Código Cero - Diario Tecnolóxico de Galicia

INEO organiza un curso sobre Xeración de novos modelos de negocio no sector TIC

Raquel Noya — 2012-05-16T12:29:02Z


A directora xeral de INEO, Lucía Gregorio, vai ser a encargada de impartir este curso, que consta de 5 sesións

Dende a asociación de empresas do sector TIC galego, INEO, afirman (con coñecemento de causa) que a actualidade demanda que as firmas do sector tecnolóxico estean preparadas para asumir cambios con rapidez, e coñezan as ferramentas e metodoloxías que lle permitan avaliar cando é o momento de levar a cabo modificacións, ou se o modelo de negocio que aplican é o máis correcto e axeitado a cada circunstancia.
Esta asociación, que dende a súa formación velou sempre por mellorar o rendemento das empresas TIC do país, sabe que este labor pasa por mellorar primeiro a capacitación de traballadores e empresarios tanto dende o punto de vista técnico como metodolóxico, algo que ten pensado levar a cabo no vindeiro curso formativo que vai celebrar en Vigo, e que impartirá a directora xeral de INEO, Lucía Gregorio.
Trátase dun Curso sobre Xeración de novos modelos de negocio para empresarios e traballadores do sector TIC, que se impartirá na sede de Ineo tódolos xoves do mes, entre as 18.00 e as 20:00 horas, e que dará comezo a partir do 24 de maio ata o 21 de xuño.
Tomando como referencia a metodoloxía do libro Xeración de modelos de negocio, de Alexander Osterwalder & Yves Pigneur, Lucía Gregorio achegará exemplos de metodoloxías que poden servirlle ás empresas “como base para analizar as súas estratexias de negocio actuais”, afirma, “o que lles permitirá crear novas maneiras de facer empresa para alcanzar e consolidar unha posición competitiva no mercado actual”, engade.
As sesións de formación están orientadas, sobre todo, a directores xerais e empresarios do sector TIC, así como a directivos de estratexia e CEOs.
O curso é de asistencia gratuíta para empresas socias de INEO e ten un custo de 120 €+ IVE para empresas non asociadas. As prazas son limitadas e a inscrición pode realizarse no teléfono 986 112 570 e a través do correo electrónico ineo@ineo.org.

Un buscador intelixente destapa as comisións e recargos ocultos dos voos

Raquel Noya — 2012-05-16T11:47:40Z

A firma catalá Trabber.com, con sede en Cornellà de Llobregat (Barcelona), vén de crear unha ferramenta de busca de voos na Rede, que ademais de dar co voo máis barato de entre todas as compañías operantes, trata de ofrecer o prezo final sen cargos de última hora nin comisións ocultas, é dicir, o prezo real dende o primeiro momento.
Sobra explicar os motivos que levaron a esta empresa a desenvolver tal buscador, pero o certo é que o usuario potencial atopará unha aplicación doada de usar, moi funcional e intuitiva, e sen contidos adicionais que despistan a súa atención da información que precisa.
Trabber.com fai rastrexos nun total de 86 webs entre aeroliñas, axencias de aluguer de coches e centrais hoteleiras, coa finalidade de dar coa mellor oferta, e co beneficio engadido de que dende o primeiro paso súmalle ao prezo total o prezo por maleta, os recargos por tarxeta de crédito, os gastos de xestión... de maneira que o usuario non perde o tempo con ofertas supostamente interesantes que logo resultan ser un timo, nin se fai ilusións con prezos moi reducidos e mesmo irrisorios as máis das veces.
Esta ferramenta virtual tamén permite que os usuarios creen as súas propias carpetas de prezos e ofertas, e mesmo que compartan opinións con outros usuarios da web; a maiores, como buscador intelixente que é, “aprende” das buscas que fai o usuario e optimiza os resultados en función das súas costumes e necesidades.
Por certo, que Trabber.com xa afirma ser “o primeiro buscar en incorporar a compañía Iberia Express”, que despois de tanta polémica comezou a operar o pasado 25 de marzo.
Trabber.com tamén lle permite ao internauta interactuar coa compañía a través de Twitter, pedindo ofertas para un voo concreto que o persoal contesta de xeito automatizado e ao instante. Para usar esta plataforma é necesario enviar un tweet a @trabber_ofertas.

