Vitae achega en maio a 2ª edición do seu curso sobre dirección e xestión de proxectos con PM2
martes, 28 de marzo do 2023
Vitae
Consultores vai desenvolver nesta primavera de 2023 unha actividade
formativa de especial interese para quen queira dar novos pasos en
excelencia profesional no ámbito tecnolóxico, máis en concreto no
ámbito do desenvolvemento de proxectos tecnolóxicos avanzados. A
actividade en cuestión non só servirá de axuda aos asistentes para
optimizar o seu dia a día senón para garantir o éxito de cada
proxecto. Estamos a falar da
segunda edición do curso Dirección e xestión de proxectos
baixo a metodoloxía PM2. Desenvolverase en formato de aula
virtual os días 8, 9, 10 e 11 de maio. Terá 10 horas de duración.
O curso, a un nivel xenérico, cubrirá unha metodoloxía de
xestión desenvolvida e soportada pola Comisión Europea. O cometido
non é outro que facer accesíbel aos equipos de proxectos unha forma
efectiva de traballar en TI.
Segundo informa a consultora
galega Vitae, PM2 aporta un contido “sinxelo e doado de aplicar en
calquera tipo de proxecto” a través dunha ferramenta que foi
desenvolvida para adaptarse ás necesidades específicas, a cultura e
as restricións das institucións e administracións públicas
europeas. Ademais, incorpora elementos de boas prácticas, estándares
e metodoloxías globalmente aceptadas. Os obxectivos principais do
curso son os seguintes:
·Dar a coñecer e consolidar o coñecemento sobre a metodoloxía de xestión de proxectos que a CE
creou para as súas institucións e provedores das mesmas.
· Preparar ás persoas asistentes no uso dos distintos artefactos (modelos,
documentos, rexistros) que PM2 prové xunto co corpo de coñecemento.
O curso está dirixido a profesionais con experiencia na
xestión de proxectos e servizos, a responsábeis de unidades de
negocio, directivos e empresarios que desexen adquirir unha visión
consolidada da dirección de proxectos.
Tamén está dirixido a
perfís con menos experiencia profesional que queiran desenvolver a
súa carreira profesional nesta área da xestión.
A persoa
encargada de impartir os contidos será Javier Rosa, enxeñeiro
industrial pola Universidade Carlos III de Madrid. A día de hoxe é
director de Servizos e director técnico en Media Markt, e dirixe
unha empresa de consutoría especializada en dirección de proxectos,
implantación de sistemas de xestións por procesos, outsourcing
e formación.