Xesol, Tecalis e Situm mostran as súas revolucionarias tecnoloxías na Cidade da Cultura

mércores, 18 de abril do 2018 Fernando Sarasketa

JPEG - 129.9 KB
Captura da aplicación Signen da firma galega Tecalis

Este 19 de abril as nosas empresas innovadoras locen talento e innovación na Cidade da Cultura. O motivo? A celebración dunha xornada tecnolóxica por parte do Clúster TIC Galicia, un evento que quere ser unha xanela ao noso potencial tecnolóxico e no que participarán empresas tan punteiras como Tecalis, Xesol, Situm ou Cinfo, entre outras. O evento celebrarase na Sala Eisenman da Cidade da Cultura, a partir das 9:30 horas, contando a sesión de apertura coa presenza de Norberto Penedo, director da Área de Competitividade do IGAPE, e de Antonio Rodríguez, presidente do Cluster TIC Galicia. empresa viguesa Xesol Innovation (centrada na condución segura e intelixente e responsábel dun asistente de condución intelixente que achega máis ángulos de visión aumentada da contorna do automóbil) será a encargada de abrir o encontro co relatorio O coche do futuro: tecnoloxía para unha nova automoción.
Logo da intervención de Xesol, será a quenda da empresa de desenvolvemento de software Tecalis, con sede no Milladoiro (Ames), que mostrará os últimos avances na aplicación do blockchain ao mundo das transaccións (Tecalis, como lembraremos, é responsábel da plataforma Signen, unha tecnoloxía de seu que permite asinar acordos entre dúas ou máis persoas a través de diferentes xeitos, algúns deles tan innovadores como os formatos de audio ou de vídeo).
De seguido, o director do IGAPE, Juan Cividanes, moderará a rolda de presentación de produtos innovadores, na que se mostrarán servizos e solucións concretas como a tecnoloxía de xeolocalización en interiores de Situm, a plataforma de gamifación Dogoplay de Cleventy, a plataforma de intelixencia nos negocios Obsidian de Ozona, a tecnoloxía de retransmisións multipantalla de Cinfo, a plataforma cocoERP Alimentación de AVA e a plataforma para xuntanzas virtuais e presenciais con validez legal de Councilbox. O conselleiro de Economía, Francisco Conde, será o encargado de clausurar o evento. Está prevista a asistencia de grandes clientes potenciais e investidores privados.

PUBLICIDADE