O CESGA traballa no desenvolvemento de aulas de informática na nube

Raquel Noya — 2012-05-15T12:26:39Z

O CESGA, en colaboración cos departamentos de Electrónica e Computación, e Física de Partículas da USC, está a desenvolver un proxecto pioneiro para a reciclaxe de recursos computacionais que leva por nome Formiga Cloud, e que permite sacarlle máis partido aos ordenadores das aulas de informática, usándoos de xeito compartido por varios usuarios.
Para o desenvolvemento desta solución, baseada en tecnoloxía na nube, foi preciso empregar algoritmos de planificación avanzados que inclúen técnicas de intelixencia artificial, polo que a entidade máis preparada para facelo non podía ser outra que o Centro de Supercomputación de Galicia (CESGA), que conta coa máis avanzada tecnoloxía para o cálculo integral.
O director do proxecto Formiga Cloud, Javier Cacheiro López, xustifica o desenvolvemento do mesmo pola necesidade do “reaproveitamento” de recursos computacionais existentes en moitas institucións como universidades, institutos, colexios, academias e diversos organismos públicos, “que dispoñen de aulas informáticas nas que se acumulan unha gran cantidade de computadores” e que, “dada a situación economica presente, atopan difícil adquirir novas plataformas de computación”, asegura.
Formiga Cloud permite utilizar mellor recursos computacionais existentes nas aulas de informática, facilitando tanto a realización de probas como a realización de simulacións científicas, empregando equipos remotos.
O proxecto, que inicialmente só buscaba aproveitar os recursos infrautilizados para darlle aos investigadores máis capacidade de cálculo, permitirá ademáis o aproveitamento da infraestrutura cloud para a realización de cursos e outros menesteres.
Con esta plataforma, o profesor ten moita máis flexibilidade á hora de configurar os equipos e crear a contorna axeitada para impartir unha asignatura calquera. O sistema permite despregar ordenadores virtuais no que os e as estudantes poderán modificar a interfaz na que están a realizar o curso, “sen medo a afectar á configuración da aula”, aseguran.
A este ordenador virtual, previamente creado polo profesor, será posible conectarse remotamente, non só dende as aulas de informática ou onde se teñan os equipos, senón tamén dende os ordenadores personais do alumnado.
Do mesmo xeito, o alumnado pode levar nos seus dispositivos de almacenamento unha copia do ordenador virtual e traballar con el no seu propio equipo.
Formiga Cloud permitirá ademais que alumnos situados en aulas que contan con equipos modestos, poidan realizar as súas prácticas de xeito doado sobre máquinas remotas máis potentes, sen necesidade de ter que cambiarse fisicamente de aula, aumentando deste xeito a reutilización dos recursos.
Desta maneira, en palabras de Cacheiro López, “tratamos de acadar o máximo retorno dos investimentos feitos nas aulas de informática”.

Cálculo científico nas aulas de informática
Os investigadores tamén poderán empregar o Formiga Cloud para acelerar a realización de simulacións científicas na nube. Como exemplo deste uso apuntan o caso da USC que só ela dispón de máis de 1.800 ordenadores, os cales poderán usarse de modo compartido para cursos e para realizar simulacións.
O primeiro prototipo do proxecto Formiga Cloud xa está dispoñible na Rede.

