Código Cero - Diario Tecnolóxico de Galicia

O Departamento de Xustiza dos EE.UU. avala a fusión entre Paramount Skydance e Warner Bros. Discovery

Redacción — 2026-06-12T21:00:00Z

O Departamento de Xustiza dos Estados Unidos pechou a súa investigación sobre a adquisición de Warner Bros. Discovery (WBD) por parte de Paramount Skydance sen presentar obxeccións, ao concluír que a operación non prexudicará a competencia nin aos consumidores estadounidenses. A decisión chega tras unha investigación de oito meses na que se analizaron máis de dous millóns de documentos e abundante información achegada tanto polas empresas implicadas como por terceiros do sector audiovisual.
O organismo antimonopolio examinou o impacto da operación en tres ámbitos principais: os servizos de vídeo baixo demanda por subscrición, a televisión lineal tradicional e a produción e distribución cinematográfica para salas. A conclusión foi que a integración das dúas compañías non reducirá a competencia en ningún destes mercados e mesmo podería reforzala.
A análise produciuse despois dun proceso de ofertas rivais para adquirir Warner Bros. Discovery. En decembro de 2025, Netflix alcanzara un acordo para facerse coa compañía, pero posteriormente Paramount presentou unha oferta pública de adquisición en efectivo. O Departamento de Xustiza revisou ambas as propostas e considera que esta competencia entre potenciais compradores achegou información valiosa para avaliar o futuro do sector.
No mercado do streaming, os investigadores concluíron que a entidade resultante terá unha posición significativamente inferior á dos líderes actuais. Segundo o informe, Paramount+ e os servizos HBO Max e Discovery+ contan cunha base de subscritores menor que a dos tres maiores operadores do sector. A integración permitiría crear unha oferta máis sólida capaz de exercer maior presión competitiva fronte ás plataformas dominantes.
Tamén se estudou a posibilidade de que o novo grupo optase por reservar en exclusiva os seus contidos e propiedades intelectuais para as súas propias plataformas. Porén, a investigación sinala que ambas as empresas manteñen historicamente unha ampla política de licenzas e non atopou indicios de que esa estratexia vaia cambiar tras a fusión.
A avaliación da televisión lineal estivo marcada polo continuo descenso do consumo de paquetes tradicionais de cable e satélite. O regulador destaca que a migración cara ao streaming reduciu os ingresos das cadeas convencionais e incrementou a competencia polos dereitos de retransmisión en directo, especialmente deportivos e informativos. Neste escenario, conclúe que a operación non diminúe a competencia existente.
A produción cinematográfica foi outro dos aspectos analizados. O Departamento de Xustiza considera que a competencia segue sendo intensa grazas á presenza de grandes estudios tradicionais como Disney, Sony, Universal, Lionsgate ou MGM, así como á crecente relevancia de empresas independentes como A24, NEON e Blumhouse. Tamén subliña a entrada de actores tecnolóxicos como Netflix e Apple na distribución para salas.
O organismo tamén examinou as preocupacións expresadas por algúns competidores e representantes do sector audiovisual, incluíndo posibles efectos negativos sobre o emprego creativo. A investigación concluíu que non existen probas suficientes para prever unha redución da produción de contidos e, en consecuencia, tampouco unha diminución significativa da demanda de traballadores vinculados á industria.
O Departamento de Xustiza sostén que a industria do cine e da televisión atravesa unha etapa de forte transformación e considera que a adquisición de Warner Bros. Discovery por Paramount Skydance pode contribuír a incrementar a competencia fronte aos maiores actores do mercado audiovisual estadounidense.

A Noite do CPEIG defende o papel transformador da Enxeñaría Informática

S. P. — 2026-06-12T21:00:00Z

O Colexio de Enxeñaría en Informática de Galicia (CPEIG) celebrou a súa 18ª Noite da Enxeñaría en Informática de Galicia. Fíxoo cunha cea de gala no Hotel OCA Puerta del Camino en Santiago na que se entregaron os premios anuais da profesión. Asistiron máis de 500 convidados ao evento TIC referente de Galicia, entre representantes do ámbito empresarial, da Administración Pública, do eido universitario e profesionais do sector tecnolóxico.
Foron 14 as distincións anuais que se entregaron na gala, premios que corresponden a diversas categorías onde os colexiados/as recoñecen as iniciativas ou persoas destacadas no ámbito da enxeñaría en informática.
O presidente do CPEIG, Fernando Suárez, realizou unha reflexión sobre o impacto da intelixencia artificial, “unha ferramenta tecnolóxica de poder” capaz de influír no que vemos, no que lemos, nas oportunidades que recibimos, nas decisión que tomamos e, en definitiva, na forma na que entendemos o mundo. “Os algoritmos, os datos e as infraestruturas dixitais non son unicamente cuestións técnicas. Son tamén cuestións de xustiza, de liberdade e de futuro”, sinalou no seu discurso inaugural.
Facendo referencia a un paradoxo da IA coa obra Cien años de soledad de García Márquez e a unha metáfora dos baobab no libro de El Principito, Fernando Suárez explicou que as corporacións actuais son capaces de concentrar unha cantidade de datos, de coñecemento, de capacidade de influencia e de poder económico nunca antes vista na historia da humanidade. “A soberanía tecnolóxica de Europa, de España e de Galicia non dependerá unicamente das máquinas. Dependerá das persoas, do talento, da nosa capacidade para formar profesionais, crear empresas innovadoras, xerar coñecemento e construír tecnoloxía propia. O esencial desta profesión non son os ordenadores, son as persoas”, asegurou.
Neste 2026 a Enxeñaría Informática en España cumpre cincuenta anos, e o presidente do CPEIG destacou o seu papel protagonista como transformador das administracións, empresas, universidades e fogares, medio século construíndo silenciosamente o mundo dixital no que vivimos como profesión esencial para garantir a soberanía dixital. “Temos que seguir defendendo, con firmeza e con responsabilidade, o recoñecemento que a nosa profesión merece pola sociedade á que servimos. A Noite da Enxeñaría en Informática non celebra unicamente proxectos, empresas ou traxectorias profesionais, celebra unha comunidade formada por miles de profesionais que, desde lugares moi distintos, traballan cada día para construír un futuro mellor”, indicou.
Esta décimo oitava edición contou coa presenza do delegado do Goberno en Galicia, Pedro Blanco; o conselleiro de Facenda e Administración Pública da Xunta de Galicia, Miguel Corgos; o conselleiro de Educación, Ciencia, Universidades e Formación Profesional da Xunta de Galicia, Román Rodríguez; o director da Axencia para Modernización Tecnolóxica de Galicia, Damián Rey; a deputada provincial da área de Sectores Produtivos da Deputación da Coruña, Cristina Capelán; o alcalde de Ames, Blas García; a reitora da Universidade de Santiago (USC), Rosa Crujeiras; e a vicerreitora de Estudantes e Empregabilidade da Universidade da Coruña (UDC), María José Lombardía; así como outras personalidades e representantes do sector TIC galego que exercerán como patrocinadores do evento e as colexiadas e colexiados do CPEIG.
A gala estivo conducida polo xornalista deportivo e presentador da TVG, Terio Carrera. Como artista invitado, o evento contou este ano coa actuación do afamado ilusionista e mentalista Jorge Luengo, ademais doutras sorpresas, como un flash mob, unha parodia de Bad Bunny ou unha espectacular actuación dunha violinista cun violín LED-láser.

Galicia reforza a súa aposta pola tecnoloxía e o talento dixital

Durante a gala interviñeron tamén os conselleiros de Facenda e Administración Pública, Miguel Corgos, e de Educación, Ciencia, Universidades e FP, Román Rodríguez. O primeiro destacou a aposta da Xunta pola tecnoloxía como ferramenta de cohesión territorial e lembrou que a Estratexia Galicia Dixital 2030 mobiliza máis de 2.450 millóns de euros en ámbitos de alto impacto como a intelixencia artificial, a internet das cousas e a xestión intelixente do dato.
Miguel Corgos puxo o foco tamén na capacidade de Galicia para atraer e reter talento dixital. Salientou que as titulacións STEM (ciencias, tecnoloxía, enxeñaría e matemáticas) presentan na comunidade unha taxa de ocupación superior ao 92 % durante os dous primeiros anos tras rematar os estudos. Segundo indicou, Galicia conta xa con máis de 3.100 empresas TIC, que empregan preto de 23.500 profesionais, máis do 40 % deles con alta cualificación.
O titular de Facenda e Administración Pública lembrou ademais que a comunidade conseguiu atraer a sede da Axencia Estatal de Supervisión da Intelixencia Artificial (AESIA), un fito que reforza o seu posicionamento no ámbito da gobernanza da IA. Citou tamén iniciativas como a Cidade das TIC e o Programa Galego de IA, estruturado arredor de catro eixes: a construción dunha rexión intelixente, a formación en competencias de intelixencia artificial ao longo da vida, a adopción estratéxica desta tecnoloxía e o impulso da I+D+i orientada ás necesidades da economía galega.
Corgos reivindicou igualmente o papel pioneiro da creación da AMTEGA como organismo encargado de coordinar o desenvolvemento tecnolóxico da Administración autonómica. Durante a velada participou na entrega do pin de prata do CPEIG a José Baliño, director xeral de IT, Información, Procesos e Operación de ABANCA e gañador do Premio Especial CPEIG.

Recoñecemento ás políticas galegas de educación, ciencia e innovación

A Noite da Enxeñaría en Informática serviu tamén para entregar á Xunta o Premio Impulso Dixital de Galicia, unha distinción que recolleu o conselleiro de Educación, Ciencia, Universidades e FP, Román Rodríguez. O xurado recoñeceu o «liderado estratéxico na construción dunha Galicia máis innovadora, dixital e preparada para afrontar os retos do futuro».
Entre as iniciativas destacadas figura a futura Lei de Educación Dixital de Galicia, chamada a converterse na primeira norma autonómica destas características, así como o Plan Integral de Benestar Dixital, orientado a promover un uso responsable, saudable e equilibrado da tecnoloxía.

