Código Cero - Diario Tecnolóxico de Galicia

20 anos da revista Código Cero

Xosé María Fernández Pazos — 2022-01-07T22:30:00Z

: Xosé María Fernández Pazos, Xavier Alcalá, Carlos Ballesteros e Marcus Fernández na primeira gala na que se recoñeceu cun galardón a iniciativa de Código Cero

A primeiros do ano 2000 emitíase na radio pública do país un programa sobre novas tecnoloxías. Levaría por nome Código. Había, sen embargo, un problema á hora de falar das TIC: os enderezos das páxinas web eran moi complicados para que os oíntes puideran collelos, rexistralos. Para superar esa eiva, un dos colaboradores do programa creou un espazo na Internet a xeito de bitácora no que daba conta das novas tecnolóxicas. Ademais servía como plataforma para un boletín informativo de carácter diario e outro semanal, cun resumo en catro páxinas nun ficheiro PDF. Esta iniciativa acadou recoñecementos e galardóns, e fixo que os seus fundadores, Carlos Ballesteros, Marcus Fernández e Xosé María Fernández Pazos, nos animaramos a facer unha revista impresa, acompañados dun grupo de amigos e colaboradores entusiastas do mundo TIC.
Aquela publicación levaría o nome de Código Cero, por aquilo do código binario, e hoxe vinte anos despois chega o seu número 222. Cando lanzamos aquel primeiro número en formato tabloide houbo quen afirmou que non durariamos nin dous meses, xa que unha revista en galego e de novas tecnoloxías era inviable no noso pais. Argumentos nos lles faltaban, xa que en realidade Código Cero e o seu irmán maior codigocero.com, existen pola vontade dos seus colaboradores e por vinte anos de esforzo, ilusión e moito, moito traballo por manter unha publicación que hoxe é referente en Galicia, e que ademais está na nosa lingua.
Seguimos crendo neste país na súa xente, nas súas empresas, nos seus emprendedores, nas súas organizacións, institucións, asociacións e nas súas administracións que manteñen viva a chama deste proxecto pioneiro. Código Cero continuará saíndo a diario no seu portal web e mensualmente en revista para contar e berrar que Galicia ten moito que dicir e aportar en novas tecnoloxías nun mundo globalizado. Parafraseando o egrexio galego Alvaro Cunqueiro, permítannos dar «Mil grazas por estes máis de 7.300 días de traballo, esforzo e ilusión e o noso desexo de polo menos ter outros tres mil días mais na nosa lingua».

Falece o enxeñeiro Fernando Pardo Bustillo

Xosé María Fernández Pazos — 2016-09-29T09:59:59Z

Fondo pesar no ámbito tecnolóxico galego polo pasamento de Fernando Pardo Bustillo, enxeñeiro responsable de grandes proxectos no noso pais entre os que destacou o da posta en marcha da Radio Galega e a Televisión de Galicia.
Doutor enxeñeiro de Telecomunicacións, foi responsable da parte técnica da CRTVG e posteriormente de Canal Sur, radio e televisión. Continuou o seu traballo como responsable de M-80 Radio e de Canal Nou Valencia.
Contratado por Price WaterhouseCoopers chegou a ser socio da consultora e impulsou o comercio electrónico e presidiu a asociación española do sector. Os proxectos do último concurso de licenzas de TDT en Galicia e os estudos de interferencias electromágneticas dos parques eólicos están entre os seus derradeiros traballos.

: Chío de Xavier Alcalá dando conta do pasamento de Fernando Pardo

A nova do pasamento dada a coñecer polo noso amigo Xavier Alcalá, causou unha forte conmoción no sector da enxeñería en Galicia.
Colaborador de Código Cero e Código TV nos seus primeiros tempos, queremos desde esta redacción amosalo noso profundo pesar a súa familia polo seu pasamento. Descanse en paz.