Os Premios de Internet 2012 xa teñen finalistas

Raquel Noya — 2012-05-15T12:26:12Z


O senado español acollerá os actos centrais do Día Mundial de Internet

O xurado dos Premios de Internet 2012 vén de facer públicos os finalistas da XIV edición deste prestixioso galardón, que establece categorías de Mellor web, Mellor empresa, Mellor iniciativa e Mellor comunicador, así como un premio á Traxectoria persoal, un premio proposto pola Asociación de Usuarios de Internet, que este ano recaeu en Francisco de la Torre, pola súa contribución a “posicionar a Málaga como a cidade intelixente número un de España, a través da iniciativa Malaga Valley”, afirman.
De entre as 680 candidaturas presentadas, os internautas cos seus votos (máis de 45.790) e os votos do xurado, fixeron finalistas a Eroski Consumer, RTVE á carta e TripAdvisor, na categoría de Mellor Web; a eDreams, Groupalia e SociosInversores, na categoría de Mellor Empresa; a Alberto Burguillo, Enrique Rodal e Manuel Moreno como finalistas de Mellor Comunicador e á Mellor Iniciativa sen ánimo de lucro optan a Fundación Alzheimer, Masdestacados 060 e Saregune.
O Xurado está formado por un elenco de profesionais do mundo das TIC, membros do Comité de Impulso da Oficina Técnica do Día de Internet, que decidirán os gañadores de cada categoría e que o farán público o vindeiro xoves ás 12:30 horas, nun acto que será retransmitido vía streaming a través da canle do Senado, sede central dos actos de celebración deste Día.
Previamente ao acto de entrega destes Galardóns terá lugar o xa tradicional Debate Plenario, Internet para o emprego e o emprendemento, que versará sobre como utilizar a Rede para innovar, xerar emprego e facilitar o emprendemento; e no que a cidadanía poderá aportar as súas reflexións ou propostas, valorar as publicadas por outros e animar o debate nas redes sociais a través do Muro da #innovacion e de Twitter.

Creada unha práctica guía virtual para non perder ningún acto do Día de Internet

Raquel Noya — 2012-05-15T10:48:59Z


Mapa de eventos que achega a web Diadeinternet.org para ollar os actos que se celebran en todo o mundo nesta data

Con motivo do Día Mundial de Internet, que terá lugar dentro de dous días, estanse a organizar centos de eventos en todo o mundo, que van dende accións solidarias, ata cursos formativos, pasando por conferencias, concertos ou mesmo concursos, dos que a web oficial en España, DíadeInternet.org, da detallada conta a través dunha orixinal guía en liña.
A ferramenta é realmente práctica e permítenos aos internautas atopar de xeito doado os eventos ou actividades que mellor se adaptan ás nosas necesidades, ben por proximidade xeográfica, pola entidade que os organiza, por temática, ou polo tipo de público ao que van dirixidos os actos a celebrar en todo o mundo.
Porén hai que recoñecer que, aínda que sería ideal poder desprazarnos ata o punto do planeta no que se celebre un evento interesante para nos, non é algo que estea a altura de tódolos petos (e menos nos tempos que corren) polo que tamén nisto pensaron os creadores da guía en liña e dedicáronlle un apartado especial ás actividades que se retransmiten en directo pola Rede, indicando unha breve descrición, a entidade que a organiza e a ligazón á que hai que acceder para participar.
Países de fala hispana como Arxentina, Bolivia, Colombia, Chile, Ecuador, México, Venezuela, Uruguai, Perú ou, como non, España, decidiron retransmitir algúns dos seus eventos por Internet (un total de 63), para facer partícipes a tódolos internautas que desexen conectarse dende os seus ordenadores en calquera punto do planeta.
Aquí en España destaca a apertura das portas do Centro Demostrador de Fontes Abertas de Albacete, BILIB, a todo o público, para que poidamos gozar das máis modernas infraestruturas tecnolóxicas destinadas á demostración de produtos, contidos e servizos TIC sobre plataformas de software libre.
Tamén destaca a celebración dunha feira-taller sobre ferramentas de utilidade para mellorar as vendas por Internet, que vai dirixido a comerciantes e persoal de servizos e que retransmite a vasca Inguralde dende a súa web.
Pola súa banda, dende Gaudalinfo.es, Innycia Granada vai transmitir en directo a xornada Innovación social e Internet, coa que pecha dúas semanas de intenso traballo, conversa e aprendizaxe conectado entre os proxectos de innovación social activos na Rede.
Outro evento que se retransmitirá en directo pola Rede o vindeiro 17 de maio é o Debate Plenario: #innovacion en Internet para o emprego e o emprendemento, que se celebra no Senado español, sede dos actos centrais do Día Mundial de Internet.
A participación cidadá canalizouse a través do Muro da #innovacion e de Twitter, canles nas que calquera persoa pode aportar unha reflexión ou proposta concreta, valorar as publicadas e animar o debater nas redes sociais. Ademais, todo isto dende calquera dispostivo e en calquera formato.
Xa no noso país, a única proposta achegada para participar en liña é a que vén da man de Peruchela, que a partir das 00:00 do 17 de maio, vai promover e difundir públicamente o baile tradicional galego, que non ten moito que ver co Día de Internet ou co Día da Sociedade da Información e as Comunicacións, pero certo é que cada un coa súa conexión fai o que lle pete.
Aos devanditos actos hai que engadirlle concursos de videoxogos, de deseño, de fotografía, de blogs, de trivial… así como descontos que distintas entidades ofrecen nesta web para que nos aproveitemos deles con motivo deste día tan sinalado no noso país.

