A libraría Biblos de Betanzos, recoñecida polo seu espírito innovador

Espírito innovador para renovar as nosas tendas e convertelas en referentes dixitais. Iso é o que procura o certame Comercio con talento, unha iniciativa impulsada pola Dirección Xeral de Comercio e Consumo cuxa máis recente edición resolveuse onte, outorgando os seus premios ao alumnado de formación profesional que mellores contribucións achegou en materia de renovación de establecementos. Un dos galardóns do concurso foi dar á libraría Biblos de Betanzos.
Con este certame, no que participou alumnado de ciclos formativos relacionados co comercio de toda Galicia, búscanse cousas como impulsar a participación e o contacto dos estudantes coa realidade do sector ou incrementar o coñecemento das novas tendencias do comercio, especialmente das novas tecnoloxías.
Para concorrer no concurso, o alumnado estudou o comercio da súa comarca para seleccionar finalmente un negocio de acordo a criterios como "o espazo físico, a xestión, o produto ou a atención ao cliente". Logo, os participantes elaboraron un proxecto sobre o comercio elixido.
Un xurado especializado escolleu os nove comercios “con máis talento” de entre os propostos e fixo unha preselección de cinco para ser escollidos no Facebook do Portal do Comerciante (polo que un dos 10 premios decídese polo número de gústame recibidos).
Os autores dos 10 proxectos gañadores reciben como premio un iPad Wi-Fi 32GB.
No caso do proxecto Biblos, foi proposto por José Ángel Varela, alumno do ciclo superior de Xestión de Vendas e Espazos Comerciais no IES Francisco Aguiar de Betanzos. Na súa proposta salientou a aposta deste negocio pola literatura en galego e castelán e tamén en inglés e portugués, ademais da súa oferta musical. Sinala ademais que para a promoción emprega sobre todo as redes sociais e a revista Biblos, ademais da edición dun boletín mensual. Tamén destacou que na libraría adoitan facerse presentacións de libros, actuacións musicais, exposicións de arte, de fotografía, ou coloquios.