A Ourense ICC Week celebrarase tamén en Ribadavia, A Rúa e Nogueira de Ramuín
luns, 19 de agosto do 2019
A
edición
2020 da Ourense ICC Week, a semana da creatividade innovadora de
Ourense, vaise desenvolver do 1 ao 5 de abril. Así o deron a
coñecer o presidente da Deputación, Manuel Baltar, o asesor de
Cultura da entidade provincial, Aurelio Gómez, e os coordinadores da
semana (Juan Rivas e Manuel Araújo), que tamén deron conta doutra
gran novidade deste ano: a celebración das actividades en Ribadavia,
A Rúa e Nogueira de Ramuín, amais de na propia cidade das Burgas. O
obxectivo é converter estes concellos en puntos referenciais de
encontro entre emprendedores, expertos e creativos.
Asemade,
aproveitaron para facer balance do acadado na anterior edición,
“todo un éxito de público e emprendementos”. Segundo fixeron
saber, a ICC Week de 2019 ofreceu aos participantes máis de 70 horas
de programación nunha decena de eidos de vangarda creativa,
aglutinando nun mesmo evento moda, actualidade, publicidade,
tendencias tecnolóxicas, videoxogos e espectáculos musicais, “que
converteron a Ourense no epicentro cultural de Galicia”,
explicaron, engadindo que a programación ocupou máis de 70 horas de
axenda en até oito espazos diferentes da capital de provincia.
En
total foron 23 citas na programación con 13 mesas de traballo con 25
relatores, 7 concertos de diferentes estilos e outras opcións de
ocio para os nenos, así como competicións de videoxogos e
espectáculos de humor.
Amais,
explicaron, a semana citou en Ourense a referentes de diversos
sectores creativos e culturais como Ágatha Ruiz de la Prada,
Purificación García, Adriana Domínguez, Iker Jiménez ou Kiko
Veneno.
Tamén
fixeron saber que foi lanzado ás redes un vídeo-resumo da
convocatoria anterior, un audiovisual destinado a demostrar que
Ourense é “unha provincia creativa e o escenario idóneo para que
flúan as últimas tendencias en escenarios cun inmenso valor
patrimonial e peso histórico”, dixo Manuel Baltar.