Fortalécese a Cátedra de Feminismos 4.0 cuns premios STEM e un comité de sabias
venres, 24 de xullo do 2020
A
Cátedra de Feminismos 4.0 da Universidade de Vigo e a Deputación de
Pontevedra vai pór en marcha unha convocatoria de premios para
promover, apoiar e fomentar os estudos STEM, ou sexa, os estudos de
Ciencia, Tecnoloxía, Enxeñaría e Matemáticas (polas súas siglas
en inglés). A cátedra, que foi posta hai un ano polas ditas
entidades co obxectivo de loitar contra a desigualdade nos eidos
científico-tecnolóxicos, fomentando vocacións femininas,
consolidouse este venres 24 cun convenio novo, no marco do cal a
Deputación achega 60.000 euros.
O
acordo, que foi asinado este venres polo reitor Manuel Reigosa e a
presidenta do ente provincial, Carmela Silva, contempla unha
serie de actividades para este vindeiro curso, como a posta en marcha
da devandita convocatoria de premios ou, tamén, a creación dun
“comité de sabias”.
Carmela
Silva agradeceu a colaboración da Universidade de Vigo, á que
cualificou como un “referente nacional en políticas de igualdade”
ao tempo que recoñecía que este “é dos convenios que eu asino
con máis satisfacción, e fágoo cun home feminista e empoderado”.
O reitor da UVigo agradeceu estas palabras e lembrou a necesidade de
“non dar un paso atrás” no que se refire á loita pola igualdade
real, que non se produce, puntualizou, nin sequera “en institucións
aparentemente igualitarias como a universidade”.
O
acto contou coa presenza da nova deputada responsable do eido de
Igualdade, Victoria Alonso e da directora da Unidade de Igualdade da
UVigo, Águeda Gómez.
Segundo
explicaron ambos representantes institucionais, “existen estudos
que amosan que as mulleres en xeral obteñen mellores resultados no
seu paso pola universidade que os homes: mellores taxas de
rendemento, éxito e avaliación, notas medias e taxas de idoneidade
e graduación”. Porén, engadiron, “prodúcese unha concentración
importante de estudantes mulleres nas carreiras de artes e
humanidades, ciencias sociais e xurídicas e ciencias da saúde,
mentres que a súa presencia é moito menor nas enxeñerías”
Para
tratar de mudar este escenario, no marco da Cátedra de Feminismos
4.0 Depo-UVigo poranse en marcha diversas actuacións concretas, como
os premios GirlGeekCivid, destinados a apoiar e fomentar os estudos
STEM entre as alumnas da Universidade de Vigo de titulacións dos
campus situados na provincia de Pontevedra, unha actividade “de
especial relevancia nestes tempos de pandemia”, puntualizaba Silva.
Por
outra banda, en outubro celebrarase a segunda edición do workshop
virtual Sociedade dixital e xénero. Hackeando o patriarcado,
que contará coa participación de investigadoras expertas
internacionais e nacionais. Esta cita comprenderá un wikimatarón
feminista e un obradoiro virtual para, como explicaba Silva,
“identificar e combater os machitroles, porque é moi importante
facernos conscientes dos ataques brutais que acontecen nas redes
sociais e que sufrimos as mulleres e para os precisamos ter
respostas”.
Outra
das novas propostas da cátedra é a creación dun comité de sabias,
para “que a xente saiba que hai grades expertas e conte co seu
coñecemento”. O acordo contempla tamén continuar coa convocatoria
de bolsas de investigación en cuestións relacionadas coa igualdade,
cunha contía de 6000 euros, así como a creación dun espazo web
para a Cátedra Feminismo 4.0.