YouTube VR por fin está dispoñible para Oculus Go

A realidade virtual, o vídeo envolvente e o vídeo esteoscópico son tecnoloxías moi interesantes e atractivas, pero cun difícil encaixe no mercado de consumo, e o proceder das compañías que promoven esta suposta revolución non axuda, xa que teñen un comportamento errático, como o de Google, que tras presentar unha plataforma como Daydream semella tela deixado de lado e non prestarlle a máis mínima atención, o que parece confirmar o último paso que veñen de dar: anunciar que YouTube VR está dispoñible para Oculus Go como aplicación na Oculus Store. Deste xeito, o principal punto forte de Daydream deixa de selo, en boa medida porque a estratexia inicial de Google foi un erro brutal, xa que promover un estándar de vídeo envolvente (VR180) de cara ao futuro, pero limitar a súa reprodución a unha plataforma sen usuarios estaba condenada ao fracaso.
Agora non só os vídeos envolventes de YouTube están dispoñibles para practicamente todas as plataformas de realidade virtual, senón que tamén prepáranse para corrixir outra das grandes eivas de cara á produción de contidos en formato VR180, xa que a ferramenta que permitía adaptar os vídeos editados en VR180 para a súa publicación en YouTube por fin está dispoñible para Windows, xa que incomprensiblemente só tiña versión para macOS e Linux.
Resulta difícil de entender como unha compañía como Google, tras esforzarse en crear un formato de vídeo estereoscópico en 180 graos tarda case ano e medio en facilitar que poida consumirse e producirse contidos neste formato, cando cos vídeos en 360 graos poñían facilidades dende o primeiro minuto.
Esta política de Google parece ter pasado factura aos dispositivos de captura de vídeo en VR180, pois das dúas cámaras anunciadas por Google en xaneiro, a Lenovo Mirage Camera tivo que rebaixar o seu prezo nos EE.UU. drasticamente (até os 199 dólares) e a Yi Horizon VR180, prevista para o pasado verán, aínda non ten unha data de lanzamento fixada (dando a impresión de que o fabricante non confía no seu éxito). Esperemos que o rumbo actual de Google a este respecto facilite a adopción do formato VR180, pois pode ser un dos grandes atractivos para a adopción dos cascos de realidade virtual en moitos ámbitos, ao permitir vivir experiencias con grande realismo e sen que a súa produción supoña un reto como o dos 360 graos (formato que ten serios problemas principalmente por non poder integrar ben a figura do operador de cámara).