A plataforma SPIP a debate hoxe nas Xornadas de Software Libre da USC

Ás 17:00 horas desta mesma tarde vai ter lugar na Facultade de Administración e Dirección de Empresas de Lugo, a cuarta sesión das I Xornadas de aplicacións web de software libre para asociacións empresariais que organiza a Aula TIC-Pemes da USC.
Desta volta, o tema da cuarta das sesións programadas centrarase nos portais web con SPIP e constará, de novo, dun relatorio de 45 minutos dirixido a directivos e xerentes de asociacións empresariais e dun obradoiro de dúas horas de Introdución no uso da plataforma web de xestión de contidos, para a creación de portais web, dirixido aos informáticos e persoal de administración das asociacións.
O relatorio virá da man do profesor Luis Gago González, quen exporá a súa experiencia en diferentes portais creados pola USC coa devandita plataforma e falará de Le Monde Diplomatique ou da Asociación Española de Usuarios de Internet, como exemplos significativos do seu uso.
O relatorio terá lugar na Aula 3 e a práctica na aula de informática número 1 da devandita Facultade; a asistencia a ámbolos dous actos será libre e de balde.