Os galardóns da Noite

Premio Iniciativa Emprendedora
O recoñecemento foi para Startup Galicia, a asociación de emprendedores máis grande de Galicia que suma 130 socios que pertencen ao ecosistema e representan a preto de 200 startups.
Premio Ada Byron, dirixido a mulleres enxeñeiras en Informática
A doutora en Informática Virginia Mato, codirectora da Cátedra Aldaba-WIB da UDC e UVigo para impulsar iniciativas que contribúan a dar visibilidade ás mulleres no mundo das TIC, recibe este galardón por ser un “referente próximo e necesario”, cunha traxectoria que demostra que as mulleres poden alcanzar o éxito na profesión.
Premio Traxectoria Profesional
O galardón concédese, a título póstumo, á doutora en Informática Paula Montoto. A pontevedresa traballou durante 25 anos como analista informática na compañía Denodo, nacida na Coruña e líder mundial en virtualización de datos, ademais de ser profesora na Universidade da Coruña.
Premio Especial CPEIG-En memoria de Hernán Vila
José Valiño, director xeral de IT, Información, Procesos e Operacións de ABANCA, e José Manuel García Oya, socio director de Plexus Tech, reciben este recoñecemento pola súa contribución decisiva ao desenvolvemento e consolidación do ecosistema tecnolóxico galego.
Premio Iniciativa Empresarial
O recoñecemento foi para Sparc Foundry, a primeira empresa española, con sede en Vigo, dedicada á fabricación de semicondutores de última xeración, Premio Iniciativa Empresarial do CPEIG. Ten en marcha as obras da súa planta no Parque Tecnolóxico e Loxístico de Vigo, e prevé que estea operativa a finais de 2027 para cubrir a crecente demanda de dispositivos fotónicos nas telecomunicacións, automoción, IA ou no sector aeroespacial.
Premio Innovación Tecnolóxica no Ensino
O recoñecemento recaeu en Loomi, plataforma web pedagóxica, creada por tres mozos estudantes da Universidade de Vigo –Anxo Lameiro, Marcos Martínez e Alejandro Sirvent–, para a personalización da docencia a nivel de infantil e de primaria con IA, co obxecto de que o profesorado poida transformar contidos curriculares en historias ilustradas e personalizadas en cuestión de segundos.
Premio Obxectivos de Desenvolvemento Sostible (ODS)
O premio recoñece á Cátedra INDITEX-UDC de IA en Algoritmos Verdes, iniciativa público-privada que promove a investigación, innovación e transferencia de coñecemento, difusión e divulgación da IA e os algoritmos verdes coa fin de contribuír ao desenvolvemento sostible e a protección do medio ambiente.
Premio Iniciativa da Administración
A distinción foi para a Gerencia de Informática da Seguridad Social pola súa plataforma corporativa de atención ao cidadán. O proxecto, chamado ISAC (Infraestructura de Soporte de Atención al Ciudadano), é unha iniciativa clave na evolución do modelo de atención á cidadanía da Seguridad Social.
Premio e-Inclusión
O recoñecemento recaeu en OdiseIA, Observatorio del Impacto Social y Ético de la IA, por velar polo uso ético e responsable da intelixencia artificial. A organización, fundada en 2019, creou hai pouco a Fundación OdiseIA4Good para impulsar a IA ao servizo do ben común.
Premio Colaboración Interadministrativa
O Concello de Ames recibe esta distinción por impulsar a cooperación institucional como “ferramenta real de transformación económica e social”, consolidándose como “un dos municipios máis dinámicos de Galicia en materia de innovación, emprendemento e desenvolvemento tecnolóxico” con iniciativas como a xornada InnovAmes e a atracción de empresas tecnolóxicas, innovadoras e de base dixital ao seu entorno.
Premio Colexiada/o de Honra
Ramón López de Mántaras, pioneiro da intelixencia artificial en España e Europa, é o novo Premio Colexiado de Honra do CPEIG. O fundador do Instituto de Investigación en Inteligencia Artificial do CSIC recibe esta distinción “polo seu compromiso cunha visión ética, humanista e responsable da tecnoloxía”.
Premio Traballo Fin de Máster
O enxeñeiro informático David Zambrana, da Universidade da Coruña, gaña este recoñecemento polo seu proxecto dunha plataforma, chamada ShoppyEye, orientada a democratizar a observabilidade técnica e de negocio no comercio electrónico para pequenas e medianas empresas. Os finalistas, tamén da UDC, foron Alejandro Esteban, por un traballo sobre a seguridade nas redes informáticas actuais a través da integración de técnicas de IA, e Adrián López, polo deseño dun sistema de apoio á selección de participantes en ensaios clínicos no marco do proxecto iTrial do SERGAS.
Premio 18º Aniversario CPEIG-A Noite
O recoñecemento recaeu nas empresas Dell Technologies, DXC Technology e Taisa polo seu compromiso e apoio continuado ao evento durante máis de dez anos, ademais do seu respaldo sostido á profesión e ao ecosistema TIC galego, e a súa aposta pola innovación, o talento e a colaboración entre empresas, institucións e profesionais.
Premio Impulso Dixital Galicia
A distinción recoñece á Consellería de Educación, Ciencia, Universidades e Formación Profesional da Xunta de Galicia polo seu liderado estratéxico na construción dunha Galicia más innovadora, dixital e preparada para enfrontar os retos do futuro, con iniciativas pioneiras en España, como o Plan integral de benestar dixital, a futura Lei de Educación Dixital de Galicia ou a posta en marcha da primeira Fábrica de Intelixencia Artificial aplicada á saúde en España.

Vídeo da gala

O CESGA incorporará un segundo computador cuántico enfocado a formación e simulacións

S. P. — 2026-06-12T20:00:00Z

O Centro de Supercomputación de Galicia (CESGA) acolleu hoxe a presentación dos resultados dos seus novos equipamentos: un segundo computador cuántico, denominado IQM Spark, que se suma aos equipos xa anunciados nos últimos meses. Na cita participaron o conselleiro de Educación, Román Rodríguez, o subdelegado do Goberno na Coruña, Julio Abalde, e a directora da Axencia Galega de Innovación, Carmen Cotelo.
Tanto o supercomputador como os dous novos computadores cuánticos situarán a nosa Comunidade na vangarda europea en canto a capacidade de almacenamento de datos e participación en grandes proxectos internacionais, sinalaron.
Os computadores cuánticos son adquiridos a través de Telefónica. Deles, o computador cuántico de menor capacidade (5 cúbits), dedicarase exclusivamente a tarefas de formación, probas de concepto e de algoritmia, complementando así ao de maior capacidade (54 cúbits), que será “o buque insignia”, segundo dixo o conselleiro, engadindo que “esta separación técnica permitirá que o maior se dedique á produción científica e industrial, mentres que o do menor tamaño servirá como banco de probas para desenvolver a capacidade técnica necesaria neste campo emerxente e validar así novos desenvolvementos antes do seu escalado”.
Pola súa banda, o novo supercomputador Finisterrae IV, adxudicado a Fsas Tecnchonologies (Fujitsu) e que multiplicará por sete a capacidade de cálculo do actual (Finisterrae III), representa un salto tecnolóxico ao integrar a supercomputación coas posibilidades que abre o uso da intelixencia artificial a gran escala. Ademais, o sistema de almacenamento suporá máis do dobre que o actual e tamén experimentará unha mellora técnica notable, adoptando unha arquitectura xerarquizada que garanta un acceso eficiente e sostido aos datos. O sistema foi deseñado cunha forte énfase na eficiencia enerxética, empregando tecnoloxías de refrixeración líquida para soportar os fluxos de datos intensivos da computación científica actual. En conxunto, esta tecnoloxía contribuirá aínda máis a reforzar a capacidade da nosa I+G+i.
Román Rodríguez debullou as posibilidades de futuro que se abren co reforzo do CESGA desde varias perspectivas, e destacou “o bo momento que está a vivir a ciencia e a innovación feitas na Galicia Calidade”, algo que atribuíu ao traballo conxunto de administracións, universidades, centros de investigación, centros tecnolóxicos e empresas.
Engadiu que co novo CESGA, a comunidade investigadora galega e do resto de España e Europa poderá acceder a recursos de cálculo avanzados e procesadores cuánticos, establecendo un ecosistema de datos de alto rendemento adaptado ás demandas e á complexidade dos retos científicos actuais e, especialmente, os que virán da man da nova Factoría Europea de IA 1HealthAI, outro dos fitos acadados recentemente pola I+G+i.
“O CESGA está en pleno proceso de renovación das súas infraestruturas”, subliñou o conselleiro, unha operación complexa cun investimento total de 56 millóns de euros procedentes de fondos europeos do PERTE Chip (Proxecto Estratéxico para a Recuperación e Transformación Económica de Microelectrónica e Semicondutores en España no marco do Plan de Recuperación, Transformación e Resiliencia) e fondos propios da Xunta. “É unha aposta decidida por reforzar o seu papel logo de décadas de traballo ao máis alto nivel“, expresou o conselleiro, que animou aos asistentes “a continuar esta camiño de progreso”.
Julio Abandel enxalza a transformación do CESGA
Pola súa banda, Julio Abalde destacou que a transformación experimentada polo CESGA nos últimos anos constitúe “un dos mellores exemplos de como a colaboración institucional e o investimento público permiten construír capacidades estratéxicas para o desenvolvemento científico, tecnolóxico e económico do país”.
O subdelegado subliñou que “o Goberno de España mantén un compromiso firme coa ciencia, a innovación e a transformación dixital, unha aposta que se traduce en investimentos concretos para reforzar infraestruturas de excelencia como o CESGA”. Neste sentido, lembrou que un dos principais instrumentos de apoio foi o PERTE Chip, unha iniciativa estratéxica para reforzar as capacidades tecnolóxicas e industriais do noso país. A través deste programa, o Ministerio de Ciencia, Innovación e Universidades destinou 71 millóns de euros para fortalecer os centros de supercomputación e as infraestruturas de micro e nanofabricación. Máis de 63 millóns de euros foron asignados á Rede Española de Supercomputación, e o CESGA obtivo 47 millóns de euros, “convertendo a Galicia na principal beneficiaria desta convocatoria”, destacou Abalde, engadindo que “estamos ante unha aposta histórica que permite renovar instalacións e incorporar novos equipamentos”.
O subdelegado incidiu en que o CESGA está a vivir unha das etapas máis relevantes da súa historia grazas á incorporación de novas capacidades de supercomputación, almacenamento de datos e computación cuántica, que permitirán ofrecer máis recursos á comunidade científica, ás universidades, aos centros tecnolóxicos e ao tecido empresarial.
Intelixencia artificial
Durante a súa intervención, Julio Abalde puxo tamén en valor a elección do CESGA como sede da European One-Health AI Factory, unha iniciativa estratéxica que sitúa a Galicia e a España na vangarda europea da intelixencia artificial aplicada á saúde, á biotecnoloxía e ao medio ambiente.
O proxecto conta cun investimento total de 82 millóns de euros, dos que 24 millóns son achegados polo Goberno de España a través do Plan de Recuperación, Transformación e Resiliencia e do Ministerio de Ciencia, Innovación e Universidades, 17 pola Xunta de Galicia e os 41 millóns restantes pola Empresa Común Europea de Computación de Alto Rendemento (EuroHPC JU) -unha iniciativa conxunta entre a UE, países e socios privados.
“O Goberno de España está a apoiar proxectos estratéxicos que nacen desde Galicia e que teñen unha dimensión europea. A European One-Health AI Factory é un magnífico exemplo desta aposta”, afirmou. Abalde lembrou que España é un dos tres únicos países da Unión Europea que conta con dúas fábricas de intelixencia artificial aprobadas pola Comisión Europea, unha delas liderada desde Galicia a través do CESGA.

