GaliciaTIC aposta novamente polas presentacións de proxectos sobre un cuadrilátero, as Start-Up Battles
luns, 12 de xuño do 2017
A
organización de GaliciaTIC
(Miguel Merino e a súa equipa) está a día de hoxe ultimando os
preparativos da nova edición do evento galego de novas tecnoloxías
da información, este ano centrado máis que nunca en impulsar a
transformación dixital do noso sector produtivo. Entre as
actividades nas que se están a centrar os organizadores atópanse
novamente (logo do éxito colleitado o ano pasado) as Start-Up
Battles, presentacións de novos proxectos tecnolóxico-dixitais
a desenvolver a xeito de regueifa ou combate amistoso, nun ring de
boxeo. GaliciaTIC, neste senso, xa fixo un chamamento a participar:
“Aínda que non saibas boxear nin encaixar golpes, non te
preocupes, esta é unha batalla especial na que o máis que máis vas
utilizar será o teu cerebro”.
As
“liortas” desenvolveranse a través de presentacións compartidas
de cinco minutos, sobre un cuadrilátero e co premio final de
converternos nos reis das Start-Up Battles 2017.
En
temos máis concretos, os galardóns incluirán acceso aos obradoiros
de Connecting for Good Galicia e as horas de asesoramento do programa
de mentores de VíaGalicia, cos que Xunta, Consorcio da Zona Franca
de Vigo e Vodafone recoñecerán “os nosos mellores golpes”,
sinala a organización de GaliciaTIC, engadindo que as “liortas”
son un escaparate de primeira liña para “seguirmos subindo de
categoría”.
GaliciaTIC
desenvolverase os días 26 e 27 de xuño na Cidade de Cultura de
Galicia (Santiago). Amais das regueifas tecnolóxicas, acollerá
relatorios, mesas temáticas e actividades de achegamento ás últimas
tendencias TIC mundiais. No panel inaugural participarán Miguel
Merino, profesor da UVigo, Mar Pereira, directora de AMTEGA, Giovanni
Giardina, presidente de Ineo, Clara Pezuela Robles, presidenta de
PlaneTIC, e María del Carmen Vicente, xefa de Área de Sectores
Industriais do Ministerio de Economía e Industria.
