Intermax achega accesos de máis de 100 Mbps nas Nogais, Sobrado, Arzúa e Valdoviño
luns, 13 de xuño do 2011
Intermax, empresa de Melide da que falamos
hai pouco para dar conta dos traballos que está a despregar para achegar
cobertura no Camiño de Santiago, segue a afondar na súa oferta de acceso ás
redes naqueles recantos da nosa xeografía que ficaban até o de agora a
contrapelo das mesmas. Segundo conta nun comunicado recente, xa deu comezo ás
probas e comprobacións de banda larga e velocidades de máis de 100 Mbps nos
concellos de As Nogais, Sobrado dos Monxes, Arzúa e Valdoviño.
Tanto
estas ofertas de conexión a alta velocidade de Intermax como as precedentes
estarán suxeitas a continuas melloras. Tal e como explica Javier Mouriño,
director da empresa de Melide, “o acceso
seguirá aumentando no curto e medio prazo, por iso nesta empresa só se usan
tecnoloxías de última xeración preparadas para cubrir as actuais e futuras
necesidades dos clientes”.
Acerca
destas tecnoloxías, Mouriño apunta a que se trata de recursos evolucionados e
avaliados polo miúdo para tirarlle o máximo partido ao WiMAX, acceso sen fíos a
través de ondas de radio especialmente axeitados para lugares afastados, e que “permite unha cobertura total do 100% no ámbito
rural”, engade.