A saída a Bolsa de SpaceX converte a Musk no primeiro billonario da historia

Redacción — 2026-06-12T19:26:29Z

: Parodia xerada con IA

A fortuna de Elon Musk alcanzou por primeira vez o billón de dólares, converténdoo na primeira persoa da historia en superar ese limiar patrimonial como consecuencia da suba das accións de SpaceX poucas horas despois da súa estrea na Bolsa (considerada a meirande saída a Bolsa da historia). Segundo unha análise de Bloomberg, o patrimonio do empresario de 54 anos duplica xa a suma das fortunas de Jeff Bezos e Bernard Arnault, que hai apenas dous anos disputaban con el o posto de persoa máis rica do mundo.
A meirande parte desta riqueza non está dispoñible en efectivo, senón vinculada ás participacións de Musk en empresas como Tesla e SpaceX. A venda dunha parte significativa destes activos podería afectar gravemente á súa valoración bolsista, polo que a súa capacidade de gasto real é moito máis limitada do que suxire a cifra total do seu patrimonio.
SpaceX foi o principal motor do crecemento recente da fortuna do empresario. Os seus activos superan en máis de 200.000 millóns de dólares todo o gasto acumulado pola NASA desde a súa creación en 1958.
A documentación da saída a bolsa de SpaceX contempla incentivos adicionais vinculados a obxectivos extraordinariamente ambiciosos, entre eles a creación dunha colonia humana permanente en Marte con polo menos un millón de habitantes.
De cumprirse esas metas, o paquete de compensación previsto para Musk podería engadir ata 760.000 millóns de dólares adicionais á súa fortuna, ampliando aínda máis unha diferenza patrimonial que xa non ten precedentes na historia moderna.

A Deputación de Ourense expón o seu modelo de xestión turística intelixente no Congreso CitiGal

S. P. — 2026-06-12T16:51:17Z

A Deputación de Ourense mostra o seu modelo de xestión turística intelixente no Congreso CitiGal 2026 a través da presentación do director da área de Transparencia e Goberno Aberto, Marcos Valiño, que explicou os detalles do modelo de Destino Turístico Intelixente (DTI) da institución, así como a súa culminación ao integrarse na Plataforma Intelixente de Destino da man de SEGITUR.
Cun relatorio titulado A xestión turística a nivel provincial, Ourense como exemplo, Marcos Valiño presentou a folla de ruta que transformou á provincia de Ourense no que nas súas palabras “é un modelo de gobernanza pública e dixitalización a nivel nacional”.
Un dos puntos clave da xornada foi a defensa da escala provincial na xestión do turismo. “En territorios cunha oferta diversa e dispersa, a acción provincial ha de basearse en conectar municipios que de forma illada non terían os recursos para competir”, explicou Marcos Valiño.
Así mesmo incidiu en que a transformación de Ourense comezou en 2019 coa adhesión ao Plan Nacional de Territorios Intelixentes e o convenio entre a Deputación e Red.es. “Desde entón”, dixo, “o destino superou con éxito varias fases ata chegar á integración na Plataforma Intelixente de Destinos a día de hoxe”.
Tamén fixo referencia a que a tecnoloxía debe estar ao servizo da identidade, destacando que a provincia de Ourense vinculou a súa estratexia dixital ao seu principal baluarte: o turismo termal.
Finalmente, o director da área de Transparencia e Goberno Aberto destacou o salto cualitativo que se pretende alcanzar co proxecto Ourense Preto De TI, sendo un importante salto do modelo ao integrar os recursos da provincia no nodo central da Plataforma Intelixente de Destinos. Esta integración, engadiu, “permite o paso definitivo da xestión turística tradicional a un ecosistema común de intelixencia competitiva sustentado en tres piares: o dato, os servizos e a gobernanza dixital”.
Como conclusión, Marcos Valiño expuxo o que denominou “a gran lección do caso Ourense”, onde a estratexia sempre precede á tecnoloxía. A xestión turística provincial non debe empezar cunha plataforma dixital, senón cunha visión clara de territorio construída ao longo do tempo.

O Colexio Fogar Afundación, entre os catro finalistas da Olimpíada Nacional de Telecomunicacións

S. P. — 2026-06-12T12:04:41Z

Anxo Amoedo e Nikolas Antón, estudantes no Colexio Fogar Afundación do ciclo de Instalacións eléctricas e automáticas e Alejandro Requeijo do ciclo de Mantemento electrónico competirán o vindeiro venres 3 de xullo na final da IV Olimpiada Nacional de Telecomunicacións, Teleco Games 2026.
O seu proxecto, un bastón intelixente deseñado para contribuír á autonomía e seguridade das persoas maiores con dificultades de mobilidade ou de visión, que resultou gañador da fase autonómica na categoría de ciclos formativos de FP, foi seleccionado entre os catro mellores de España tras competir na fase nacional.
O prototipo incorpora un sistema de detección de caídas que analiza o movemento e actúa automaticamente en caso de risco, chamando aos servizos de emerxencia e activando a localización. Tamén conta cun sistema de detección de obstáculos mediante sensores, que advirte á persoa usuaria con vibracións progresivas e mensaxes de voz. Ademais, o bastón interactúa realizando preguntas en situacións de risco ou comunicándose en calquera momento co contacto de emerxencia da persoa usuaria.
Os Teleco Games, nos que participan en Galicia empresas tecnolóxicas de referencia como Indra, BorgWarner, Televés e Oesia, teñen como obxectivo espertar nos estudantes vocacións no ámbito da tecnoloxía e a innovación.
O Centro de Formación Profesional Colexio Fogar Afundación de Vigo é un centro de referencia na formación de profesionais e na súa inserción laboral que busca formar estudantes competentes, comprometidos coa súa contorna e flexibles ante os cambios do comprado laboral. Nel impártense un total de 9 titulacións de ciclos formativos, seis de grao medio (Preimpresión dixital, Impresión gráfica, Soldadura e caldeiraría, Mecanizado, Instalacións eléctricas e automáticas e Instalacións de telecomunicación) e tres de grao superior (Programación da produción en fabricación mecánica, Automatización e robótica industrial e Mantemento electrónico).
O proxecto educativo do Colexio Fogar fai da innovación, a internacionalización e a sustentabilidade piares dunha educación transformadora, impulsando un currículo académico de alto potencial para a sociedade.

InnovaTech FP premia proxectos galegos centrados en IA e dixitalización

Redacción — 2026-06-12T11:33:20Z

O programa InnovaTech FP consolidouse como un dos principais escaparates da innovación tecnolóxica desenvolvida nos centros de Formación Profesional galegos. Así o destacou o conselleiro de Educación, Ciencia, Universidades e FP, Román Rodríguez, durante a entrega dos premios da terceira edición do certame, celebrada esta mañá en Culleredo, onde salientou que a iniciativa xa deu lugar á primeira patente da FP galega e mesmo á creación dunha empresa.
A edición deste ano bateu récords de participación, con 254 equipos inscritos e máis de 1.250 persoas implicadas entre alumnado e profesorado. Os participantes traballaron na resolución de 20 retos formulados por empresas de distintos sectores produtivos, dos que resultaron premiados 14 centros educativos galegos.
Entre os proxectos galardoados con maior compoñente TIC figura o desenvolvido polo IES de Teis para L'Oréal, unha plataforma de xestión para salóns de peiteado baseada en intelixencia artificial capaz de automatizar reservas, xestionar axendas mediante voz e xerar contidos para redes sociais.
Tamén foi recoñecida a plataforma Retail-Flow, creada polo IES García Barbón e o CIFP A Carballeira-Marcos Valcárcel para elPulpo, que emprega códigos QR e triangulación Wi-Fi para medir a rendibilidade do mobiliario comercial e optimizar a disposición dos produtos nas tendas.
O CIFP Universidade Laboral obtivo outro dos premios grazas a unha plataforma web con intelixencia artificial destinada a impulsar o turismo deportivo mediante a creación automática de paquetes que combinan eventos, aloxamento e actividades complementarias.
A dixitalización de procesos industriais tamén estivo presente entre os traballos premiados. O CIFP Montecelo desenvolveu para Repsol un sistema de trazabilidade baseado na Internet das Cousas e RFID para localizar equipos e ferramentas en tempo real, mentres que o CIFP Ferrolterra foi distinguido por unha plataforma de software que garante a trazabilidade integral nunha fábrica de mobiliario de alta gama mediante códigos QR.
A visión artificial foi outra das tecnoloxías con maior protagonismo. O IES Politécnico de Vigo resultou premiado por un sistema capaz de detectar automaticamente a acumulación de residuos en membranas de ultrafiltración para activar procesos de limpeza, mentres que o IES Manuel Chamoso Lamas desenvolveu unha solución orientada á detección de defectos en chapas de aceiro mediante intelixencia artificial.
O CIFP A Carballeira-Marcos Valcárcel destacou especialmente nesta edición ao recibir varios galardóns, entre eles o correspondente a unha plataforma intelixente de vixilancia do tráfico marítimo que emprega intelixencia artificial e xeolocalización para detectar anomalías e protexer zonas sensibles do litoral galego. O mesmo centro foi premiado tamén por unha aplicación móbil baseada en visión artificial e IA xenerativa para crear receitas personalizadas a partir de algas.
Outras solucións distinguidas incorporan tecnoloxías como sensores intelixentes, comunicacións LoRaWAN, xeolocalización, RFID ou navegación autónoma para robots móbiles, como o sistema de medición de caudais desenvolvido polo CIFP Politécnico de Santiago ou o carro de ferramentas autónomo do CIFP Ferrolterra.
As 20 propostas premiadas pasarán agora a formar parte da área de emprendemento industrial do Centro Galego da Innovación da FP Eduardo Barreiros, onde recibirán apoio para a súa incubación e aceleración co obxectivo de favorecer a creación de novas empresas innovadoras e de base tecnolóxica.

