Aberto o período de votacións telemáticas para elixir a Palabra do Ano de 2021
martes, 14 de decembro do 2021
Como
cada ano, a nosa comunidade internauta está chamada a participar na
elección da que sería a palabra galega do ano: unha tarefa que ten
moito de facer balance dos acontecementos relevantes que vimos de
deixar atrás e, tamén (e non menos importante), de reivindicación
da nosa lingua nas redes. Novamente
a votación para dilucidar a Palabra do Ano 2021 levarase a cabo na
Rede, a través do Portal das Palabras, e novamente serán a Real
Academia Galega e a Fundación Barrié as encargadas de impulsar este
certame. Desta volta as candidatas son coada, gromo, resiliencia,
tanxugueiras e vacinódromo.
As
persoas que desexen participar na elección popular poderán facelo
ata as 23:59 horas do sábado 25 de decembro a través do Portal das
Palabras, o proxecto que impulsan as dúas institución para a
difusión do léxico galego.
Segundo
explican, a Palabra do Ano “trata de identificar aquilo que resuma
como se viviron colectivamente os últimos doce meses ou algún
aspecto que sobresaíse, para ben ou para mal, na actualidade máis
próxima ou global, en ocasións a través de neoloxismos e noutras a
través de voces presentes na lingua dende hai moito tempo”. É o
caso das cinco voces finalistas, que fan referencia, un ano máis, á
pandemia da COVID-19, pero tamén á actividade do volcán de La
Palma ou ao auxe da música tradicional galega, tal e como demostra a
presenza do vocábulo tanxugueira, que non figura no Dicionario
porque é en realidade un topónimo que fai referencia a un lugar con
moitos teixugos, amais de á agrupación formada por Olaia Maneiro,
Aida Tarrío e Sabela Maneiro.
Dende
2014 o Portal das Palabras convida ademais a todas as persoas que o
desexen a participar na escolla da Palabra do Ano. Nas edicións
anteriores foron elixidas nós (2020), sentidiño (2019)
deseucaliptización (2018), afouteza (2017), irmandade (2016)
—coincidindo co centenario das Irmandades da Fala—, refuxiado, -a
(2015) e corrupción (2014).