Comunicación e mocidade, a debate na Rede a partir do 15 de xaneiro
mércores, 3 de xaneiro do 2007
A relación da mocidade cos medios de
comunicación de masas foi un tema moi recorrido ó longo de todo 2006. Acabado
de estrear 2007, o Observatorio dos Medios do Colexio Profesional de Xornalistas
de Galicia (CXPG) quere reabrir o debate e fai un chamamento a toda a cidadanía
galega para participar no foro internacional sobre Comunicación e Xuventude que dará comezo o vindeiro 15 de xaneiro.
Esta xuntanza vai orientada a servir de marco para habilitar un diálogo “frutífero
e interdisciplinar” para afondar nas relacións entre o colectivo de mozos e mozas
cos medios informativos. Comunicación e
Xuventude comprende unha parte virtual, que se desenvolverá na web do
Observatorio (www.observatoriodosmedios.org)
e unha xornada presencial, que terá lugar no Centro Cultural Uxío Novoneyra de
Lugo o 22 de febreiro; ámbalas dúas serán de balde.
Debido a que existen poucos estudos que recollan unha visión globalizadora
deste eido de investigación, o foro internacional servirá para darlle outro
enfoque á investigación e abordar dende outras perspectivas a relación entre
mocidade e medios.