Talentos Inclusivos (CITIC) recibirá o Premio Galego de Educación para o Desenvolvemento

S. P. — 2026-06-12T11:20:26Z

O vindeiro martes 16 de xuño (a partir das 11.30 horas) a sala Agustín Magán do compostelán centro sociocultural de Santa Marta acollerá a gala de entrega de galardóns do Premio Galego de Educación para o Desenvolvemento e Cidadanía Global.
O evento ofrecerá a exposición pública dos proxectos premiados, ademais da entrega de diplomas a alumnado e profesorado impulsor dos mesmos e un distintivo para cada centro educativo, elaborado polo obradoiro artesán de deseño e elaboración de xoias Silvereira. Entre as entidades premiadas está o CITIC da UDC por Talentos Inclusivos, o revolucionario proxecto de tecnoloxías sen barreiras para favorecer a autonomía e a calidade de vida das persoas con discapacidades.
Vinte candidaturas e tres proxectos premiados
O Premio Galego de Educación para o Desenvolvemento e Cidadanía Global recibiu nesta cuarta edición vinte candidaturas. Sete delas correspondentes á categoría A (Infantil e Primaria), nove á categoría B (ESO, Bacharelato e FP) e catro á categoría C (universidades).
O xurado, composto por seis profesionais da cooperación, o ensino e a educación para a cidadanía global, acordou distinguir os proxectos Non sempre se nace onde se pace na categoría A, desenvolvida conxuntamente polo CEIP A Canosa-Rus (Coristanco) e o CEIP Xesús San Luis Romero (Carballo); Cultivando conciencias, colleitando futuros na categoría B, do IES Plurilingüe de Valga, e Talentos Inclusivos na categoría C, do Centro de Investigación en Tecnoloxías da Información e das Comunicacións (CITIC) da Universidade da Coruña.
Cultura solidaria, cooperación e mirada intercultural
O proxecto intercentros Non sempre se nace onde se pace pon o foco, entre outras cuestións, na cultura da solidariedade e a cooperación dende unha perspectiva intercultural. Faino a través da historia ficticia de dúas mulleres migrantes que chegan a Galicia dende América e sobre a que se artellan diversas actividades nas que participou de xeito coordinado alumnado de Infantil e Primaria dos colexios públicos A Canosa-Rus de Coristanco e Xesús San Luis Romero de Carballo, ambos na provincia da Coruña.
Tamén sobre a interculturalidade e as aprendizaxes compartidas pivota o proxecto Cultivando conciencias, colleitando futuros, no que alumnado do Ciclo Básico de Agroxardinería e Composición Floral e do Ciclo Medio de Xardinería e Florería do IES Plurilingüe de Valga (Pontevedra) desenvolveu un proxecto inspirado nos xardíns circulares Tolou Keur de Senegal, adaptando esta idea ao contexto galego e promovendo a biodiversidade e prácticas sostibles. Contando no proceso coa participación da comunidade senegalesa da localidade.
Pola súa parte, o proxecto Talentos Inclusivos achega a ciencia e a tecnoloxía dende o Centro de Investigación en Tecnoloxías da Información e das Comunicacións (CITIC) da Universidade da Coruña a alumnado non universitario. O obxectivo desta proposta é espertar vocacións STEM e desenvolver competencias dixitais con impacto social a partir de retos reais, facilitados por persoal e usuarias de diversas asociacións galegas.
Ademais de diplomas para alumnado e profesorado e un distintivo para os centros dos tres proxectos premiados, o premio ofrece por segundo ano unha viaxe a proxectos de cooperación internacional en Guatemala a dous profesores/as de cada proxecto gañador. Deste xeito, seis docentes poderán coñecer de primeira man o traballo da cooperación galega nun país do Sur Global seguindo a experiencia da anterior edición, na que viaxaron ao país centroamericano profesoras da Facultade de Educación da Universidade da Coruña, do IES O Couto (Ourense) -en substitución do primeiro premio na súa categoría, o IES Luís Seoane (Pontevedra)- e do CEIP López Ferreiro (Compostela).
O Premio Galego de Educación para o Desenvolvemento e Cidadanía Global conta co respaldo e co financiamento da Dirección Xeral de Relacións Exteriores e coa Unión Europea da Xunta de Galicia. Nas súas catro edicións recibiu un total de 77 propostas de educación para a transformación social.

A Deputación de Lugo adxudica por 2,5 millóns un novo sistema informático que modernizará a xestión tributaria

S. P. — 2026-06-12T11:08:57Z

A Xunta de Goberno da Deputación de Lugo deu este venres 12 de xuño luz verde á adxudicación, por 2,5 millóns de euros dun novo sistema informático para a xestión tributaria da institución provincial. Unha ferramenta que, en palabras da voceira socialista do Goberno, Pilar García Porto, “suporá un importante avance na modernización dos servizos que prestamos aos concellos e á cidadanía”.
García Porto engadiu que “falamos de algo que nos permitirá facer unha administración fiscal máis áxil, máis eficiente e máis próxima. Un sistema que dará cobertura aos concellos da provincia na xestión de impostos, taxas e outros ingresos públicos, facilitando os trámites tanto ás administracións locais como aos contribuíntes”.
Resultou adxudicataria Gestión Tributaria Territorial SAU, que prestará este servizo durante os vindeiros catro anos.
A deputada que este sistema permitirá, entre outras vantaxes, reducir tempos de tramitación, impulsar a sede electrónica e ampliar as posibilidades de relación telemática coa Administración, sempre con plenas garantías de seguridade. “Será un sistema que incorporará melloras específicas para facilitar os plans personalizados de pagamento e contará cun módulo de atención telefónica pensado especialmente para aquelas persoas que teñen máis dificultades para utilizar medios dixitais”, apuntou, engadindo que “estamos ante unha actuación que reforza a cooperación da Deputación cos concellos, mellora a calidade dos servizos públicos e facilita a relación entre a cidadanía e a Administración, facendo que os trámites sexan máis sinxelos, máis rápidos e máis accesíbeis”.

Galicia Podcast Summit celebrará a súa 4ª edición na Coruña

Marcus Fernández — 2026-06-12T10:35:04Z

O vindeiro mércores, 17 de xuño, o Centro Municipal de Empresas Accede Papagaio acollerá entre as 10:00 e as 14:00 a cuarta edición do Galicia Podcast Summit, un encontro para xuntar a creadores, profesionais do márketing, produtores, especialistas en comunicacións e apaixonados do podcasting e afondar no impacto da intelixencia artificial na creación, distribución e monetización dos contidos dixitais.
A inscrición ao evento é de balde, e xa conta con medio cento de participantes inscritos para asistir a esta actividade que estará dividida en dous segmentos.
No primeiro segmento participarán María Gómez Domínguez (Da Néboa Podcast), Jonathan Martínez (Café de Lucus) e Anna Fuster (The Glow Up Journey); mentres que no segundo segmento poderase escoitar a Lara Capeáns (Voz en Movimiento), Manolo Rodríguez (En1Minuto) e Eva González Vior (La hora de Datola).
Recoméndanse aos asistentes que conten cun podcast de seu que leven mercadotecnia para dalo a coñecer entre o resto de asistentes, xa que este tipo de xornada serve tanto para adquirir coñecementos como para establecer conexións con outros creadores e dar a coñecer proxectos.

Nova edición das sesións formativas Finanzas para todos na Rede CeMIT

Redacción — 2026-06-12T09:46:12Z

A Axencia para a Modernización Tecnolóxica de Galicia (AMTEGA), en colaboración co Banco de España, impulsa unha nova edición da iniciativa Finanzas para todos, destinada a mellorar a educación financeira da cidadanía e fortalecer a súa capacidade para adoptar decisións económicas seguras, responsables e ben fundamentadas.
As sesións darán comezo o vindeiro 17 de xuño na aula CeMIT de Celanova e desenvolveranse ata outubro nas aulas CeMIT de Abegondo, Ribeira, Vilagarcía de Arousa e A Coruña (Centro Cívico de Eirís). Como en edicións anteriores, o programa organízase en dous itinerarios formativos, compostos por dúas sesións cada un e cunha duración total de 7,5 horas.
O primeiro itinerario estará dedicado á xestión das finanzas persoais. Nel trataranse aspectos como a elaboración dun orzamento, a identificación e clasificación de ingresos e gastos, o aforro, o investimento e o endebedamento. O obxectivo é facilitar a adquisición de hábitos financeiros máis seguros e responsables.
A formación incluirá tamén actividades prácticas sobre o uso de contas bancarias, tarxetas e distintos medios de pagamento. Do mesmo xeito, reservarase un espazo específico á prevención da ciberdelincuencia, con recomendacións para realizar operacións financeiras dixitais con maiores garantías de seguridade.
O segundo itinerario permitirá profundar nos contidos abordados previamente, contribuíndo a reforzar a confianza da cidadanía na xestión das súas finanzas persoais.
As sesións apoiaranse no uso de ferramentas dixitais, como LibreOffice e distintos simuladores, para fomentar unha aprendizaxe práctica e mellorar as competencias dixitais dos asistentes. Tamén se promoverá o aproveitamento das tecnoloxías dixitais para elaborar orzamentos, analizar gastos e comparar servizos financeiros, sen esquecer a concienciación sobre os riscos asociados ás decisións económicas do día a día.
As persoas interesadas poden consultar a programación completa e formalizar a súa inscrición vía web.

