos Curty

A seguridade nos diferentes chanzos de tratamento da información segue a ser en certa maneira unha materia pendente. Con todo, os nosos investigadores semellan terlle declarado a guerra a estes retallos soltos. A máis recente destas frontes abertas chéganos dende a Universidade de Vigo, onde un equipo liderado por Marcos Curty (membro de AtlanTIC e investigador do grupo de Antenas, Radar e Comunicacións Ópticas da Universidade de Vigo) xuntou forzas con expertos en tecnoloxías chineses e da Universidade de Sevilla para dar forma a recursos que garantan un procesamento da información “incondicionalmente seguro”. Ou sexa, para facer que os datos que devezamos por protexer estean protexidos si ou si.
Isto é o que se coñece como protocolo de compromiso de bit: a toma de decisións garantindo que ninguén (absolutamente ninguén) poida mudalas logo. A idea do devandito proxecto internacional no que traballa a Universidade de Vigo é dar un chimpo cara a adiante neste materia: achegarlle os alicerces firmes que precisa. A través desta iniciativa, os investigadores implicados demostraron por primeira vez que a combinación da mecánica cuántica e da teoría da relatividade permite resolver de xeito “incondicionalmente seguro “este tipo de problemas de comunicacións e procesado de información “que se pensaban imposibles ata o de agora”, sinala a Universidade de Vigo.
O equipo internacional (o grupo de Curty e investigadores sevillanos e máis da University of Science and Technology of China Qiang Zhang e Jian-Wei Pan e do Shandong Institute of Quantum Science and Technology) empregou algo máis de medio ano en realizar e avaliar os resultados do experimento. En palabras de Curty, estamos ante a constatación do importante potencial da interacción entre mecánica cuántica e teoría da relatividade á hora de garantir certas esixencias en materia de coñecemento. “O noso traballo”, sinala, “amosa tamén que estes protocolos de comunicacións cuántico-relativistas son experimentalmente viables, e abre por completo un novo eido de investigación que pode proporcionarnos novas aplicacións prácticas”.
Segundo explica o investigador, a iniciativa ten o seu xermolo na Universidade de Estocolmo, onde coincidiu nunha estadía de investigación a finais de 2012 co catedrático da Universidade de Sevilla Adán Cabello. O experimento, engade a UVigo, “combina as dúas teorías físicas que rexen o universo, a mecánica cuántica e a teoría da relatividade, permitindo demostrar por primeira vez que a natureza pode resolver problemas de comunicacións e procesado de información ás que non lles tiña atopado resposta”. E engade: “Esta combinación das dúas teorías chega onde non o fan nin a mecánica clásica nin a mecánica cuántica de xeito illado, ao non permitiren aplicar o compromiso bit de xeito incondicionalmente seguro”. Como exemplo práctico da aplicación destes traballos, Curty ponnos en situación: que faría un grupo de millonarios que desexase saber quen é o que ten máis diñeiro pero ao mesmo tempo non quixera canto diñeiro atesoura cada un deles? Este problema tería solución empregando a denominada computación distribuída de xeito seguro, “que permite calcular unha determina función que depende de certos datos que están distribuídos en diversos ordenadores de xeito que todos eles colaboren para obter o resultado da función pero ningún deles poida acceder á información dos distintos ordenadores”. Outros protocolos criptográficos que tamén poderían beneficiarse da posibilidade de realizar o devandito compromiso bit de xeito seguro son os denominados coin tossing, zero knowledge proofs ou obvious transfer. Segundo explica Curty, o experimento no que traballa “podería utilizarse para realizar todos estes protocolos de xeito plenamente seguro, o que ata o de agora non era posible”.