Os enxeñeiros informáticos, entre os menos afectados polo paro xuvenil, segundo un estudo

Raquel Noya — 2012-05-15T09:12:22Z


Enxeñeiro informático traballando a reo, visto na web trabajadorespublicos.es

O perfil do enxeñeiro en Tecnoloxías da Información e a Comunicación (TIC) “resiste mellor á crise en comparación con outros sectores”. Esta mensaxe esperanzadora para os milleiros de estudantes que se forman nas universidades españolas, é unha das conclusións ás que chegaron na Escola Universitaria Informática Tomás Cerdá, onde, baseándose na análise das saídas laborais do seu alumnado de Grao de Informática e Servizos, aseguran que “o 84% dos alumnos atopan traballo antes de rematar os seus estudos”.
Nesta EU Informática Tomás Cerdá, 8 de cada 10 mozos e mozas colócanse xa nas empresas onde realizaron as súas prácticas, e o resto, segundo indican, atopan emprego nun prazo aproximado de 30 días despois de graduarse; ben a través da súa bolsa de traballo ou ben a través doutras canles de acceso ao mercado laboral.
E é que segundo os últimos datos do Eurostat, os enxeñeiros informáticos están nunha situación privilexiada, cunha taxa de paro dun 7,65%, que contrasta chamativamente coa media estatal, situada no 50,5%.
En palabras de Manel Taboada, coordinador de formación de posgrao da EU Tomàs Cerdà, “o perfil dos enxeñeiros informáticos é un dos máis demandados polas empresas” e mesmo se estima que en 2020 “haberá un déficit de 12.000 enxeñeiros”.
A explicación vén dada porque os enxeñeiros informáticos lideran actualmente os negocios máis innovadores e caracterízanse, segundo Taboada, “por ser persoas con facilidade para a lóxica, a creatividade, o sentido da curiosidade, constancia e capacidada para atopar solucións prácticas”, o que lle facilita moito o labor de atopar traballo ou emprender un negocio.
Asemade, segundo o último estudo da Axencia para a Calidade do Sistema Universitario (ACU), os graduados universitarios en áreas técnicas son os que teñen unha maior correspondencia entre formaión e emprego desempeñado; son tamén os que contan con máis contratos fixos e a xornada completa; e son os que perciben maior soldo; de feito, “entre os exeñeiros hai máis dousmileuristas que mileuristas”, afirman orgullosos.

As persoas inscritas nas listaxes de técnicos sanitarios poden consultar a nota no seu expediente en liña

Raquel Noya — 2012-05-15T08:35:42Z


A directora de Recursos Humanos do SERGAS, Esperanza Fernández Lago, anunciaba a posta en marcha do Expediente-e único do profesional en xullo do pasado ano

