Windjammers 2 estrea beta aberta

mércores, 11 de agosto do 2021 Marcus Fernández

Hai un par de anos tería que ter saído á venda o xogo Windjammers 2 para Nintendo Switch e PC, pero distintos atrancos adiaron este agardado título que retoma un clásico dos salóns recreativos, e finalmente este desenvolvemento de Dotemu volveu ao rego, e hoxe mesmo estrea beta aberta, que durará até o día 22, e que curiosamente está dispoñible para PC (Stream), PS4 e PS5, ou sexa, que confírmase que o xogo vai estar tamén presente nas consolas PlayStation.
A beta aberta de Windjammers 2 permite probar 4 personaxes xogables (Steve Miller, Gary Scott, Loris Biaggi e Sophie De Lys) e 4 escenarios (praia, ring, tellado e estadio), contando con taboleiros de puntuación en liña e carecendo polo momento da modalidade de xogo con amigos.
Còmpre salientar que esta beta non é a típica que sae poucas semanas antes do lanzamento para probar os servidores de xogo en liña, pois estamos ante un produto aínda en desenvolvemento, con elementos importantes sen rematar. Os participantes na beta poden contribuír a esta creación dando conta dos problemas técnicos que experimenten.
Este novo xogo, aínda que mantén a esencia da máquina recreativa, ten gráficos totalmente renovados (debuxados a man) e novas mecánicas de xogo, converténdose nun título máis completo que pretende volver pór de moda este tipo de xogo competitivo.

Vídeo no que podemos ver os movementos que poden facerse en Windjammers 2 como evolución do xogo orixinal de Neo Geo

PUBLICIDADE