YouTube superou en xaneiro os 100 millóns de usuarios rexistrados
venres, 6 de marzo do 2009
O portal de descarga e visualización de vídeos en Internet, YouTube, superou por primeira vez na súa
historia, os 100 millóns de usuarios rexistrados o pasado mes de xaneiro,
impoñéndose con superioridade ao resto de páxinas de contidos similares.
Segundo vén de informar a consultora comScore, o número de vídeos vistos a
través da Rede en Estados Unidos en xaneiro, acadou os 14.800 millóns, un 4 por
cento máis que en decembro de 2008.
O informe indica, asemade, que preto do 91 por cento deste
crecemento “correspondeulle a YouTube”,
onde se viron 6.400 millóns de vídeos e se rexistraron os devanditos 100
millóns de espectadores que levaron á web ao cumio.
En total, o portal propiedade de Google posúe neste intre o
43 por cento do total de vídeos que circulan pola Rede, seguido de Fox
Interactive Media, propietario de MySpace, que conta con 522 millóns de vídeos
e 62 millóns de usuarios.
Por outra banda, Yahoo fíxose co terceiro posto nesta
peculiar “carreira”, ao rexistrar un
total de 374 millóns de vídeos vistos e 42 millóns de usuarios.
A consultora encargada de difundir a información asegura que
ao longo de xaneiro, o 77 por cento dos internautas “viron un vídeo nalgún destes portais”.
A media de tempo que dedicaron estes internautas a ver
vídeos en liña “foi de seis horas”,
un 15 por cento máis que en decembro pasado.