O 95º aniversario do afundimento do Santa Isabel celébrase cun documental que se poderá ver en liña

Xosé María Fernández Pazos — 2015-12-31T10:28:23Z

Este 2 de xaneiro cumpre 95 anos o naufraxio do vapor-correo Santa Isabel, que embarrancou nos baixos de Sálvora ocasionando a morte de 213 persoas, delas 64 nenos.
O aniversario quixo ser aproveitado por un grupo de alumnos da facultade de Comunicación da Universidade de Santiago para a realización dun documental titulado A lenda do Santa Isabel. O guión da reportaxe mestura lenda e historia e así unen a tradición de Mariña e a historia do naufraxio do buque. O documental recolle a morte de Roldán e como a serea Mariña decide regresar ás profundidades das augas de Sálvora. Antes bota unha maldición: o primoxénito de cada liñaxe dos Mariño debe ser entregado ao mar onde morrerá afogado. Os autores do documental fan a conexión co naufraxio do Santa Isabel onde faleceron boa parte da pasaxe e da tripulación e do que unicamente se salvaron 53 persoas.
O documental recolle a lenda como simbolismo da cantidade de xente que morre no mar e o pesar que causa nunha comunidade que vive del como é a destas costas. De feito, a reportaxe remata coa seguinte pregunta retórica: Cal é a familia desta comarca que non ten mortos no mar?.
Na reportaxe interveñen Xosé María Fernández Pazos, historiador, xornalista e mestre, autor do libro “Sálvora, memoria dun naufraxio. A traxedia do Santa Isabel”, texto no que se recuperou hai case que 20 anos a historia do naufraxio e as lendas da illa ribeirense; Antonio Piñeiro, profesor, escritor e historiador, Pura Fernández Gude, sobriña de María Fernández Oujo, unha das heroínas de Sálvora e Manuel ''De López'' e Silva, dous mariñeiros xa retirados da comarca. O documental empeza e remata falando sobre o mar e o seu simbolismo.
As entrevistas foron feitas no Porto de Aguiño, no Faro de Corrubedo, no Porto de Palmeira e en O Castro en Castiñeiras. Tamén foron gravados planos na Illa de Sálvora, na Praia da Catía, en Corrubedo, en Palmeira, en Ribeira, entre outros lugares.
O documental A lenda do Santa Isabel foi gravado e editado por Antonio Mosquera Montoya, Ana Rial Maneiro, Iago Sánchez Caridad, Laura Seijo Vigo, Pablo Montero Castro, Pablo Portela Rodríguez e Sara Pérez Seijo, que traballaron intensamente na guionización, entrevistas e recursos do documental durante varios meses.
A reportaxe de 17 minutos de duración poderá ser visto partir deste 2 de xaneiro aniversario do naufraxio a través do enlace da páxina www.riveira.eu ou directamente desde https://www.youtube.com/watch?v=21RJ-A5ttm4.

O Consorcio da Zona Franca busca atraer negocios a Vigo mediante un novo espazo web

Xosé María Fernández Pazos — 2014-07-03T13:48:37Z

O Consorcio da Zona Franca de Vigo presentou hoxe unha nova páxina web na que se recolle unha morea de información sobre a cidade e a súa contorna. A web Negocios en Vigo, na súa versión en español, e Invest in Vigo, na versión en inglés, está dirixida á promoción exterior da cidade.
A páxina inclúe todo tipo de datos sobre Vigo; dende unha descrición das súas infraestruturas, ata información cultural, turística ou empresarial. Conta con vídeos e numerosas fotografías e está pensada para que as empresas locais poidan utilizala nas súas presentacións no estranxeiro. José Ramón Ojea é o director de servizos avanzados do Consorcio.

Codigocero.com cumpre nove anos de vida

Xosé María Fernández Pazos — 2010-07-27T21:46:00Z


O director de Código Cero, Xosé María Fernández Pazos, nunha imaxe tomada durante o primeiro ano desta publicación.