A Xunta destaca a boa acollida nas redes sociais da campaña Activa Comercio

S. P. — 2026-06-12T09:26:29Z

O director xeral de Comercio e Consumo, Gabriel Alén, entregou este venres 12 de xuño en Ourense un dos catro bonos regalo de 250 euros que se sortearon nas redes sociais entre as persoas que participaron na primeira edición de 2026 dos Bonos Activa Comercio.
O sorteo, celebrado por vez primeira, tivo “boa acollida”, en palabras do director xeral, que salientou as preto de 2.000 interaccións rexistradas nas contas de Instagram e TikTok da Xunta de Galicia.
A entrega do bono tivo lugar na librería Perseidas, un dos arredor de 900 establecementos ourensáns adheridos dos máis de 6.400 de toda Galicia que se involucraron na iniciativa. Alí, Alén lembrou que estes bonos adicionais de 250 euros —en formato dixital mediante código QR— deben gastarse precisamente nestes comercios implicados, cun prazo de validez dunha semana. Cómpre recordar que a primeira edición do ano dos Bonos Activa Comercio mobilizou máis de 11,1 millóns de euros en vendas, dos que preto de 1,7 millóns corresponderon á provincia de Ourense.
O Bono Activa Comercio 2026 é unha axuda da Xunta de Galicia para aforrar nas compras. Serve para gastar en tendas locais que participan no programa. O obxectivo é axudar aos clientes e impulsar o comercio de proximidade.
Os descontos inclúen 5 euros de rebaixa se mercamos entre 20 e menos de 30 euros, 10 euros de rebaixa se compramos entre 30 e menos de 50 euros, e 15 euros de rebaixa se gastamos 50 euros ou máis.
Podemos baixalo en formato de código QR no noso móbil, tras entrar na web oficial de Bonos Activa Comercio. O bono úsase de forma sinxela ao pagar nas tendas adheridas á campaña.

Cuntis, Moraña, Portas e Barro xuntan forzas por unha Rede segura para a rapazada

S. P. — 2026-06-12T08:23:22Z

Os concellos de Cuntis, Moraña, Portas e Barro e máis a Unión Nacional de Asociacións Familiares (UNAF) veñen de xuntar forzas para traballar este verán por unha Rede segura, poñendo o foco nos menores de idade. Farano a través do proxecto de prevención de condutas aditivas os ditos concellos e dunha sesión formativa dirixida a familias.
Impartida por persoal especializado da UNAF (Unión de Asociacións Familiares), este obradoiro achegará ferramentas clave para entender e xestionar o uso das TRIC (Tecnoloxías da Información, Comunicación e Relación) na casa.
A cita será o vindeiro mércores, 17 de xuño en horario de tarde, de 16.00 a 17.30 horas, e levarase a cabo en formato online. As inscricións están abertas e pódense formalizar na Rede.
Trátase dun obradoiro de balde que se desenvolve baixo o epígrafe Falar protexe. Prevención de riscos en entornos dixitais. Trátase dunha formación dirixida a informar e achegar ás familias recursos para promover un uso seguro, beneficioso e consciente das novas ferramentas.
“As novas tecnoloxías forman parte do día a día da infancia e da adolescencia, pero tamén é fundamental coñecer os riscos asociados ao seu uso e aprender a acompañar aos nosos fillos e fillas nun entorno dixital seguro”, explican dende o Concello de Portas.
O taller está dirixido a nais, pais e persoas titoras.

Mestrelab Research presenta unha plataforma que acelera a investigación coa análise avanzada de datos

S. P. — 2026-06-11T19:41:33Z

Mestrelab Research presentou hoxe os resultados do proxecto SCI-Data, unha iniciativa orientada ao desenvolvemento dunha solución tecnolóxica avanzada e con ampla marxe de evolución para a xestión, procesamento e estandarización de grandes volumes de datos científicos procedentes de múltiples fontes, con especial foco na investigación en sectores químicos, farmacéuticos e de ciencias da vida.
O obxectivo é “dar resposta a un dos grandes retos actuais destes sectores: a dificultade de integrar e aproveitar datos científicos complexos e heteroxéneos, que hoxe en moito casos permanecen fragmentados ou pouco interoperábeis, limitando o seu uso en investigación e desenvolvemento”, informaron dende Mestrelab, engadindo que o proxecto SCI-Data permitiu desenvolver unha plataforma tecnolóxica capaz de unificar, procesar e automatizar grandes volumes de datos científicos procedentes de distintas fontes e tecnoloxías analíticas utilizadas en contornas de laboratorio. Entre elas inclúense técnicas amplamente utilizadas en investigación como a resonancia magnética nuclear (RMN), a espectrometría de masas (LC/GC-MS) ou distintas modalidades de espectroscopía, fundamentais na análise química, farmacéutico e biomédico.
A presentación de resultados tivo lugar este xoves no Centro de Investigación Mestrelab (CIM) de Santiago de Compostela e contou coa participación de representantes das entidades implicadas no proxecto, entre eles, Felipe Seoane, director de Desenvolvemento de Software de Mestrelab; Agustín Barba, director de Desenvolvemento de Software de SciY, Alejo Santolino, coordinador de marco legal de datos e análises de negocio do proxecto OneHealth DataSpace do Centro de Supercomputación de Galicia (CESGA); Jorge Amor, responsábel de Datos e Infraestrutura IA do centro tecnolóxico Gradiant; María Silveira, manager de proxectos innovadores do Clúster Tecnolóxico Empresarial das Ciencias da Vida de Galicia (BIOGA); e Lucía Castro, xerente de DataLife.
Un dos principais focos do proxecto foi o tratamento dos denominados datos espectrais na industria farmacéutica, un tipo de información científica caracterizada pola súa elevada complexidade, volume e diversidade de formatos.
Estes datos, xerados decote en contornas de laboratorio, adoitan proceder de distintas tecnoloxías analíticas e almacénanse en formatos heteroxéneos, o que, segundo fixeron saber, “dificulta a súa integración, comparación e reutilización”.
SCI-Data aborda este reto mediante procesos de estandarización que permiten transformar esta información en datos estruturados e preparados para a súa explotación en contornas de investigación: “O reto era que os datos se puidesen exportar noutros formatos e que, nesa exportación, existise un esquema que permitise a súa interoperabilidade e reusabilidade” expuxo Felipe Seoane (Mestrelab).
Así, a solución técnica desenvolvida inclúe a automatización de procesos como a lectura, a análise e a conversión de formatos obsoletos. Ademais, deseñouse para garantir que os datos científicos poidan ser utilizados de forma eficiente en distintas contornas e por diferentes organizacións.
Este enfoque, explicaron, “contribúe a mellorar a interoperabilidade da información e a avanzar cara a ecosistemas de datos máis conectados, nos que a investigación poida apoiarse en fontes de datos integradas en lugar de sistemas illados”.
Un proxecto estratéxico para a dixitalización científica
O proxecto enmárcase nas estratexias europeas de transformación dixital de sectores estratéxicos, orientadas a impulsar a creación de espazos de datos, para facilitar o intercambio federado de datos e mellorar a competitividade científica e industrial. Precisamente Alejo Santolino (CESGA) sintetizou este obxectivo baixo unha idea clave: “Os datos illados describen o pasado pero, cando os conectamos, é cando xeramos futuro”.
SCI-Data desenvolveuse coa colaboración do CESGA, impulsor do OneHealth DataSpace apoiado por DataLife; así como coa colaboración doutras organizacións académicas, industriais e tecnolóxicas como Gradiant, Optimal, DataLife e BIOGA.

Os Encontros Gidein analizan o papel da robótica avanzada na industria do futuro

S. P. — 2026-06-11T15:00:00Z

A robótica avanzada, os robots humanoides e os xemelgos dixitais protagonizaron esta mañá, no edificio Redeiras da UVigo, unha nova edición dos Encontros Gidein, unha iniciativa do Grupo de Innovación Docente Empresa e Innovación e o Grupo de Enxeñaría de Fabricación, GEF, da Universidade de Vigo en colaboración co Centro Tecnolóxico de Automoción de Galicia, CTAG.
Segundo explicaron, foi un encontro no que se reuniu a persoal docente e investigador, profesionais e público interesado en coñecer de primeira man algunhas das tecnoloxías que están a marcar o presente e o futuro da industria.
O programa incluíu os relatorios Robótica avanzada e humanoides. Tendencias, impartido por Víctor Alonso Ramos, director de Manufacturing e Transformación Dixital do CTAG, e O Digital Twin como tecnoloxía clave na industria do futuro, a cargo de Iria Galiñanes Romero, responsábel da Área de Digital Twin e Cuántica deste mesmo centro tecnolóxico.
Esta é a segunda actividade organizada baixo o selo dos Encontros Gidein. Segundo explica o coordinador da xornada, o profesor da Escola de Enxeñaría Aeronáutica e do Espazo Diego Carou Porto, a iniciativa nace da vontade de achegar á comunidade universitaria a experiencia e o coñecemento xerado por empresas e centros tecnolóxicos de referencia.
A través das dúas conferencias, a xornada permitiu coñecer algunhas das liñas tecnolóxicas con maior potencial transformador para o sector industrial. No caso da intervención de Víctor Alonso Ramos, o foco situouse na evolución da robótica avanzada e nos progresos que se están a producir no desenvolvemento de robots humanoides e na súa incorporación aos procesos produtivos. “Buscamos coñecer de primeira man o rol do CTAG en eidos como a robótica avanzada e, en particular, os avances que se están a producir no campo dos humanoides e a súa aplicación ao sector industrial”, explica Carou.
Pola súa banda, o relatorio de Iria Galiñanes afondou no concepto de xemelgo dixital, unha tecnoloxía baseada na creación de réplicas virtuais de sistemas, procesos ou produtos que permite optimizar o seu deseño, funcionamento e mantemento. Tratouse de “poñer en común as principais ideas sobre os xemelgos dixitais, desde a súa propia definición ata as principais aplicacións por parte do CTAG”.
O carácter aberto e interdisciplinar constitúe unha das sinais de identidade desta iniciativa. O Grupo de Innovación Docente Empresa e Innovación integra profesorado procedente de diferentes ámbitos de coñecemento, unha diversidade que tamén se reflicte no perfil das persoas ás que se dirixen estas actividades.
“O noso grupo incorpora profesorado de diversas disciplinas e os eventos que organizamos tentan conectar a xente da universidade e da empresa”, subliña Carou. Por este motivo, engade, os Encontros Gidein están concibidos como espazos de intercambio abertos “para docentes, investigadores, profesionais e mesmo para o público xeral”.

