Gradiant analiza o futuro da Industria 4.0 no I Foro ÉGIDA
xoves, 22 de abril do 2021
- Luis Pérez Freire, director xeral do Centro Tecnolóxico Gradiant
Asimilar
os cambios, retos e oportunidades que pon en xogo a Industria 4.0 con
todos os elementos que a acompañan (Intelixencia Artificial, Big
Data, algoritmos, interconectividade de sistemas e
dispositivos) foi un dos grandes obxectivos dun evento online
celebrado este 22 de abril no que participou activamente o Centro
Tecnolóxico Gradiant, con sede en Vigo. Estamos
a falar do I Foro ÉGIDA, organizado por Fidesol baixo o epígrafe O
futuro da seguridade na Industria 4.0.
Fidesol
é un dos catro centros de I+D que integran o consorcio creado
hai un ano dentro do Programa Cervera para Centros Tecnolóxicos do
Centro de Desenvolvemento Tecnolóxico Industrial (CDTI).
O
consorcio, participado tamén por Gradiant, Ikerlan e Vicomtech,
traballa en catro obxectivos centrados en tecnoloxías de
criptografía aplicada para a protección da información
confidencial, a identidade dixital, a privacidade para a prevención
do fraude e a seguridade en técnicas disruptivas utilizando
tecnoloxías como IoT (Internet das Cousas), Intelixencia Artificial
ou blockchain.
“O
ano da pandemia puxo de manifesto con especial relevancia a
dependencia da nosa sociedade e da nosa economía das tecnoloxías e
da conectividade, amais da necesidade de tomarnos moi en serie a
privacidade e a seguridade da información, obxectivos nos que
traballa precisamente ÉGIDA”, indicou durante a xornada Luis Pérez
Freire, director xeral de Gradiant, centro galego que lidera o
consorcio.
O I
Foro ÉGIDA contou coa intervención do director do CDTI, Javier
Ponce Martínez, quen avanzou que a próxima convocatoria do Programa
Cervera terá o foco na xeración de ecosistemas entre pemes e redes
de excelencia como ÉGIDA para facilitar a transferencia da
tecnoloxía que se está investigando e desenvolvendo, “unha
tecnoloxía que responde as necesidades reais da industria e do
tecido empresarial”. A convocatoria, que está previsto lanzar
despois do verán, “verase reforzada con financiamento adicional
dos fondos europeos de reconstrución e prevé a contratación de
doutores nas empresas que desenvolven estes proxectos”, indicou
Ponce.
O
foro tivo un apartado semipresencial, moderado polo director de
Fidesol, Juan Manuel Lombardo, que contou con intervencións do
catedrático de Intelixencia Artificial da Universidade de Granada
Óscar Cordón, o director da ETSIIT e catedrático de Enxeñaría
Telemática da Universidade de Granada, Pedro García Teodoro, e co
responsábel de Infraestruturas de Axesor, Luis Márquez, en
representación do tecido empresarial, destinatario principal das
investigacións de ÉGIDA.
Os
expertos de ÉGIDA compartiron durante o encontro, inaugurado polo
presidente de Fidesol, Luis Joyanes, os avances dos Proxectos Faro,
que validarán nas empresas o resultado das investigacións nas
tecnoloxías vencelladas ás súas áreas de actividade e que teñen
aplicación directa en ámbitos como as finanzas, a saúde, as
administracións públicas e mesmo, os medios de comunicación.