Nove anos, 3.287 días é a vida deste portal, que naceu o 25 de xullo do ano 2001 e que este domingo cumpriu anos. Nacido dun programa radiofónico, codigocero.com, é hoxe o sexto medio de comunicación de Galicia na rede, e o primeiro integramente en lingua galega. Ocupa o posto 152.111 do mundo e o 2.928 de España.
Con máis de 33.300 usuarios únicos, o noso portal é consultado por unha maioría de internautas con estudos superiores, que o fan case na mesma proporción desde o traballo que desde o fogar, e case na mesma proporción de homes que de mulleres, iso si, no caso dos homes con idade menor de 45 anos e no das mulleres por riba dos 40 anos.
Código Cero é visitado mensualmente por máis de 250.000 internautas, cunha permanencia media no portal de 354 segundos, e que descargan máis dun millón cen mil novas cada mes. A estas espectaculares cifras únese o noso boletín diario, que reciben 2.884 subscritores de xeito gratuíto, o que fai que se eleve o número de visitantes a 320.000 mensuais.
Hoxe codigocero.com é o referente das novas tecnoloxías e da sociedade da información do noso país. Está escrito no cen por cento en galego, aínda que conta con tradución automática ao castelán, e conta co apoio da súa irmá pequena, a revista Código Cero, que distribúe cada mes cinco mil exemplares en máis de 250 puntos de Galicia, e chega a preto de mil subscritores por correo ordinario e a preto de 3.000 por correo electrónico e en PDF.
Os responsables deste proxecto son un grupo de amigos e traballadores que levan nove anos nesta iniciativa, que comezou na súa web unha nova andaina, con novo deseño e unha maqueta máis áxil, máis dinámica e con novas seccións, apostando amais polas redes sociais e polo aspecto gráfico, que pasan agora a ser máis visibles no portal.
Esperamos seguir contando co apoio dos nosos lectores e co de empresas, administracións, organizacións e asociacións, que manteñen este proxecto pioneiro en Galicia e en España e sen os cales non sería posible seguir.
Desexamos que este re-deseño sexa do agrado dos lectores, e por suposto esperamos contar co seu apoio e coas súas suxestións, e agora máis co uso das redes sociais.
Mil grazas por estes máis de 3.300 días de traballo, esforzo e ilusión e o noso desexo de ter polo menos tres mil días máis na nosa lingua.

O equipo de Código Cero

Nace o novo Código Cero

Xosé María Fernández Pazos — 2009-10-07T18:05:00Z

Queridos amigos, hai pouco máis dun mes enviamos unha carta informándovos do proxecto de avanzar na nosa revista Código Cero e no portal codigocero.com. A punto de cumprir oito anos, o portal xa os cumpriu en xullo, iniciamos unha nova andaina.
Oito anos de traballo e ilusión que naceron dun programa de radio dedicado ás novas tecnoloxías, continuaron cun portal de Internet codigocero.com e remataron cunha revista en formato tabloide que hoxe dá paso a un novo proxecto a Revista de Ciencia e Tecnoloxía de Galicia- Código Cero.
Cremos cumprida unha etapa que vai ter continuidade coa reconversión da nosa publicación en formato revista. Tanto o mensual como o noso portal, Código Cero, abordan unha profunda reconversión para adaptarse aos novos tempos e seguir sendo o referente da I+D+i , da Ciencia e do Medio Ambiente no noso país.
Manteremos a periodicidade mensual, seguiremos a toda cor, cambiamos a formato A4, aumentamos a paxinación, estamos nos mesmos sitios, aumentaremos colaboradores, seccións, opinións, melloraremos o deseño... e todo iso seguirá sendo gratuíto, si, de balde… e en galego. Un gratuíto atípico que, a diferenza doutros, leva moitos contidos e pouca publicidade, a imprescindible para manter a infraestrutura da publicación, a súa difusión e o noso portal cos seus boletíns diarios.
Aproveitamos a ocasión para agradecer nestas liñas aos nosos patrocinadores -empresas, institucións, administracións, organismos e axencias de publicidade- o seu apoio imprescindible para manter a revista e o portal, e esperamos seguir contando con eles nesta nova etapa, xa que, se non, non sería posible.
En Código Cero queremos contar coa colaboración e o apoio de todos, e por iso invitámosvos a que nos propoñades seccións, contidos, críticas e melloras que poidamos facer tanto no noso portal como na publicación impresa. De seguro que tedes moitas.
Gustaríanos agradecer a 50 amigos que nos escribides con propostas e suxestións coa subscrición á revista Código Cero durante seis meses. Facédeo a paxinas@codigocero.com.
Por suposto, esperamos os vosos correos electrónicos e se queredes escribir algo na publicación sobre I+D+i, ciencia ou medio ambiente, non o dubidedes esperámosvos. Unha aperta e as nosas grazas anticipadas.

