DATAlife recibirá 5,5 millóns co-financiados por Europa para acelerar a dixitalización de 300 pemes
xoves, 30 de marzo do 2023
Este
xoves 30 de marzo celebrouse en Santiago unha xornada sobre o
proxecto DIH DATAlife Hub de
Innovación Dixital, con sede en Compostela e posto en marcha
para converter Galicia nunha “biorrexión de referencia en Europa”.
Segundo fixeron saber no balance de fitos da xornada os responsábeis
do proxecto, este xa conta co selo excelencia EDIH DATAlife,
outorgado pola Comisión Europea a través da iniciativa Hubs
Europeos de Innovación Dixital (EDIH). A xerente do DIH DATAlife,
Lucía Castro, explicou no Auditorio Xosé Neira Vilas da Cidade da
Cultura de Santiago de Compostela, que a dita acreditación implicará
contar co sinal de excelencia que lle permite denominarse EDIH, único
Hub Europeo de Innovación Dixital da comunidade autónoma galega.
O
proxecto, segundo anunciou Lucía Castro, recibirá case 5,5 millóns
de euros, dos cales 2,7 millóns están co-financiados pola Comisión
Europea, sendo o único hub galego que recibirá financiamento de
Europa. Os outros 2,7 millóns corren a cargo do Estado, engadiu.
A
xornada serviu en liñas xerais para presentar e dar a coñecer a
iniciativa avalada pola Comisión Europea, que comezou a súa andaina
o pasado 1 de xaneiro e que terá unha vixencia de tres anos. Como
garantía dese apoio acudiu o xefe de Dixitalización da Gobernanza
da Industria Europea da Comisión Europea, Yves Paindaveine, quen
destacou “a importancia para Galicia de contar con EDIH DATAlife”.
Segundo dixo, un total de 722 hubs de toda Europa (92 de España)
optaron ao selo EDIH, e finalmente, só 12 en España recibirán o
financiamento europeo, entre os que se atopa DATAlife, o único con
sede na comunidade autónoma de Galicia.
Lucía
Castro, pola súa banda, explicou que o compromiso e respaldo de
Europa é un “estímulo” para cumprir uns “ambiciosos
obxectivos”. E engadiu: “Queremos implantar tecnoloxías
disruptivas en fase de validación e demostración con potencial para
aumentar a competitividade das empresas e a administración pública
galegas”, recalcou.
O
proxecto chegará a 300 pemes de Galicia, segundo destacou a xerente
de DATAlife, quen lembrou que incidirá en sectores estratéxicos
para a economía galega vinculados ás cadeas de valor da
biotecnoloxía, agro-mar alimentación, forestal-madeira e
saúde-coidados. “É necesario apoiar ás empresas, especialmente
ás pemes, para facilitar o seu coñecemento e adopción”,
explicou, engadindo que os servizos estarán recollidos nun catálogo
e serán gratuítos para as empresas. Entre eles incluirase o
asesoramento para a implantación de novas tecnoloxías, así como
probas de concepto de Intelixencia artificial (IA), Computación de
Altas Prestacións (HPC) e Internet das cousas (IoT). O proxecto
tamén mapea de continuo solucións e provedores dixitais dispoñíbeis
comercialmente para completar a oferta tecnolóxica.
O
encontro sobre a Presentación do Proxecto EDIH DATAlife, tras a
exposición de Lucía Castro, abordou os retos sectoriais e
dixitalización, no que participaron os representantes dos
agrupacións industriais socios de DATAlife. Acudiron Carme Pampín,
pola Agrupación industrial Tecnolóxico Empresarial das Ciencias da
Vida (Bioga); Ricardo González, por Agrupación Industrial da
Madeira e o Deseño de Galicia (CMD); Rocío Mosquera, pola
Agrupación industrial Saúde de Galicia (CSG); Santiago Cabaleiro,
pola Agrupación industrial da Acuicultura de Galicia (CETGA) e
Roberto C. Alonso, por ANFACO-CECOPESCA. Durante os próximos tres
anos, DIH DATAlife e os seus socios de proxecto, terán a misión de
facilitar a adopción destas novas tecnoloxías a través dese
catálogo de servizos e capacidades para pemes e tamén grandes
empresas e sector público de Galicia.
Outro
dos temas tratados no encontro organizado por DATAlife foi o acceso
ao financiamento e os fondos públicos e privados, un relatorio
ofrecido por Daniel Álvarez, de Bioga. Tras o descanso, a
subdirectora de Innovación e Programas Europeos de FEUGA, Carmen
Cotelo, abordou o bloque sobre Formación: Dixital Skills.
