A Cámara da Coruña ofrece asesoramento ás empresas en proceso de transformación a través do Kit Dixital

A Cámara da Coruña, a través da Oficina Acelera Peme, ofrece asesoramento sobre o programa Kit Dixital que, impulsado polo Goberno de España a través de Red.es, ten como obxectivo “promover a dixitalización de pequenas empresas, micropemes e autónomos”, e “contribuír a modernizar o tecido produtivo español”. A Oficina, en funcionamento desde xullo de 2021, achega atención de balde e personalizada, facilitando os avances en dixitalización e axudando ás pemes fornecedoras de tecnoloxía a introducir os seus produtos e solucións no mercado.
A respecto do devandito, a Cámara fixo saber que no que vai de ano preto do 70% das empresas que foron asesoradas na Oficina Acelera Peme da Cámara solicitaron información específica do programa Kit Dixital, que ofrece axudas directas para a dixitalización ás empresas con menos de 50 empregados e aos autónomos. A contía do bono que recibirán as pemes varía entre os 2.000 e os 12.000 euros dependendo do tamaño da empresa e a solución dixital que se implante.
En canto aos sectores asociados ás consultas do programa destaca, en primeiro lugar, o da información e comunicacións con case un 35% dos asesoramentos neste ámbito. Séguelle o sector de actividades profesionais, científicas e técnicas, cun 12% das consultas; e os de comercio, educación, actividades financeiras e seguros, actividades administrativas e servizos auxiliares, entre outros.
As empresas que queiran optar a estas axudas deberán rexistrarse na páxina web específica do programa e completar un test de autodiagnóstico para coñecer o grao de madureza dixital. A partir de aí, a empresa terá que escoller as solucións dixitais que mellor se adapten ás necesidades do seu negocio, dentro dun catálogo que inclúe: sitio web e presenza en internet, comercio electrónico, xestión de redes sociais ou xestión de clientes, entre outros.
Por último, a empresa poderá pedir o seu bono dixital na sede electrónica de Red.es.
Os interesados en ampliar información poden acceder á web da Cámara da Coruña ou acudir á Oficina Acelera Peme, situada na sede da entidade. Tamén poden contactar a través do 981 216 072 ou ben escribindo a oap@camaracoruna.com.