A Xunta anuncia a próxima presentación dun plan galego de acendido dixital con prazos realistas para a implantación da TDT

Xosé María Fernández Pazos — 2009-06-26T15:21:11Z


Alfonso Cabaleiro na súa comparecencia para anunciar o futuro plan galego de implantación da TDT

O secretario xeral de Medios, Alfonso Cabaleiro Durán, anunciou que o Goberno galego traballa na elaboración dun Plan Galego de Comunicación e Acendido Dixital que se presentará nas vindeiras semanas. Segundo avanzou o secretario xeral de Medios ante a comisión parlamentaria, será un plan realista para a transición dixital coa máxima colaboración cos concellos, buscando chegar ao máximo posible de cobertura dixital nos prazos máis curtos de tempo e na procura de que non haxa desigualdades dixitais por razóns xeográficas.
Alfonso Cabaleiro destacou na súa comparecencia parlamentaria que o anterior Executivo autonómico non preveu, na elaboración dos orzamentos do ano 2009, os fondos correspondentes á Comunidade Galega para acometer a fase II e III da implantación da TDT.
Segundo a información facilitada o bipartito gastou noutros conceptos 98 millóns de euros que estaban destinados a infraestruturas de telecomunicacións.
Cabaleiro explicou que, o 10 de outubro de 2008, o Estado prestou á comunidade autónoma galega 98 millóns de euros a devolver en 12 años sen xuros para financiar diferentes infraestruturas de telecomunicacións. Deles, 93 terían que destinar a ofrecer servizos de banda larga en zonas onde a oferta de ADSL ou cable non chega por non ser rendible economicamente e os 5 restantes irían directamente á extensión da TDT. Cando iniciamos os trámites correspondentes ante a Dirección Xeral de Orzamentos para xerar os cinco millóns de euros da TDT, afirmou Cabaleiro, se nos di que o diñeiro do préstamo foi gastado na súa totalidade no ano 2008 noutros conceptos, non só os 5 millóns correspondentes á TDT, senón tamén os 93 restantes que tiña que xestionar a Consellería de Industria.
Para o vindeiro 1 de xullo estaba prevista a primeira fase do apagamento analóxico en Galicia que afectaba a Santiago de Compostela e comarca e Ourense leste. Ese día máis de 500.000 habitantes terían que pasarse obrigatoriamente á televisión dixital. Agora ante a nova circunstancia prodúcese un retraso no apagamento analóxico á espera da seguinte fase, o 31 de decembro, que afectará ás zonas de Ferrol e A Coruña que toman o sinal de Ares e Ourense do Monte Meda, se ben a falla de dotación económica podería retrasar a mesma.

As SMS en itinerancia baixarán de prezo na U.E.

