A tecnoloxía galega que facilita a localización e a interacción en congresos recibe o pulo definitivo
mércores, 26 de decembro do 2018
As
empresas galegas Balidea, Situm
e Nordesía veñen de
informar do remate dun proxecto conxunto destinado a achegarnos
tecnoloxía que converta feiras, congresos e eventos en
acontecementos seguros, doados de visitar, ben xestionados e onde
haxa unha comunicación total entre os asistentes. E todo isto coa
axuda dos dispositivos móbiles.
Estamos
a falar do proxecto TOURAL (siglas en galego para Tecnoloxías
Orientadas á Localización, Realidade Aumentada e Lincaxe para
feiras, recintos e eventos culturais). A iniciativa,
co-financiada pola axencia GAIN co apoio a Xunta de Galicia a través
do programa Conecta PEME, é unha proposta integral a prol da
interactividade. Neste caso concreto, a interactividade nun
acontecemento en maior ou menor multitudinario.
Esta
interacción, segundo informan Balidea e Situm, permite “pór en contacto aos
asistentes tanto entre si como cos organizadores dos eventos”,
amais de posibilitar a localización e o guiado dos asistentes dentro
e fóra do recinto onde se celebra o evento. A idea é complementar
todo isto con visitas ás casetas mediante o uso de tecnoloxías de
realidade aumentada.
O
proxecto serviu ademais como proba para a startup galega
S-REC, especializada no desenvolvemento dun sistema de recomendacións
de eventos e contactos profesionais.
TOURAL
está co-financiado pola Axencia Galega de Innovación (GAIN) e o
Fondo Europeo de Desenvolvemento Rexional (FEDER) da Unión Europea,
co apoio da Consellería de Economía, Emprego e Industria da Xunta
de Galicia, a través do programa Conecta PEME para fomentar a
cooperación entre a PEME e os demais axentes do sistema rexional de
innovación. Amais, tivo un orzamento de 862.390,17 euros.