Os avances tecnolóxicos do noso sector do mar, ao detalle no Festival Mar de Mares

S. P. — 2026-06-11T14:00:00Z

A conselleira do Mar, Marta Villaverde, inaugurou a primeira hora deste xoves 11 de xuño o IV Foro Azul, celebrado no marco do Festival Mar de Mares no Espazo Avenida Abanca, na Coruña. Nel, resaltou os avances tecnolóxicos do sector marítimo galego e as novas iniciativas que se están a aplicar desde a Xunta de Galicia para o proceso de transición dixital e tecnolóxica.
Durante o evento, Villaverde salientou a importancia da innovación tecnolóxica na realidade marítimo-pesqueira e a necesidade de manter o equilibrio da entre a preservación do medio mariño e a rendibilidade económica.
No dito punto destacan iniciativas pioneiras no sector coma MaruxIA (unha iniciativa tecnolóxica para crear un xemelgo dixital baseado en intelixencia artificial que optimice a xestión de recursos mariños e a sustentabilidade nas rías galegas), o proxecto Lonxas Galegas 4.0 (a solución dixital e intelixente baseada na nube para modernizar o sector pesqueiro galego, cuxo obxectivo é automatizar e conectar as lonxas e confrarías de pescadores, optimizando os procesos de comercialización dende a pesada do peixe ata a facturación final), ou o Plan Estratéxico de Observación Mariña. Estes proxectos, son “unha ferramenta excepcional para consolidar unha auténtica Economía Azul, forte e puxante”, afirmou.
Por outra banda, sobre outro dos asuntos que se abordaba no foro, a acuicultura, a conselleira do Mar incidiu na importancia deste sector estratéxico e que "está chamado a xogar un papel moi relevante no autoabastecemento dos mercados comunitarios de produtos mariños”, xa que produce alimentos “saudábeis, de alta calidade e, ademais, cunha pegada de impacto ambiental moi baixa”.
Na súa intervención, a conselleira tamén aproveitou para felicitar á Asociación “Redes de Sal”, organizadores do Mar de Mares, por ser recentemente seleccionado coma finalista polo prestixioso programa Líderes Culturales entre máis de 100 acontecementos culturais en todo o país.
Este evento reúne a algunhas das voces mais relevantes do sector marítimo. Nesta xornada inicial analizouse a transformación dixital e a IA aplicada ó mar, a evolución da gastronomía e pesca sostible galega, o desenvolvemento do patrimonio marítimo en espazos de cultura, deporte e benestar, e o futuro da acuicultura respectuosa cos recursos naturais.

Ribadeo acolle unha xornada sobre saúde laboral e intelixencia artificial

Redacción — 2026-06-11T12:00:00Z

A xerente do Instituto de Seguridade e Saúde Laboral de Galicia (Issga), Adela Quinzá-Torroja, participou hoxe en Ribadeo na inauguración da xornada técnica Transformación dixital e intelixencia artificial: unha mirada desde a saúde laboral, organizada polo Laboratorio de Riscos Psicosociais do Issga e a Universidade de Santiago de Compostela (USC). O encontro reuniu a 65 participantes procedentes de diferentes ámbitos profesionais e institucionais. Durante a súa intervención, a responsable do Issga destacou a necesidade de anticiparse aos novos riscos psicosociais para garantir contornos de traballo saudables e sostibles, ao tempo que puxo en valor o papel que desempeña o Laboratorio de Riscos Psicosociais neste ámbito.
Quinzá-Torroja subliñou que esta cuestión resulta especialmente relevante ante a crecente incorporación das tecnoloxías dixitais e da intelixencia artificial aos procesos produtivos. Segundo explicou, estas transformacións abren novas oportunidades, pero tamén presentan desafíos relacionados coa xestión das persoas, a adaptación das organizacións, a retención do talento e a protección da saúde laboral. Por iso, incidiu na utilidade de iniciativas como esta xornada para favorecer contornos de traballo máis saudables e adaptados ás novas realidades tecnolóxicas.
A actividade está orientada principalmente a persoal directivo, responsables de recursos humanos, profesionais da prevención de riscos laborais e outras persoas interesadas nesta materia. Ademais da súa vertente formativa, constitúe un espazo de reflexión e coordinación entre distintos actores clave, co obxectivo de impulsar a integración da saúde psicosocial nas políticas laborais e preventivas de maneira transversal.
O Laboratorio de Riscos Psicosociais, impulsor desta xornada, enmárcase na Estratexia de Seguridade e Saúde no Traballo de Galicia: Horizonte 2027. Trátase dunha iniciativa conxunta da Xunta e da USC creada para promover a transferencia de coñecemento científico neste ámbito e contribuír á mellora da saúde psicosocial das persoas traballadoras nas empresas galegas desde unha perspectiva integral. Para iso desenvolve actividades de investigación, formación, sensibilización e colaboración técnica, entre as que se inclúe esta xornada.

O director da AMTEGA participou na clausura do primeiro Sandbox europeo de IA

Redacción — 2026-06-11T11:41:45Z

O director da AMTEGA, Damián Rey, participou hoxe en Madrid na clausura do primeiro Sandbox europeo de IA, unha iniciativa na que a Xunta tomou parte cun proxecto baseado na aplicación da intelixencia artificial para optimizar e automatizar a transcrición das chamadas aos servizos de emerxencia.
Damián Rey valorou de maneira moi positiva a participación de Galicia neste Sandbox, xa que permitiu «traballar de forma práctica sobre os requisitos do Regulamento Europeo de Intelixencia Artificial e comprender como aplicar esas esixencias regulatorias nun sistema real de alto risco».
A proposta presentada pola Xunta consiste nunha solución de intelixencia artificial para o ámbito das emerxencias, desenvolvida co obxectivo de automatizar e mellorar a transcrición de chamadas mediante tecnoloxías avanzadas de recoñecemento automático da fala.
Trátase da única iniciativa presentada por unha administración pública nesta contorna de probas. A ferramenta permite transcribir chamadas en tempo real ou case real, almacenar as conversacións en formato estruturado e facilitar posteriormente a realización de procuras, análises e investigacións relacionadas con incidencias de emerxencia.
O proxecto pretende ir máis alá da automatización de tarefas e contribuír á mellora da capacidade operativa dos servizos de emerxencias. A creación de bases de datos estruturadas de transcricións permitirá impulsar futuros casos de uso vinculados á analítica avanzada, á detección de patróns, á predición de incidentes ou mesmo á priorización de chamadas a partir de indicadores emocionais identificados durante a conversa.
O proxecto galego foi seleccionado o pasado ano polo Ministerio para a Transformación Dixital e da Función Pública para participar no primeiro Sandbox europeo de IA como exemplo de acceso a servizos públicos esenciais. As outras 11 iniciativas participantes aplicaban a intelixencia artificial a ámbitos como a biometría, o emprego, as infraestruturas críticas, a maquinaria ou os produtos sanitarios. Todos eles están considerados sectores de alto risco polo Regulamento Europeo de Intelixencia Artificial debido ao seu potencial impacto sobre os dereitos fundamentais da cidadanía.

Allariz crea unha rede de apoio e comunicación para as familias que adían o uso dos móbiles entre a rapazada

S. P. — 2026-06-11T10:45:03Z

O Concello de Allariz, en colaboración coa ANPA Airiña do CEIP Padre Feijoo e a AFA Vilanova do IES Allariz, veñen de pór en marcha o proxecto Espazo Amigo da Infancia, nova iniciativa que consiste nunha rede de establecementos comerciais e hostaleiros comprometidos co benestar, a seguridade e a autonomía dos nenos, nenas e adolescentes do municipio.
O proxecto nace cun obxectivo moi claro: ofrecer á infancia un punto de apoio próximo e seguro en caso de necesidade. Trátase dunha medida clave nun contexto social no que cada vez máis familias apostan por adiar o uso do teléfono móbil entre os seus fillos e fillas.
Os establecementos adheridos comprométense a facilitar unha chamada telefónica ás familias de maneira puntual cando un menor o precise (por exemplo, ante calquera imprevisto nos seus desprazamentos diarios, saídas do colexio ou actividades extraescolares).
Desde a organización subliñase que “os locais participantes non asumirán ningunha responsabilidade legal sobre os menores, máis alá de ofrecerlles esa canle de comunicación segura”.
Para que as crianzas poidan recoñecer estes lugares facilmente, todos os comercios participantes contarán cun distintivo visíbel na súa entrada que os identificará como espazos de confianza.
"Trátase dunha medida sinxela pero de grande valor social, que contribúe a crear entornos máis seguros ao tempo que promove uma comunidade máis coidadora, próxima e comprometida coas familias", destacan desde o Concello e as asociacións de nais e pais.
A iniciativa de Allariz inspírase noutras experiencias desenvolvidas con éxito en diferentes municipios do Estado, demostrando que a colaboración comunitaria é unha ferramenta útil para o día a día das familias. No seu lanzamento, o proxecto conta xa co apoio e a implicación de diversos sectores do tecido local.
Os establecementos adheridos son Bazar Adolfo, Fio de Liño, English Allariz, Mercería Anduriña, O Tocador de Anabel, Maruxairas, Quercus Parafarmacia, Farmacia Páez, a Óptica Alaricana, Clínica Veterinaria da Costa, O Xardín, A Tulla, A Mariñeta, Portovello, As Curuxas, Pocholiños Park, Aira das Letras, Anxiños, Reatur, Bencomún, Arume by Trapiños e Portelo Rural.
Con todo, o Concello de Allariz quere convidar ao resto do comercio e hostalaría a seguir sumándose a este proxecto. As persoas e negocios interesados en participar poden confirmar a súa adhesión ou solicitar máis información a través do correo electrónico educacion@allariz.gal.