Xosé María Fernández Pazos — 2008-09-23T12:30:00Z

A Comisión Europea presentou hoxe unha norma para rebaixar ata un 60% o prezo das mensaxes de texto (SMS) enviados desde o estranxeiro por considerar que as tarifas actuais son demasiado altas e que os consumidores están sendo estafados.
O Executivo comunitario quere tamén impor un tope ás tarifas almacenistas (as que se cargan entre si as operadoras) de roaming para a transmisión de datos.
Na actualidade, as SMS enviadas desde o estranxeiro custan 10 veces máis que os que se mandan dentro dun mesmo Estado membro, segundo os datos de Bruxelas.
O custo medio dunha mensaxe de texto en itinerancia na UE sitúase nunha media de 29 céntimos de euro. No caso de España, o prezo medio é aínda máis elevado, de 40 céntimos.
Ademais o prezo non baixou nos últimos meses a pesar dos reiterados avisos enviados pola Comisión.
O Executivo comunitario propuxo hoxe fixar un prezo tope de 11 céntimos por mensaxe de texto enviado desde o estranxeiro. Ao mesmo tempo, a tarifa límite almacenista para as operadoras será de 0,4 céntimos.
A comisaria de Sociedade da Información, Viviane Reding, espera que as compañías compitan por baixo destes prezos e que a longo prazo os prezos baixen polo menos ata 4,2 céntimos por mensaxe.
O economista e técnico da Unión Europea en Bruxelas, Miguel Gil, en declaracións a Código Cero, considera que os topes entrarían en vigor o 1 de xullo de 2009 se a Eurocámara e os 27 acéptanos, posibilidade que se da por segura antes de fin de ano.
A nova norma non incluirá topes para os prezos que se cobran aos clientes polo roaming na transmisión de datos. E iso a pesar de que descargar un mega de información no estranxeiro costa ata 16 euros, fronte aos 15 céntimos de tarifa para as descargas nacionais, segundo as estatísticas de Bruxelas.
A Comisión considera que de momento é suficiente con obrigar ás compañías a que, cando o seu cliente cruce unha fronteira, infórmenlle dos prezos. Ademais, desde o verán de 2010, cada usuario deberá poder fixar un límite de gasto a partir do cal córtese o servizo. Finalmente, para o prezo almacenista establecerase unha tarifa máxima de 1 euro por mega para estimular a competencia e protexer ás pequenas compañías.
Reding proporá tamén prorrogar tres anos os topes que xa se aplican ao prezo das chamadas de voz no estranxeiro, que en principio terían que expirar en 2010. En xullo de 2012, a tarifa máxima para as chamadas realizadas caerá ata 34 céntimos e para as recibidas ata 10 céntimos (fronte a 46 céntimos e 22 céntimos na actualidade, respectivamente).

Microsoft engádelle unha nova incorporación á súa liña de buscadores para empresas

Xosé María Fernández Pazos — 2007-11-20T14:01:41Z

Microsoft vén de anunciar a incorporación do Search Server 2008 Express á súa liña de buscadores como xa viña anunciando dende o pasado 6 de novembro.
Este novo servizo, que estará a disposición dos usuarios de balde, combina a simplicidade da instalación e a facilidade de emprego cun completo conxunto de funcionalidades de procura, entre as que se inclúen gran cantidade de fontes de información.
A versión “Release Candidate” de Searck Server 2008 Express xa está disponible na web de Microsoft para a súa descarga e avaliación, dende a ligazón: http://www.microsoft.com/enterprisesearch.
Para poder ofrecerlle ós seus clientes o Search Server Express, Microsoft tomou as capacidades de procura de Microsoft Office SharePoint Server 2007 e púxoas a súa disposición como un servidodr independente e de balde.
Search Server Express está deseñado para ser doado de configurar e administrar, permitindo ós profesionais de IT pasar dende a descarga do programa ata a realización das procuras en tan só 30 minutos, sen límite de documentos, facilitando en todo momento as necesidades de calquera empresa. A partires de agora, segundo os seus responsables, “cos produtos de Search Server Express, as empresas xa poden acceder a sistemas de procura profesionais sen ter que preocuparse de que sexan demasiado complexos ou caros”.