Xiaomi presenta os seus primeiros ordenadores portátiles

O prezo dos portátiles de Xiaomi con pantalla de 13,3 polgadas será de só 4.999 iuans (682 euros)

Tras moitos meses rumoreándose que Xiaomi ía entrar no mercado dos ordenadores persoais, por fin presenta o seu Mi Notebook Air, que xa polo seu nome deixa claro que está inspirado no MacBook Air, no que se diferencia principalmente por funcionar con Windows 10 e ter un prezo moi axustado, que o converterá en todo un éxito nos mercados nos que se comercializa directamente. Chegará en dous formatos, con tamaños de pantalla de 12,5 e 13,3 polgadas a prezos que parten dos 3.499 e 4.999 iuans respectivamente (477 e 682 euros), de xeito que adaptaranse a diferentes perfís de uso e petos.
Estes novos portátiles son moi atractivos, cun coidado deseño metálico (en cor ouro ou prata), teclado retroiluminado e carga a través e USB-C, pero sen esquecer portos USB 3.0 adicionais para accesorios, sorprendendo o feito de que non presenten logotipos externos. O modelo máis cativo ten unha pantalla Full HD de 12,5 polgadas, procesador Intel Core m3, gráfica Intel HD 515, 4 GB de RAM, 128 GB de SSD, Wi-Fi AC, Bluetooth 4.1, saída HDMI, webcam 720p, 1 porto USB 3.0 de formato normal e outro USB-C para a carga, toma para auriculares, unhas dimensións de 292 x 202 x 12,9 milímetros e un peso de só 1,07 quilogramos. Non só o seu tamaño facilita a súa mobilidade, senón que a súa batería tamén xoga un gran papel nese aspecto, xa que achégalle unha autonomía de até 9,5 horas de reprodución de vídeo en liña ou 7,5 horas de navegación web, soportando un modo de carga rápida co que a batería cargaríase até a metade en só 30 minutos.
Os usuarios máis esixentes poderían optar polo modelo con pantalla Full HD de 13,3 polgadas, cun procesador Intel Core i5, 8 GB de RAM, 256 GB de SSD, gráfica nVIDIA GeForce GT 940 MX con 1 GB de memoria, Wi-Fi AC, Bluetooth 4.1, webcam 720p, 1 porto USB-C, 2 portos USB 3.0, saída HDMI, toma para auriculares, unhas dimensións de 309,6 x 210,9 x 14,8 milímetros e un peso de 1,28 quilogramos, que conta cunha autonomía de até 8 horas de reprodución de vídeo en liña e 7,5 horas de navegación web.
Estes equipos sairán á venda en China o vindeiro 2 de agosto, e polo momento non se sabe se terán distribución internacional. Como curiosidade os portátiles contarán con accesorios oficiais como unha funda con formato de sobre (que tan popular fixera Apple na presentación do MacBook Air orixinal) e skins adhesivas para personalizar a aparencia externa dos equipos.