Un tribunal considera que as escolmas xeradas por IA son responsabilidade de Google

Redacción — 2026-06-11T10:30:00Z

O Tribunal Rexional de Múnic ditou unha resolución de gran relevancia para o futuro dos sistemas de busca baseados en intelixencia artificial ao concluír que as escolmas xeradas por IA nos resultados de Google constitúen contido propio da compañía e, polo tanto, esta pode ser considerada directamente responsable das afirmacións falsas que difundan.
A decisión (caso 26 O 869/26) impón unha medida cautelar contra Google por vincular incorrectamente dúas editoras de Múnic con estafas, trampas de subscrición e outras prácticas comerciais cuestionables. Segundo o tribunal, as respostas xeradas pola IA mesturaron información procedente doutras empresas realmente problemáticas cos demandantes, establecendo relacións que non aparecían nas fontes enlazadas.
A sentenza marca unha diferenza clara entre os motores de busca tradicionais e os sistemas de resposta xerativa. Mentres que os buscadores convencionais limítanse a mostrar ligazóns cara a contidos de terceiros, as escolmas xeradas por IA elaboran respostas novas, reestruturan a información e emiten conclusións propias. O tribunal destaca que Google non se limita a facer accesibles contidos alleos, senón que presenta información «coas súas propias palabras e segundo a súa propia estrutura».
No caso analizado, a IA abría a resposta con afirmacións categóricas sobre supostas prácticas dubidosas dunha das empresas afectadas, para despois desenvolver unha explicación estruturada con sinais de alerta e recomendacións para os usuarios. Os xuíces subliñan que varias destas afirmacións non aparecían en ningunha das fontes referenciadas.
A resolución considera que as doutrinas xurídicas que durante anos limitaron a responsabilidade dos motores de busca non son aplicables aos sistemas xerativos. O razoamento é que os buscadores tradicionais simplemente apuntan cara a información externa, mentres que as respostas xeradas por IA crean «declaracións independentes, novas e substantivas» a partir da análise de múltiples fontes.
Google argumentou durante o procedemento que os usuarios podían comprobar por si mesmos a exactitude das respostas consultando as fontes enlazadas e que, en xeral, eran conscientes de que a información xerada por IA non debía aceptarse cegamente. O tribunal rexeitou esta tese ao entender que os resumos son comprensibles por si mesmos e transmiten unha mensaxe completa e autónoma, sen advertencias claras sobre a súa posible falta de fiabilidade.
Os xuíces tamén advertiron da existencia dun baleiro de protección legal. Se Google só fose responsable en casos moi limitados, as persoas ou empresas afectadas por información falsa xerada pola IA poderían quedar sen unha vía efectiva de reclamación, xa que as fontes orixinais non realizaron as afirmacións controvertidas e a plataforma tampouco asumiría responsabilidade directa.
Outro dos aspectos destacados da resolución afecta á liberdade de expresión. O tribunal sostén que unha opinión xerada por IA non representa a convicción persoal de quen a expresa, senón o resultado dun algoritmo. Por ese motivo, entende que este tipo de contido merece unha protección constitucional menor que a dunha persoa ou un medio de comunicación tradicional.
A sentenza obriga a Google a asumir o 80 % dos custos procesuais e prohibe a difusión de diversas afirmacións falsas sobre os demandantes, incluídas as supostas relacións con empresas sospeitosas ou determinadas prácticas comerciais irregulares. O tribunal tamén considera que existe risco de reincidencia, xa que os algoritmos poderían volver xerar contidos semellantes no futuro.
A decisión podería ter consecuencias máis aló de Google. O tribunal establece un principio segundo o cal os operadores de sistemas de IA poden ser responsables das afirmacións xeradas polas súas plataformas cando estas crean contido novo que non aparece nas fontes orixinais. De consolidarse esta interpretación en instancias superiores ou noutros países, o seu impacto podería estenderse a servizos como ChatGPT, Claude ou Perplexity.
A resolución chega nun momento no que aumenta o debate sobre a fiabilidade das respostas xeradas por IA. Un estudo citado polo tribunal indica que o modelo Gemini 3 empregado nos resumos xerados por IA nos resultados de Google acada unha taxa de acerto do 91 %, pero tamén sinala que unha parte importante das respostas correctas non pode ser rastrexada directamente ata as fontes enlazadas. Precisamente esa capacidade de producir afirmacións que non figuran explicitamente nos documentos de referencia constitúe o núcleo do conflito xurídico examinado en Múnic.
Google non realizou comentarios públicos sobre a resolución, que aínda podería ser obxecto de recurso.

A futura Lei de Educación Dixital de Galicia incorpora case unha trintena de achegas do Consello Escolar

S. P. — 2026-06-11T10:10:00Z

A futura Lei de Educación Dixital de Galicia incorporará preto dunha trintena de achegas por parte do Consello Escolar de Galicia, o órgano colexiado de debate e reflexión no eido do ensino onde están representados o conxunto dos actores que conforman a comunidade escolar como son as familias, o alumnado, o profesorado, os centros, as organizacións sindicais e as distintas administracións, entre outros.
O conselleiro de Educación e Ciencia, Román Rodríguez, presidiu onte a reunión do Consello Escolar de Galicia, no que se abordaron novas accións para o vindeiro curso, entre as que salientou a normativa en educación dixital, así como as novas medidas de avance en materia de atención á diversidade e ratios que reforzarán, segundo dixo, “as melloras que empezaron a implantarse hai dous cursos en cumprimento do acordo de melloras de 2023”.
No que atinxe á futura Lei de Educación Dixital de Galicia, que entra xa nos últimos pasos para aprobación definitiva no Consello da Xunta e remisión ao Parlamento, Román Rodríguez aproveitou para agradecer as achegas realizadas “no período de exposición pública do texto lexislativo que o converten no máis participativo da historia de Galicia”, e que, segundo confirmou, “van na liña do xa acontecido no período de consulta pública previa”.
Recoñeceu estar de acordo con moitas das 199 propostas recibidas nesta última fase expositiva que, por técnica normativa, non se poden incorporar porque non son obxecto da lei, “pero son moi valiosas e teranse en conta para posteriores desenvolvementos normativos”, sinalou, engadindo que “115 delas son achegas de adición, isto é, que propoñen engadir e enriquecer o texto base sobre cuestións como o uso dos teléfonos móbiles, a regulación da formación ou garantías de recursos entre outros que, na práctica, deberán canalizarse a través dos distintos plans de despregamento normativo”.

O CPEIG celebra este venres a súa XVIII Noite da Enxeñaría en Informática de Galicia

S. P. — 2026-06-11T09:58:18Z

O CPEIG celebra este venres a súa XVIII Noite da Enxeñaría en Informática de Galicia, unha gala que terá lugar no Hotel OCA Puerta del Camino de Santiago de Compostela, a partir das 19:00 horas, e na que se entregarán os premios anuais da profesión.
Está previsto que preto de 500 convidados asistan ao evento TIC referente de Galicia, entre representantes do ámbito empresarial, da Administración Pública, do ámbito universitario e profesionais do sector.
Segundo informou o Colexio Profesional de Enxeñaría en Informática de Galicia, a Noite é “xa unha gala consolidada onde o Colexio pretende mostrar á sociedade o traballo desenvolvido por enxeñeiros en informática dentro da Sociedade da Información e as iniciativas relacionadas co ámbito das TIC”.


O xornalista deportivo Terio Carrera

Esta décimo oitava edición será inaugurada polo presidente do CPEIG, Fernando Suárez, e contará coa presenza do delegado do Goberno en Galicia, Pedro Blanco; o conselleiro de Facenda e Administración Pública da Xunta de Galicia, Miguel Corgos; o conselleiro de Educación, Ciencia, Universidades e Formación Profesional da Xunta de Galicia, Román Rodríguez; o director da Axencia para Modernización Tecnolóxica de Galicia, Damián Rey; a deputada provincial da área de Sectores Produtivos da Deputación da Coruña, Cristina Capelán; o alcalde de Ames, Blas García; a reitora da Universidade de Santiago (USC), Rosa Crujeiras; ou a vicerreitora de Estudantes e Empregabilidade da Universidade da Coruña (UDC), María José Lombardía; así como outras personalidades e representantes do sector TIC galego que exercerán como patrocinadores do evento e as colexiadas e colexiados do CPEIG.
A gala estará conducida polo xornalista deportivo e presentador da TVG, Terio Carrera.


Jorge Luengo

Como artista invitado, o evento contará este ano coa actuación do afamado ilusionista e mentalista Jorge Luengo (Cáceres, 1984), coñecido como o mago da cella branca. Desde moi cativo interesouse polo mundo da maxia ata gañar en 2009 en Pekín o Premio Mundial de Maxia, con multitude de actuacións por todo o mundo, como no Museo de Louvre en París, no Centre de Congrès Pierre Baudis en Toulouse, ou no O2 Arena en Praga. Ademais, Luengo ten participado en numerosos concursos de televisión, como Masterchef Celebrity e Atrápame si puedes: Celebrity onde resultou gañador.

