Xiaomi presenta unha tecnoloxía capaz de cargar completamente un móbil en 8 minutos

Os sistemas de carga rápida están a ser un dos grandes puntos a favor dos fabricantes chineses de smartphones, apartado no que superar sobradamente a compañías como Apple ou Samsung, e como mostra diso Xiaomi vén de amosar a súa nova tecnoloxía de Hypercharge, coa que conseguen cargar completamente a batería dun Mi 11 Pro (cunha batería de 4.000 mAh) en só 8 minutos mediante un cable polo que se transmitían 200 watts, mentres que transmitindo 120 watts por indución conseguiron cargar a mesma batería en 15 minutos.
Con esta tecnoloxía Xiaomi colócase á cabeza en velocidade de carga, aínda que é de esperar que nas vindeiras semanas outros fabricantes chineses (como Oppo) lancen outras tecnoloxía de cargas semellantes e, aínda que en todos estes casos falamos de demostracións técnicas, como aconteceu no pasado podemos confiar en que en poucos meses vexamos móbiles no mercado con estas tecnoloxías de carga que destacan por conseguir grandes velocidades de xeito seguro, o que resulta especialmente atractivo nos móbiles actuais que presentan baterías de grande capacidade, polo que a carga rápida resulta moi práctica.