Xiaomi presenta un novo smartphone de prezo contido cun procesador Snapdragon 855+

Os smartphones Redmi K20 e K20 Pro de Xiaomi, comercializados en España como Mi 9T e Mi 9T Pro, supuxeron toda unha revolución dentro da familia Redmi (caracterizada polos seus prezos axustados) xa que incorporaban prestacións de gama alta e os procesadores máis potentes do mercado Android, e a xogada parece ter funcionado ben, xa que Xiaomi recunca agora co Redmi K20 Pro Premium Edition.
O novo smartphone chega cun procesador Qualcomm Snapdragon 855+, até 12 GB de RAM, até 512 GB de almacenamento interno e cun cargador de 27 watts, combinación que supera á meirande parte dos smartphones de alta gama do mercado, e que podería facer que se convertese nunha das opcións máis apetecibles para moitos xogadores de móbil (xa que incluso conta cun sistema de refrixeración de 8 capas de grafito, co que conseguen até un 650% máis de eficiencia na redución térmica que cunha única capa de grafito, á vez que promete un 15% máis de rendemento gráfico que teléfonos cun procesador Qualcomm Snapdragon 855).
O Redmi K20 Pro Premium Edition ten unha pantalla AMOLED de 6,39 polgadas, cámara traseira tripla de 48, 13 e 8 Mpíxeles, cámara frontal periscópica de 2 Mpíxeles e batería de 4.000 mAh que co seu cargador rápido pode chegar ao 58% da súa carga en só media hora (precisando de 72 minutos para unha carga completa).
Este smartphone chegará a China en 5 cores distintas en tres variantes con 8 GB de RAM e 128 GB de almacenamento, 8 GB de RAM e 512 GB de almacenamento e 12 GB de RAM e 512 GB de almacenamento por 2.699, 2.999 e 3.199 iuans respectivamente (346, 384 e 410 euros). Probablemente chegue ao mercado europeo en 1 ou 2 meses.