O Diario Oficial de Galicia publica hoxe o anuncio polo que se da publicidade ás puntuacións e número de orde das listas de admitidos e excluídos en varias categorías profesionais do SERGAS.
Do mesmo xeito, as persoas que figuren nestas listas e desexen consultar o detalle da súa puntuación ou, de ser o caso, as causas de rexeitamento dalgún mérito, poden facelo a través da consulta en liña do seu expediente electrónico, posto a disposición dos interesados na Rede de xeito totalmente transparente.
Estas son, segundo afirman dende o organismo público, “as primeiras listas con baremación automática que se poden consultar en soporte electrónico” o que permitiu, por outra banda, reducir os prazos de publicación de listas nun 50%.
Dende o inicio do Expediente-e no mes de xullo de 2011 máis de 2 millóns de usuarios accederon a este sistema, creáronse 120.000 expedientes e rexistráronse cerca de 900.000 méritos relativos a experiencia, formación, actividade científica e investigadora, idiomas, etc. Tamén se realizaron 30.000 inscricións nos procesos de recursos humanos abertos.
O SERGAS anunciou que publicará en breve, mediante o mesmo sistema virtual, a listaxe de admitidos e admitidas de PSX, celadores e auxiliares administrativos, cuxo prazo de inscrición rematou o pasado 31 de xaneiro de 2012.

Próxima convocatoria
Asemade, as próximas listas a convocar serán médicos de familia e pediatras, coincidindo, segundo afirman, coa finalización dos MIR.
Xa no mes de maio, a entidade anuncia que publicará, a través da ferramenta electrónica, o concurso de traslados de facultativos especialistas.
A través deste expediente profesional único, todo o persoal que traballa no sistema sanitario público galego poderá ver a súa vida profesional, participar nos procesos e consultar os resultados.

O COETG celebra mañá un Foro Dixital sobre o papel das mulleres e as rapazas nas TIC

Raquel Noya — 2012-05-14T14:07:15Z

Atendendo ás premisas marcadas este ano pola UIT (Unión Internacional de Telecomunicacións) para celebrar o Día Mundial das Telecomunicacións e da Sociedade da Información 2012, o Colexio Oficial e a Asociación de Enxeñeiros de Telecomunicación de Galicia van celebrar, mañá martes 15 de maio, un Foro Dixital no Centro de Supercomputación de Galicia (CESGA), dedicado ao papel das mulleres e das rapazas nas TIC.
O acto, no que participa tamén a Escola de Enxeñería de Telecomunicación de Vigo, a Axencia para a Modernización Tecnolóxica de Galicia e a Consellería de Educación, será transmitido por Internet vía streaming para que poida ser seguido en directo por alumnas e alumnos de varios colexios galegos,
O programa deseñado polo COETG inclúe as palabras de benvida e agradecementos do decano da entidade, Ramón Bermúdez de Castro, así como a intervención da representante e vogal da Xunta Directiva do COETG/AETG Pilar Villaverde, que dará lectura ao Manifesto do COETG con motivo do Día Mundial.
A esta intervención súmase a da directora da EET, Edita de Lorenzo, a da directora da Axencia para a Modernización Tecnolóxica de Galicia, Mar Pereira, e a dun representante da Consellaría de Cultura, Educación e Ordenación Universitaria, que contestarán ás dúbidas que sobre o eido lle xurdan aos alumnos presentes por videoconferencia.
O evento ten previsto rematar ás 12:45 horas.

O simulador de compras do IGC, a disposición de consumidores, comerciantes e profesorado

Raquel Noya — 2012-05-14T12:54:00Z

A Escola Galega de Consumo, encargada de dar resposta ás demandas educativas da cidadanía e de informar aos profesionais das esixencias dos consumidores perante os novos mercados, deseñou recentemente un simulador de compras virtual que permite acceder de forma doada ás ferramentas para a compra por Internet, para comprender o seu funcionamento e adiviñar os usos e vantaxes que o comercio electrónico pode ter para a cidadanía.
Este simulador permite ademais traballar distintos aspectos de consumo, como o pagamento por Internet e outros relacionados cos dereitos dos consumidores, entre os que se atopan o etiquetado dos produtos, as vendas a distancia, a publicidade, a protección de datos e a realización de reclamacións.
Pois ben, grazas á colaboración do Instituto Galego de Consumo coa Rede de Centros para a Modernización e Inclusión Tecnolóxica de Galicia, os usuarios e usuarias das 98 aulas que hai espalladas pola Comunidade, van poder utilizar este simulador de compras e comprobar de primeira man as súas vantaxes.
Farano a través dun curso formativo sobre consumo e comercio electrónico que se celebrará nas distintas aulas CeMIT, e que vai dirixido de xeito especial a consumidores, comerciantes e profesorado.
Este simulador, único en toda España, xa foi demandado por moitas Comunidades Autónomas e entidades o que, en palabras dos seus responsables, “sitúa de novo a Galicia na vangarda no que se refire a formación e educación dos consumidores”.
A Escola de Consumo atendeu o ano pasado a mais de 1000 alumnos e con este programa pretende ampliar a súa oferta e achegarse de maneira importante á poboación galega.