Premios da Noite

Premio Iniciativa Emprendedora
O recoñecemento foi para Startup Galicia, a asociación de emprendedores máis grande de Galicia que suma 130 socios que pertencen ao ecosistema e representan a preto de 200 startups.
Premio Ada Byron, dirixido a mulleres enxeñeiras en Informática
A doutora en Informática Virginia Mato, codirectora da Cátedra ALDABA-WIB da UDC e UVigo para impulsar iniciativas que contribúan a dar visibilidade ás mulleres no mundo das TIC, recibe este galardón por ser un “referente próximo e necesario”, cunha traxectoria que demostra que as mulleres poden alcanzar o éxito na profesión.
Premio Traxectoria Profesional
O galardón concédese, a título póstumo, á doutora en Informática Paula Montoto. A pontevedresa traballou durante 25 anos como analista informática na compañía Denodo, nacida na Coruña e líder mundial en virtualización de datos, ademais de ser profesora na Universidade da Coruña.
Premio Especial CPEIG-En memoria de Hernán Vila
José Valiño, director xeral de IT, Información, Procesos e Operacións de ABANCA, e José Manuel García Oya, socio director de Plexus Tech, reciben este recoñecemento pola súa contribución decisiva ao desenvolvemento e consolidación do ecosistema tecnolóxico galego.
Premio Iniciativa Empresarial
O recoñecemento foi para Sparc Foundry, a primeira empresa española, con sede en Vigo, dedicada á fabricación de semicondutores de última xeración, Premio Iniciativa Empresarial do CPEIG. Ten en marcha as obras da súa planta no Parque Tecnolóxico e Loxístico de Vigo, e prevé que estea operativa a finais de 2027 para cubrir a crecente demanda de dispositivos fotónicos nas telecomunicacións, automoción, IA ou no sector aeroespacial.
Premio Innovación Tecnolóxica no Ensino
O recoñecemento recaeu en Loomi, plataforma web pedagóxica, creada por tres mozos estudantes da Universidade de Vigo –Anxo Lameiro, Marcos Martínez e Alejandro Sirvent–, para a personalización da docencia a nivel de infantil e de primaria con IA, co obxecto de que o profesorado poida transformar contidos curriculares en historias ilustradas e personalizadas en cuestión de segundos.
Premio Obxectivos de Desenvolvemento Sostible (ODS)
O premio recoñece á Cátedra INDITEX-UDC de IA en Algoritmos Verdes, iniciativa público-privada que promove a investigación, innovación e transferencia de coñecemento, difusión e divulgación da IA e os algoritmos verdes coa fin de contribuír ao desenvolvemento sostible e a protección do medio ambiente.
Premio Iniciativa da Administración
A distinción foi para a Gerencia de Informática da Seguridad Social pola súa plataforma corporativa de atención ao cidadán. O proxecto, chamado ISAC (Infraestructura de Soporte de Atención al Ciudadano), é unha iniciativa clave na evolución do modelo de atención á cidadanía da Seguridad Social.
Premio e-Inclusión
O recoñecemento recaeu en OdiseIA, Observatorio del Impacto Social y Ético de la IA, por velar polo uso ético e responsable da intelixencia artificial. A organización, fundada en 2019, creou hai pouco a Fundación OdiseIA4Good para impulsar a IA ao servizo do ben común.
Premio Colaboración Interadministrativa
O Concello de Ames recibe esta distinción por impulsar a cooperación institucional como “ferramenta real de transformación económica e social”, consolidándose como “un dos municipios máis dinámicos de Galicia en materia de innovación, emprendemento e desenvolvemento tecnolóxico” con iniciativas como a xornada InnovAmes e a atracción de empresas tecnolóxicas, innovadoras e de base dixital ao seu entorno.
Premio Colexiada/o de Honra
Ramón López de Mántaras, pioneiro da intelixencia artificial en España e Europa, é o novo Premio Colexiado de Honra do CPEIG. O fundador do Instituto de Investigación en Inteligencia Artificial do CSIC recibe esta distinción “polo seu compromiso cunha visión ética, humanista e responsable da tecnoloxía”.
Premio Traballo Fin de Máster
O enxeñeiro informático David Zambrana, da Universidade da Coruña, gaña este recoñecemento polo seu proxecto dunha plataforma, chamada ShoppyEye, orientada a democratizar a observabilidade técnica e de negocio no comercio electrónico para pequenas e medianas empresas. Os finalistas, tamén da UDC, foron Alejandro Esteban, por un traballo sobre a seguridade nas redes informáticas actuais a través da integración de técnicas de IA, e Adrián López, polo deseño dun sistema de apoio á selección de participantes en ensaios clínicos no marco do proxecto iTrial do SERGAS.
Premio 18º Aniversario CPEIG-A Noite
O recoñecemento recaeu nas empresas Dell Technologies, DXC Technology e Taisa polo seu compromiso e apoio continuado ao evento durante máis de dez anos, ademais do seu respaldo sostido á profesión e ao ecosistema TIC galego, e a súa aposta pola innovación, o talento e a colaboración entre empresas, institucións e profesionais.
Premio Impulso Dixital Galicia
A distinción recoñece á Consellería de Educación, Ciencia, Universidades e Formación Profesional da Xunta de Galicia polo seu liderado estratéxico na construción dunha Galicia más innovadora, dixital e preparada para enfrontar os retos do futuro, con iniciativas pioneiras en España, como o Plan integral de benestar dixital, a futura Lei de Educación Dixital de Galicia ou a posta en marcha da primeira Fábrica de Intelixencia Artificial aplicada á saúde en España.

Nexos 25 impulsa dous proxectos para responder á demanda de tecnoloxías avanzadas de mapeo e intelixencia espacial

S. P. — 2026-06-11T08:55:04Z

O programa Nexos 25 atende a crecente demanda de tecnoloxías avanzadas de mapeo, intelixencia espacial e dixitalización operativa por parte das empresas mediante o impulso de dous proxectos de I+D: LEDITIA e XESTA. Ambas as iniciativas están financiadas pola Axencia Galega de Innovación (GAIN) da Xunta no marco do programa Nexos 2025, e co-financiado pola UE a través de Fondos Europeos e o Programa Galicia FEDER 2021–2027.
Unha resposta ás novas necesidades das empresas
As empresas operan cada vez en contornas máis complexas, dinámicas e conectadas. Terminais loxísticas, plantas industriais, instalacións produtivas e espazos de alta actividade requiren ferramentas capaces de integrar información, representar datos sobre o espazo físico e apoiar a toma de decisións de forma máis áxil e precisa.
Neste contexto, as tecnoloxías de mapeo avanzado e intelixencia espacial están a adquirir un papel estratéxico. Xa non se trata só de representar un espazo nun mapa, senón de converter esa representación nunha ferramenta útil para visualizar procesos, localizar activos, coordinar equipos, xestionar alertas, analizar fluxos e anticipar incidencias. Nexos 25 responde a esta demanda mediante dous proxectos complementarios: LEDITIA, centrado na loxística portuaria, e XESTA, enfocado na xestión do traballo e as alertas en contornas industriais.
LEDITIA: mapeo, datos e xemelgos dixitais para a loxística portuaria
LEDITIA é un proxecto orientado a mellorar a eficiencia operativa, a rastrexabilidade e a toma de decisións en terminal loxísticas portuarias mediante o desenvolvemento dunha plataforma tecnolóxica baseada en xemelgos dixitais. O seu obxectivo é replicar virtualmente o comportamento dunha terminal loxística e conectar esa representación coa operativa real.
O proxecto integra sensores, internet das cousas (IoT), intelixencia artificial e modelos de análises de datos para monitorar, analizar, simular e predicir o que ocorre na terminal. Con iso, busca optimizar o seu funcionamento, reducir movementos innecesarios, mellorar a rastrexabilidade de activos e contribuír a unha loxística máis eficiente, conectada e sostíbel.
LEDITIA desenvólvese en consorcio onda Kaleido Logistics, Cinfo, Srec Solutions e Situm, que achegan capacidades complementarias en optimización loxística, procesamento de vídeo, automatización intelixente, rastrexabilidade, análise de datos e intelixencia xeoespacial interactiva.
XESTA: intelixencia espacial para a xestión do traballo e as alertas
XESTA —Xestión do Traballo e as Alertas— aborda a necesidade de mellorar a xestión operativa, a coordinación de equipos e a resposta ante incidencias en contornas industriais. O proxecto propón avanzar no desenvolvemento de novas capacidades tecnolóxicas para unha industria máis eficiente, conectada e baseada en información operativa.
O seu obxectivo é desenvolver un novo produto con alto potencial de mercado, orientado á xestión do traballo e das alertas en escenarios industriais. Para iso, combina tecnoloxías dixitais, IA, comunicacións en tempo real e capacidades de intelixencia espacial, con aplicación en empresas con procesos industriais, compañías auxiliares de enxeñería e mantemento, provedores tecnolóxicos e outros actores do sector.
XESTA desenvólvese en consorcio onda Deicom, Insuiña, Dativic, Quobis e Situm, que achegan capacidades complementarias para o desenvolvemento dunha solución orientada a contornas industriais. O proxecto enmárcase, ademais, na evolución cara á Industria 5.0, combinando tecnoloxía, datos e comunicación operativa para xerar beneficios operativos, económicos e medioambientais.
Dous proxectos complementarios
Aínda que LEDITIA e XESTA responden a ámbitos distintos ambos parten dunha mesma necesidade empresarial: dispoñer de solucións que permitan conectar os datos co espazo físico para comprender mellor o que acontece, actuar con maior precisión e mellorar a eficiencia das operacións.
En ambos os casos, o mapeo avanzado e a intelixencia espacial permiten transformar información dispersa en coñecemento operativo contextualizado. Esta capacidade resulta clave para visualizar activos, zonas, roteiros, tarefas, alertas, incidencias e fluxos de actividade sobre contornas reais.