Warner Bros ofrecerá descargas legais de películas en China
mércores, 5 de novembro do 2008
Malia que o
goberno chinés asegura estar a tomar medidas contra a piratería do cine no seu
país, o certo é que a industria de Hollywood segue a queixarse argumentando que
“non abondan” e que o consumo de
películas pirateadas lle fai perder ao ano miles de millóns de dólares só no
país asiático.
Mentres as
autoridades chinesas responsables intentan convencer aos seus habitantes de que
non merquen falsificacións na rúa, o presidente do grupo Warner Bros
Enterntainment vén de anunciar que a súa compañía “vai distribuir filmes liberados recentemente en liña” para evitar
que a xente compre DVD piratas e vexa as películas de xeito legal nas súas
casas.
Deste xeito, os
usuarios de Internet en China, poderían alugar e ver as emisións en liña por
menos dun dólar, tal e como vén de informar o xornal dixital Los Angeles Times.
O baixo coste
destes vídeos “á carta” pretende
atraer aos máis de 253 millóns de internautas do país, que só terán que pagar a
tarifa establecida por Warner Bross en lugar de descargar os films ilegalmente
ou mercalos directamente no “top manta”.
Segundo vén de
afirmar o presidente do grupo Warner Bros Entertainment, Kevin Tsujihara, “a distribución dixital é unha oportunidade
para resolver o problema de China” e reducir as perdas de ventas potenciais
polos discos piratas, que en 2005 ascendían a 2,7 millóns de dólares.
Outra empresa que
quere dar unha oportunidade a Hollywood para patearlle o cu aos piratas é Voole, unha compañía que
adquiriu os dereitos de distribución de Warner e Sony Pictures Television
Internacional para lanzar un servizo de suscripción en liña do que aínda non se
saben as características que terá.
O caso é que os
Observadores de Industria están a notar un cambio no mercado chino e na
actitude dos seus consumidores dende a celebración dos xogos olímpicos de Pekín
e aseguran que moitos dos populares sitios pirata, como Xunlei, “están a traballar para rematar cos contidos ilegais
e substituílos por contidos con licenza”.