Colaboración co voluntariado dixital
O protocolo de colaboración asinado hoxe entre a presidenta do Instituto Galego de Consumo, Nava Castro, e a directora da Axencia para a Modernización Tecnolóxica de Galicia, Mar Pereira, recolle tamén a integración do simulador de compras na carteira de servizos do programa de Voluntariado Dixital, que está a desenvolver a AMTEGA “para favorecer o uso das novas tecnoloxías por parte persoas maiores e persoas con discapacidade”, afirmaron.
O Instituto Galego de Consumo ofrecerá formación específica aos voluntarios do programa sobre os dereitos dos consumidores especialmente no eido do comercio electrónico para que poidan prestar o seu apoio nesta materia ao colectivos de maiores e persoas en risco de exclusión dixital.

A Rede CeMIT estrea unha actividade sobre televisión por Internet

Raquel Noya — 2012-05-14T11:21:27Z

As aulas CeMIT de vinte localidades galegas iniciaron hoxe unha actividade formativa sobre televisión en Internet, na que se darán a coñecer as ferramentas e técnicas máis empregadas na distribución de contidos audiovisuais na Rede e se analizarán os seus usos e vantaxes.
Esta actividade, de 15 horas de duración, xa ten rexistradas 156 persoas, que se reparten entre os Centros para a Modernización e Inclusión Tecnolóxica de Arzúa, Fisterra, Tui, Pontedeume, Vimianzo, Sarria, Ponteareas, A Cañiza, Carballiño, Celanova, A Estrada, Vilagarcía de Arousa, Santiago, Allariz, O Barco de Valdeorras, Ribeira, Narón, Ames, Cerdeda e As Pontes.
Os responsables da iniciativa explican que nalgunhas das aulas CeMIT empregarase o sistema de videocolaboración para o desenvolvemento desta actividade, unha tecnoloxía que, ademais de permitir a comunicación entre tódolos participantes en tempo real a través de imaxe e chat, permite compartir e controlar as aplicacións remotas.
Por outra banda, nas aulas tecnoloxicamente máis avanzadas (que conten con equipos audiovisuais e multimedia) empregarase o sistema de videoconferencia, que lle permitirá ás persoas usuarias asistir ás actividades en formato presencial e telepresencial.

Novos cursos formativos

O Programa de Dinamización desta última edición conta ademais con outras catro actividades de 15 horas de duración a desenvolver nos distintos Centros, que versan sobre deseño gráfico, retoque fotográfico, community manager e streaming de audio e vídeo; así como doutras dúas máis amplas, de máis de 40 horas cada unha, sobre produción audiovisual e creación multimedia.
As persoas interesadas poden informarse das datas de comezo de cada unha das actividades e reservar praza na aula CeMIT da súa localidade a través do 981 552 568 ou a da web da Rede CeMIT da Xunta de Galicia.

