Dominig ar Foll (Intel) afirma que o reto da seguridade nos obxectos conectados acadarase a través do open source

Dominig ar Foll, arquitecto software en Intel Open Source, interveu hoxe en LibreCon 2015 (Cidade da Cultura de Santiago) para achegar a súa visión sobre a revolución tecnolóxica inminente que se coñece como Internet das Cousas. Ao seu xuízo, os obxectos conectados van beneficiar a quen agarda cos brazos abertos por esta nova orde de interconexión home-contorna... e tamén a quen non a desexa en absoluto. “Todos queremos ter programas e recursos actualizados”, sinalou, e se hai elementos que nos axuden a ter a punto (por exemplo) o mapa de navegación por estradas ou a escoitar a música que nos gusta onde hai posibilidades aparentes de escoitala, benvidos sexan. O relator recordou que moitas destas vantaxes están en situación de risco por unha manchea de puntos febles que cómpre emendar. “Nós como profesionais temos que protexer esta tecnoloxía e estes avances”, sinalou, lembrando que a comunidade de usuarios, asociacións e empresas open source, hoxe en día, está mellor preparada para facelo.
Cómpre conseguir que haxa moita xente para acadar as mellores condicións de seguridade, é pura lóxica, sinalou. Na súa opinión, unha comunidade e unha masa crítica de persoas achegan un meirande clima de protección que unha empresa ou unha entidade por separado. “As persoas, todas elas en colectividade, son as que van crear unha Internet das Cousas fiable”, engadiu, ao tempo que recordou como está a medrar hoxe en día (moito) a cifra de obxectos conectados ás redes, constituíndose finalmente un reto a superar que nos vai implicar a todas e todos. “Unha resposta primeira a isto”, sinalou, pode parecer o software embebido: o que se executa pero que nin se ve nin se aprecia nin amosa a súa execución. “No noso fogar hai múltiples ordenadores que operan sen que os vexamos, cada electrodoméstico novo conta con computadores así.... Pois o software embebido funciona igual”, explicou. Porén, apuntou, este tipo de programas teñen hoxe en día poucos expertos reais, polo que dificilmente se acadaría a resposta universal e integradora que se precisa.
Como conclusións ao fío do devandito, lembrou que malia que é certo que non hai unha fórmula máxica que resolva o problema da desprotección e das vulnerabilidades (unha fórmula permamente no tempo e que invalide calquera tentativa de ataque de maneira global), si que é verdade que todo pasa por fórmulas de probada efectividade como a validación efectiva do software, o compromiso por sermos claros e precisos cos nosos produtos ou a vontade de facer fincapé nos recursos que illen as aplicacións e que protexan a información persoal (segundo fixo saber, o cifrado de información é un paso fundamental para garantir o axeitado tráfico na Rede). Polo tanto, é de obriga que para desenvolver sistemas e aplicalos apostemos pola lexibilidade e a claridade, ingredientes fundamentais para a seguridade e dos que Linux, sinalou, “é un bo exemplo”. As ferramentas que ofrezan códigos ilexibles non serán útiles para o que queremos acadar en materia de protección para a Internet das Cousas, engadiu.