Cerco na nosa terra ás liñas 905 de televisión

Perante as liñas 905 ligadas á televisión, empregadas por unha chea de cadeas e programas para enganar aos espectadores en concursos con premios inexistentes, estamos a día de hoxe practicamente desprotexidos. Así o entende a Consellería de Economía, que vén de anunciar que incrementará o control sobre estes números co obxectivo de defender os intereses dos consumidores galegos. As iniciativas ao respecto foron dadas a coñecer este luns pola directora xeral de Comercio, Nava Castro, e a xerente do Instituto Galego de Consumo, María Jesús Muñoz. Entre as medidas que se porán en marcha figura unha campaña de inspección sobre o uso destas liñas nas cadeas de TV, ás que se lles esixirá a aplicación da normativa en caso de que non se axusten a ela.
Amais disto, realizarase unha campaña informativa sobre os dereitos dos consumidores fronte a estas liñas, amais do fornecelos dunha serie de actividades de divulgación (obradoiros) inseridas no plan anual da Escola Galega de Consumo “co obxectivo último de incrementar o nivel de formación e información dos consumidores”.
Estas e outras medidas teñen o seu xermolo na actividade do Observatorio de Concursos e Premios, habilitado pola Consellería de Economía cun orzamento de 90.000 euros e dedicado á recollida de datos sobre este eido específico da práctica do xogo ligado á televisión, tarefa na que incluíu o estudo pormenorizado de case 900 programas. Este labor puxo de manifesto, entre outras cousas, que existen moitos atrancos para a correcta lectura da información legal nestes servizos, atrancos que van dende o menos sutil (letras borrosas, uso de abreviaturas de demais escamoteos de información) ata medidas un pouco máis sofisticadas. Amais disto, o Observatorio confirmou que perante estes concursos ligados a estes números o 69% dos consumidores non coñece os seus dereitos como usuarios destes servizos, e o 77% descoñece a posibilidade real de evitar conectar con estas liñas en función do seu contrato telefónico.