Posteriormente
foi a quenda doutra parte dos socios do Hub de Innovación Dixital,
que falaron sobre os servizos tecnolóxicos: casos de aplicación. O
director xeneral de Gradiant, Luís Pérez, foi o encargado da
introdución. Os exemplos de servizos foron detallados por Antonio
Rodríguez del Corral (Clúster TIC de Galicia); Sandra Rellán
(ANFACO-CECOPESCA); Gerardo Rodríguez (EnergyLab); Alicia López
(CETGA); Lois Orosa (CESGA); Lucía Camino (CETIM); Antía Fernández
(Gradiant); Félix Díaz (CiTIUS); Martín Llamas (AtlanTTic) e Laura
Simón (Televés). O catálogo de servizos do proxecto EDIH DATAlife
está baseado nas capacidades e facilidades dos seus membros,
deseñado para soportar todo proceso de innovación: desde a
detección de necesidades, a idea ou proba de concepto ata a
definición do modelo de negocio, probas piloto e apoio na procura
para o financiamento do proceso comercial.
Os
socios de DATAlife presentes no encontro destacaron que fomentarán a
creación de espazos de datos federados e a súa explotación
colaborativa. E, a través de diferentes actividades, o proxecto
recollerá as demandas formativas para mellorar as habilidades
dixitais e o uso de tecnoloxías disruptivas.
A
intención é converter o DIH DATAlife, xunto os seus socios, nun
“portelo único de servizos”, ofrecendo ás empresas acceso a
solucións dixitais avanzadas a través de infraestruturas para a
experimentación e validación de tecnoloxía.
A
directora da Axencia Galega de Innovación (GAIN), Patricia Argerey,
foi a encargada de clausurar o encontro.
DATAlife
Hub de Innovación Dixital, con sede en Santiago, nace para converter
Galicia en biorrexión de referencia en Europa a través da conexión,
coordinación e creación de sinerxías entre os axentes do
ecosistema de innovación e os sectores produtivos. DATAlife proponse
facilitar a incorporación da Intelixencia Artificial e a analítica
de datos nas pemes dos sectores ligados ás ciencias da vida.
Os
socios de DATAlife son cinco agrupacións industriais: Agrupación
Industrial Tecnolóxico Empresarial das Ciencias dá Vida (Bioga),
Agrupación Industrial da Acuicultura de Galicia (CETGA), Agrupación
Industrial da Madeira e do Deseño de Galicia (CMD), Agrupación
Industrial Saúde de Galicia (CSG) e Agrupación Industrial TIC
Galicia; cinco empresas tractoras: Grupo Zendal, FINSA, Televés,
Vodafone e Noso Capital; cinco centros tecnolóxicos: Energylab,
Gradiant, ANFACO-CECOPESCA; Centro de Supercomputación de Galicia
(CESGA) e Centro Tecnolóxico de Investigación Multisectorial
(CETIM) e o sistema universitario de Galicia: Universidade de
Santiago de Compostela, Universidade de Vigo e FEUGA.
Intervención de Patricia Argerey
A
directora da Axencia Galega de Innovación, Patricia Argerey,
participou na clausura da xornada, destacando que "o recoñecemento da Comisión Europea aos hubs de innovación dixital estratéxicos de Galicia respalda a aposta da Xunta por este novo instrumento que funciona como xanela única
para acompañar ás empresas nas súas necesidades de transformación
dixital".
A
directora de GAIN apuntou ademais que este recoñecemento supón "unha
dobre oportunidade para o ecosistema galega de innovación: por un
lado, reforzando o posicionamento internacional dos hubs estratéxicos
galegos avánzase na internacionalización da I+D+i galega e na
consolidación da Marca Galicia tamén no ámbito da I+D+i; e, por
outro lado, facilitando o acceso do tecido empresarial galego aos
recursos que precisen nos seus procesos de transformación dixital e,
polo tanto, contribuíndo así á competitividade da economía
galega".
Tamén dixo que a aposta da Xunta de Galicia polos hubs de innovación dixital, que
está aliñada coas estratexias a nivel europeo e español, mantense
na nova Estratexia de Especialización Intelixente de Galicia (RIS3),
que inclúe como unha das tres prioridades transversais da política
de I+D+i de Galicia, xunto á sustentabilidade e o enfoque cara ás
persoas, a dixitalización.