Presentado o Plan de Software Libre 2012, cun presuposto de 915.000 euros

Raquel Noya — 2012-05-14T07:48:34Z


A directora da Amtega, Mar Pereira, presentou o Plan de Software 2012

O actual Goberno galego “foi o primeiro en contar cunha estratexia clara en materia de software libre poñendo en marcha en 2010 o primeiro plan realizado en colaboración cos axentes do sector”, así o explicou a directora da Axencia para a Modernización Tecnolóxica de Galicia, Mar Pereira, durante a presentación do actual Plan de Software Libre 2012, que conta cun investimento de 915.000 euros para desenvolver actividades de promoción e uso do software libre entre a cidadanía galega.
Mediante este Plan levaranse a cabo máis de 120 actuacións dirixidas a impulsar o uso do software libre e código de fontes abertas (FLOSS) no sector empresarial, na sociedade en xeral e na Administración do país, esta última, por certo, xa conta co 94% dos ordenadores con software libre instalado e prevé chegar ao 100% este ano.
De novo, o Plan desenvólvese en colaboración coas asociacións galegas de usuarios de software libre (AGUSL), coas empresas do sector (AGASOL), coa Comisión Interuniversitaria de Galicia (que integra as tres universidades) e co Colexio Profesional de Enxeñaría Informática de Galicia, todas elas entidades que durante os últimos anos traballaron a reo por integrar as ferramentas abertas no día a día da sociedade galega, en tódolos seus eidos.
No mesmo acto de presentación, a AMTEGA aproveitou para facer balance das actuacións realizadas no 2011en torno ao software libre (que entre outras cousas lle permitiu á Xunta aforrar 2,5 millóns de euros), e asinou un convenio de colaboración entre a Asociación Galega de Empresas de Software Libre e o Centro Nacional de Referencia de Aplicación das TIC baseadas en Fontes Abertas CENATIC, a cuxo padroado pertence a Xunta desde o ano pasado.

Software de fontes abertas na Administración

Mar Pereira, destacou a aposta polo uso do software libre na Administración coa elaboración dun estudio que analizará o impacto, as necesidades formativas e a viabilidade da migración exclusivamente a ferramentas ofimáticas de software libre en todos os ordenadores dos empregados públicos da Xunta.
Este estudo é o paso previo necesario antes de poder elaborar un plan de migración e un avance no camiño iniciado en 2010 ao instalar en todos os novos ordenadores ferramentas ofimáticas de software libre en convivencia co software propietario.
Ademais, este ano porase en marcha, en colaboración con CENATIC, un procedemento para analizar de xeito previo á contratación dun produto ou desenvolvemento tecnolóxico, se existe unha solución libre que cubra as necesidades requiridas.

Difusión do Software libre entre a cidadanía

Un dos aspectos clave para o éxito das tecnoloxías FLOSS, en particular na vida diaria, é a formación para comprender os beneficios do seu uso, polo que o Goberno promoveu o pasado ano a formación de diversos sectores da sociedade galega e motivou ás persoas formadas a usar as fontes abertas no seu día a día.
En 2012 o plan continúa a senda iniciada no 2011 coa formación específica dos empregados públicos a través do plan Ofimático Galego; tamén estará presente na Rede CeMIT (onde máis de 1.300 ordenadores das 98 aulas teñen instalado o sistema operativo libre); continuará formando aos profesionais do sector TIC en software libre dentro do seu plan formativo con 16 cursos e preto de 1.000 sobre este tipo de aplicativos e volverá a convocar o Premio ao mellor Proxecto universitario de Fin de Carreira en colaboración coas empresas do sector.
A todo o anterior hai que sumarlle a celebración, en outubro deste ano, da III edición da Libre Software World Conference, un dos maiores eventos e difusión do software libre celebrados en España para empresas e profesionais, que terá lugar por primeira vez no noso país; así como as actuacións de difusión de solucións tecnolóxicas do Centro Demostrador TIC, que xa leva ofrecido unhas cuantas achegas en materia de software libre o pasado ano e seguirao facendo este ano.

Convenio Cenatic e Agasol

Como apuntamos anteriormente, durante a presentación do Plan Floss, asinouse un convenio entre a Fundación CENATIC e a Asociación de Empresas Galegas de Software Libre, mediante o cal se asesorará ao sector tecnolóxico de Galicia sobre os aspectos xurídicos, tecnolóxicos e metodolóxicos máis axeitados para a liberación de software e coñecemento, así como para o desenvolvemento de negocio baseado en software libre.
Segundo afirmaron os seus responsable, este coñecemento contribuirá, xunto á calidade das propias empresas galegas, “a seguir crecendo e consolidándose como axentes fundamentais no ámbito local do cambio que se está a producir nos sistemas tecnolóxicos da Administración”.